Da l’Alta Padovana

’A cioca

Tenpo fà ’a ga cronpà tre gaine-tre, de quée maron, ovaròe, tute ossi e un ovo al dì.

Intanto, métea coare inte na zhesta co tanto fen o rizhi fini e co diese uvi al massimo…

Na me amiga che l’ano passà se ga catà de colpo co ’a so justa pension e parfin erede de tri ètari de tera coltivàbie, ’a me ga contà che ’a voéa métarse fare ’a contadina.
“E come nò! Vuto fare ’a Maria Antonieta inte l’Hameau du Petit Trianon? Auguri!” ghe go risposto mi e éa che ’a ga sentìo suìto el sarcasmo pi che l’ironia inte ’e me paròe:
“Cossa crèdito che mi, se vui, no sia bona farlo?”
“E chi ga dito gnente! Proa, proa che dopo se savarèmo dire!”
Sicome che stupida no ’a ze, cò ’a ga capìo ’a difarenzha tra ’a scrivania de l’uficio e ’e spese pa arare e semenare sti canpi da dopo far trebiare e véndare el prodoto co tanto de partita IVA e senzha contributi agrari, visto che a cunti fati no ’a garìa fato gnanca pata, ’a ghi ’i ga fitài a na cooperativa de tosati che produse roba bio, tegnéndose però on bon orto pa sfogare ’a voja de police verde.
Tenpo fà ’a ga cronpà on gàeo e tre gaine-tre ché, se ’e fusse stàe coatro, ’a sarìa stà ’na disfata parché ’e garìa fato massa uvi, dato che ’e ze de coée maron, ovaròe, tute ossi e on ovo al dì, che dopo du ani de sfrutamento, inte i alevaminti ’e gnen mazenàe co pene e tuto pa far mangime.
Visto che ’a sta rente el barujo de russe drio l’àrzare de ’a Brenta, ghe go racomandà de fare on punaro co rete ben saldàe da no far passare ’e volpe e de destirarghe ’torno de ’a sabia pa védare se a ’a matina ghe ze ’e so peche, ché caso mai se provedarà.
A i ultimi de jenaro ’a me teéfona che ’a ga na gaina che fa cocò-cocò-cocò:
“Cossa gàea?”
“’A ga che ’a ze cioca, tanto fora stajon, ma mi de chee gainete là me fido poco! Intanto, se te vui, métea coare inte na zhesta co tanto fen o rizhi fini e co diese uvi al massimo ché ’a ze tanto pocheta de corpo e de pene…” e ’vanti a contarghe, ’ndando pescare inte i me ricordi de pi de sessanta ani fà, coando che da bocia, in majo, ghea da ’ndarghe drio a ’e cioche e a ’a pita drio coare in càneva.
Come intervàeo de ’e lezhion par casa, tiravo-sù ’a cioca e ’a pita co maniera, ciapàndoe pa l’ataco de ’e ae e ghe passava na man par soto che no ’e ghesse uvi inte ’e zhate. Po’, una a ’a volta, ’e portavo in medo ’a corte, indove che ’e magnava erba e sassiti, fazendo i so bisogni de na spuzha terìbie. Intanto inte i bussoeoti, a portata de beco drento ’e zheste, a uno ghe canbiavo l’acoa e chealtro ’o inpienavo de grandòeo, tritèo e semenzhe de scóe che metìimo via d’inverno pa ste ocasion. Dopo on coarto de ora ’e tornava coare senzha bisogno de pararle-sù e, prima de tuto,’e tirava in centro de ’a coà i uvi che jera pi fora pa scaldarli tuti goaivi. A metà del tenpo de ’a còa, me mama spirava i uvi e ’a trazéa via quìi ciari. A vinti dì, e anca ’l dì dopo, i puldini tacava spizhuire ’a sgussa e, cu i vegnéa fora tuti moji, ’a cioca se i tirava soto ’e pene pa sugarli e ’a magnava ’e sgusse (puro carbonato de calcio) che a éa ghe ocoréa.
Pa on par de dì nu i ghea bisogno de gnente e i se ’assava ciapare in man senzha paura, ma me mama metéa tuta ’a fameja soto ’a criòea co on piato de farina dàea bagnà e so mare, s-ciochedando, ’i ciamava tacar magnare ’a prima volta.
Capitava anca, senpre de majo, che saltasse fora da in medo ’e tante tàtare de ’a barchessa, na cioca che se ghea rangià coare i so uvi da éa sòea. Magra-inpicà, feroce e veénosa, ’a caminava decisa so l’albiòeo del magnare de chealtre gaine che ghe girava a ’e larghe, gàeo conpreso, tiràndose drio na diesena de puldini spaìseghi e da corsa che ghe voéa tenpo che i tornasse normài. Mi e me mama no ghemo mai capìo come che ’a fesse vìvare vinti dì senzha mai s-ciochedare e vegner basso de dì, magnando cossa e coando.
“Ma ’lora, se te sè tute ste robe, te dovarissi fare l’alevatore pa ’l to consumo ché dopo te ne inviti anca noaltri, no!”
“Gnente da fare, mia cara! A parte ’l fato che ’torno casa go amizhi che me dà uvi e me vende poeastri speciài, prunti da cusinare, mi garìa tuto: punaro, sarajo, tera pa produrghe ’l mangime e cultura materiàe. Me manca però el bàrbaro corajo de tiraghe el còeo a bestiòe che me conosse, che me gnen su pa i pìe co ’e mòeo, che me ciama a ’a so maniera cò ’e me vede, che sa inparare soeuzhion che no ’e se desméntega pi, che sa catarse ’a so erba come dieta pa no ingrassarse massa. No posso e basta! Non possumus!”
Ultime notissie: ’a Giusi me ga ’pena teefonà che i uvi ga tacà spizhuirse! No garìa mai pensà co sto fredo! Varda ti ’a Natura!

[torna sopra]