Da la Marca

El vin alchemico

Pianta de vida “franca”.

Foladura de l’ua par el vin alchemico.

L’ua e el vin alchemico.

La produssion vinicola de la Marca la xe rivada a un livel de ecelensa global co vini come el Prosecco o el Cartizze, conossùi in tuto el mondo che me ga messo in onbra vini nostrani squisiti come el vin de la brosa, el fràgolo o el corbinel, faséndoli squasi sparir dal marcà.
El pi antico de ’sti vini el jera el famoso "vin alchemico", un vin particolar dificile da produr, parché el ga da osservar ’na serie de prescrission che risal al Medioevo de la tradission cabalistica e esoterica.
Le vide destinàe a ’sta produssion bisognava che le fusse "franche", cioè lìbare da tutori o sostegni e no "s-ciave" cioè ligàe da pali o altro; al massimo le podéa vegner frontàe a un muro o a ’na spaliera. Inoltre ’ste piante no bisognava bruscarle e par fertilizarle ghe voléa solo concime organico; el diserbo el jera manual, mai chimico o mecànico e anca la vendema se la faséa a man e ogni fase de la vinificassion la tegneva conto del ciclo lunar.
La foladura la vegnéa fata de preferenza da putèi e sia el mosto che el vin, come ne la tradission ebraica kosher, no ’l gavéa da entrar in contato co metal o sostanse estranee. Par questo i produtori pi rigorosi i folava l'ua no dentro a le tine, ma ne le tìpiche çeste da sémena a tenuta stagna; in pi el vin se gavéa da tegnerlo solo in contenitori de vero, come fiasche, bosse e bossoni; al massimo se podéa far ricorso a la ceramica.
Bona parte de ’ste tradission le jera comuni a la viticultura normal prima che ne l'Otoçento rivasse da l'America el flagelo de la filossera che ga stravolto e canbià radicalmente le tecniche agricole, introdusendo nove varietà pi resistenti a i parassiti.
El vin alchemico no ’l jera un prodoto comercial, ma squasi ritual, riservà a i adepti de serte confraternite ne i simposi; l'ultimo produtor uficial de la Marca el xe stà el naturalista Pieralvise Busato, un nobilomo venessian, Gran Maestro de l'Ordine dei Rosacroce de le tre Venessie, che gavéa la so tenuta ne la Bassa Trevisana e dove che el curava personalmente la produssion insieme a i so mezadri, regalando el so vin a i menbri del sodalissio.
La produssion la xe finìa verso i ani Çinquanta-Sessanta del secolo passà, ma l'altro ano, quando che la pandemia no la ga permesso de bruscar tante vide par causa de i divieti de spostamento da un comune a un altro, l'ultimo nevodo de i coloni del nobilomo venessian el ga ben pensà de tentar de rifar el vin alchemico par un grupo de apassionài che se ga za prenotà l'intiera produssion par i prossimi diese ani, se tuto va come previsto.

[torna sopra]