Da Lendinara (RO)

Storie a i quatro venti

Mojeca ca pare un ciondolo da sfogiare… a confonto co quele… de na volta.

Na sèna a i quatro venti che se vede senpre manco…

Le famose pèze longhe e stréte…

Me xe capità par caso da védare uno de i tanti trapeli de uso comune, rivedù da l'estro de i "designer" e cioè la mojeca par tacare i pani fata a forma de barbastrejo, de pàpera, de fiore, de nota musicale o ca pare un cióndolo da sfogiare sora el decoltè. Destirare el bugà – ma anca e forse ancora mèjo co le mojeche normali – xe na facenda seria che, se fata ben, la fa sparagnare fadighe inte la stiradura.
’Desso semo senpre de corsa e no' ghe femo caso, in più in tante fameje xe rivà la màchina ca suga in maniera inteligente da la quale se tira fòra i pani sechi e quasi senza stronfagnadure.
Senpre manco, difàti, se vede par le strade i festoni de tante forme e colori ca se lassa carezare e scorlare dal vento, ca ne inpiza ancora l'imaginazion de i disegni infantili dove che, da i fili tirà, pendeva ogni sorta de pani tacà a gigantesche mojeche.
Sempre manco vedemo abitudini e fisionomie familiari sbandierà a i quatro venti grazie anca a i moderni “stendini” ca mucia tuto e ca ciapa poco posto in casa e fora.
In tenpi passà go ’vu modo de sperimentare de riflesso la conpetizion tra comari vizìne de casa, senpre preocupà del giudizio del prossimo che poco ghe intaressava de chi gaveva la sotoveste più provocante o i calzeti più novi o, ancora e soratuto, chi ca gaveva i nizoli più bianchi parchè el bianco xe senpre stà sinonimo de neto e prova de la bravura de la massara. E pian pianin, come senpre càpita, a riva i ricordi ligà a sti pensieri sora argomenti lezièri, ma ca testimonia i canbiamenti de le nove generazion che ga rivoluzionà tante abitudini tra le quali el modo de vestire, a scominziare da l’intimo.
Parlando de robe de zinquant'ani fà, xe stà propio un stock de slipini de pizo rossi e neri, in bela mostra inte la corte de la Elvira, a farghe magnare la foja a i vizìni de casa, curiosi come le pàssare palugane. So marì el jera tifoso sfegatà de l'Inter e dunque, pensava i malpensanti, no' jera zerto par incorajarlo inte la difìzile inpresa del gol la sielta de ’na mudanda cussì sfaciata che gnancora se vedeva in giro come a i tenpi moderni. In più la Elvira la jera un donon de quasi dó metri, de poche parole e da i modi ruspiosi; anca se la gaveva senpre la boca inpiturìa nissuno gavarìa imaginà che soto a i vestiti senza forme la scondesse sti gajardeti aversari… Fatostà che el marì el gaveva poca voja de far ben; volentieri el ghe dava dentro co ’l nero e co ’l bianco e in casa ghe jera dó fioleti ca cresseva e che la Elvira mantegneva e tirava sù a la mèjo. Senza farse i fati sui, entrando in particolari, podemo dire che ’sta dona la ga lassà un bel ricordo a tanti mas-ceti de na generazion ormai sparìa par età e che i fioli, grandi da un bel tòco, i xe esenpi de onestà e virtù.
Senpre a riguardo de i pani altrui e de le lenguaze ca taja e ca cuse, me vien in mente naltro fato de pareci ani indrìo. Quando che i confinanti de orto i s'à incorto che la sposina e mamina fresca no' la inpiniva più i fili co' i ciripà – le famose pèze longhe e strete ca se dopiava e ligava intorno a la vita del putin par rancurare i bisogni – i ga dà de la scansafadighe e spendaciona par aver sielto la soluzion comoda ma dispendiosa de i panolini ca se buta via…
L'altro giorno passando a piè davanti a la casa de na vecia amiga de gioventù ca no' vedo in giro da ’na vita, go butà l'ocio sora dó bele e pesanti traponte ca incurvava el filo. Le gaveva un bon profumo de fresco e de primavera e me son domandà come che la ga fato a farle stare dentro a la lavatrice, siben una a la volta, parchè inte la mia che la tien un bel carico no' la ghe stà, ma forse, me son dìta, le jera lì solo a sugarse e le xe stà lavà da la lavanderia. Subito go spanpanà a i quatro venti sto pensiero, na s-cianta petégolo, inutile e cussì – finalmente – lezièro…

[torna sopra]