|
Editoriale
Insegnare la pace
La pace no se otiene con la guera, ma… con la pace! Semo davanti a na tragedia anuncià e sotovalutà. L’equilibrio mondiale xe sconvolto: pesanti le conseguenze economiche e finanziarie. La grande storia se ripete: el “pìcolo” Davide contro Golia.
In sto momento semo ne le stesse condizion de quando xe scopià la Seconda Guera mondiale, solo che ’desso, se dovesse sucédare na Terza Guera mondiale, chel poco che restarìa de l’umanità el se catarìa a l’Età de la piera. Prudenza, corajo, preghiera e solidarietà le xe le uniche armi da doparare se se vole vìnzare la guera e far scopiare la pace.
Anca noantri che semo distanti da i posti del conflito, ne toca sentirse in guera, parché la television e i altri mezi digitali i ne bonbarda de imàgini e de notizie su la spaventosa situazion del popolo ucraino: armi, distruzion, palazi sventrà, mancanza de vìvari, de aqua, de corente, de riscaldamento e morti, tanti morti, soratuto putini e militari. Da na parte e da st’altra!
Questo xe propio el momento de augurarse de vero cuore “La pace sia con te”: semo drio ’traversare on tenpo tuto in salita – prima la pandemia e ’desso la guera – e se sa che vegnere zo, ogni santo juta, ma nare sù la ghe vol tuta! Purtropo, on fasolo, par quanto che ’l boja, no ’l deventarà mai on ovo; la pace par quanto la invochemo, no la sarà mai tale se no canbiemo el conceto che ghemo de la pace.
La pace no se perde co la guera; la pace se perde tanto tenpo prima: dàndola par scontà. Ma sì, cossa vuto che voja dire: basta no fare la guera, quela de le armi, par intèndarse.
L’idea la sarìa anca bona, ma la xe inconpleta. E inconpleti xe i “comitati per la pace”, i “istituti di ricerca e studio per la pace”, le marce, le dimostrazion con i mega-raduni ne le piazze de le cità… Tuto belo, tuto juta a far nàssare o a far créssare la cultura de la pace e de la non guera. Ma xe oncora poco.
Bisogna partire da la scola, educando i putèi a la convivenza e al nare d’acordo co l’ùltimo rivà in classe, che magari el ga i oci a màndola o el colore de la pèle come el cul de la ramina.
No basta però che i nostri pìcoli i riceva, a scola, ste istruzion, e dopo, có i varda la television, da i cartoni animati in sù, i vede solo sène de guera e de violenza, sparatorie, omicidi e copamenti de ogni gènare.
A scola a i putèi ghe vien insegnà el rispeto, e dopo, a casa, i cata discussion violente tra mare e pare. Se i va in cesa o in patronato, ghe vien racomandà de fare i bravi, de volerse ben, de conportarse come se deve… e na volta in strada, eco i “bulli”, i lazaroni che, forti del branco, i ghe ne fa straje del toseto “a modo”.
Eco ’lora che la fameja, la scola, la socetà, la parochia, la strada, la tivù… le ga da inventarse la responsabilità de la pace, ma a tenpo pieno, senò xe inùtile (o quasi inùtile) parlare de educare a la pace fin da i primi ani de vita. La pace bisogna vardarla con oci fissi… e nò con un ocio che varda le verze e st’altro i bròcoli!
No xe l’invasion, l’ataco militare bastardo, la crudeltà de la violenza sul popolo de l’Ucraina; no xe el silenzio inposto da la ditatura a na parte del popolo russo, che pole risòlvare i problemi de na civile convivenza nel mondo.
Solo la parola, el dialogo, el vegnerse incontro ofre la speranza de poder fermare la soferenza e sugare le làgreme de l’umanità, provocà da la guera.
A i nostri fiòi stemo consegnàndoghe on tragico orizonte. Come farài a superare l’inquietudine del futuro? Tuto questo mete oncora na volta noantri genitori, noantri adulti de fronte a le nostre mancanze e a le nostre responsabilità educative tradìe, a conferma che la pace xe el risultato de tante picole robe (solidarietà, toleranza, rispeto e el ben de tuti), de pazienza e tanta bona volontà.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Insegnare la pace
La pace no se otiene con la guera, ma… con la pace! Semo davanti a na tragedia anuncià e sotovalutà. L’equilibrio mondiale xe sconvolto: pesanti le conseguenze economiche e finanziarie. La grande storia se ripete: el “pìcolo” Davide contro Golia.
de Mario Sileno Klein
El canton leterario
El dialeto de Luigi Meneghello
Xe nato 100 ani fà a Malo l’autore de “I piccoli maestri”, “Libera nos a Malo” e tanti altri libri pieni de parole e cultura paesana vèneta.
de Giordano Dellai
|
