Da San Stèfano de Zimela (VR)

Rumando…

Margarita co ’l boton dopio… ieri (1914) e na margarita co’l boton dopio oncò (2022).

Atentato a le Tori gemele de New York (2001) e la ilustrazion de Achille Beltrame de un fato simile del 1942.

Màscare a gas tipo Grande Guerra.

I antichi romani, che i ghe ne savéa ’na pagina de pi del libro, i diséa che Nihil sub sole novum, che tradoto in te ’l nostro dialeto a vol dire che svòltela, smìssiala, la xe senpre la stessa roba! E ’desso ve spiego. Mi in tanti ani a go mucià ’na montagna de giornài e de robe vece da colezion che le xe la disperazion de me mojere, che la ghe ne cata dapartuto, finamentre anca soto el leto. La ga reson de dirme che so’ disordinà perché no so’ mai stà bon de tegnere un òrdine che me faga catare sùito chelo che zerco e che tegna ben le càmare de la casa. Par mi el métare a posto, purtropo, el se riduse a ciapare le robe e muciarle de novo in te ’nantra parte e cussita tuto resta come prima.
E alora, quando che a me ocore calcossa par le me ricerche, a devento mato a rumare dapartuto, in te la speranza de èssare fortunà. Ma ’sta roba la ga anca un lato positivo, anzi du: la sodisfazion de far saltare fora chelo che me ocore e chela de catare robe che no savéa pi de avere, interessanti, bone par fare altre ricerche e altri articoli o par farme tornare in mente tanti ricordi de la me longa vita. Eco parché el verbo rumare l’è quelo che còniugo piassè volentieri. A ghe ne sarìa tante de robe catà, ma ghe ne parlo de poche, par lassarghe posto a le fotografie.
In te la Domenica del Corriere, nùmaro 22 del 1914 i ga publicà ’na stranezza de la natura che la jera ’na margarita co’ el boton dopio sbocià a Zevio (VR) e che la ga merità l’onore de èssare messa su chel famoso giornale. Poco tenpo fà me fradelo el ghe ne ga catà un paro in te ’l so giardin e ’desso a le meto su chesta altretanto inportante publicazion.
Prima che ghe fusse la possibilità de mandare da un posto a chel’altro de la Tera ’na fotografia i giornalisti i ghe telefonava o i ghe telegrafava in redazion el so articolo e in base a chelo che i diséa el disegnatore el realizzava l’ilustrazion, che a jera famose chele a tuta pàgina de la Domenica del Corriere, disegnà dal grande pitore Achille Beltrame e dopo dal brao Walter Molino.
Eco, se in te ’l 2011 a fùssimo stà a chel tenpo, la copertina de l’atentato aereo de l’ùndase de setenbre Beltrame el lo gavaria ilustrà cussita, come in te la Domenica del Corriere nùmaro 12 del 1942. Se vede l’esplosion inzima a un gratacielo de New York e la gente che scapa spaentà: proprio chelo che ghemo tuti visto tante ’olte in television e in te i giornài. E invezze se tratava de i colpi de canon sparà par sbalio da ’na nave da guera mericana ancorà lì vizin.
A xe un bel tòco che a giremo co’ su la facia ’na mascherina par salvarse dal bao moro del coronavirus. Eco de le màschere antigas che tuti i soldà i se portava drio, ricordàndose de i gas che i jera stà molà in te la Grande Guerra e che i ghe ne gavéa fato straje. I ghe ne gavéa anca tanti civili par paura che i vegnesse fora da le bonbe de i bonbardamenti aerei. E de gas e de màscare a ghe ne go ’vu esperienza quando che da soldà i me ga insegnà a mètarme sù la màscara in te ’na tenda piena de gas lagrimògeno, che de làgrime a ghe ne go fate anca massa.

[torna sopra]