|
Editoriale
L’istà no l’è conpagna par tuti!
L’istà la riva par conto soo, ma non tuti gavarà i benefici de la stajon de le vacanze al mare, al lago, a i monti o del stravacarse a l’onbra... de la Tore de Pisa. Mia tuti podarà nare al Gargano o in Vale Aurina…
Vivaremo dó volte male e no cataremo rechie, se no se metaremo in testa de ciapare quelo che vien: fredo, vento, piova, caldo, schei o solo le quatro petenele che no te poi gnanca far balare l’orso, e de contentarse de quelo che ghemo.
Se el core bate regolare, i polmoni respira ben e i piè te fa caminare, no bisogna butare via quelo che ne vien regalà da la vita! Xe ciaro che la bona stajon, dopo el laoro de on ano, la te porta a sognare de navigare per “mari mai visti”, quando poco dopo, el becon de na sginzala el te sveja e te te cati… t’on lago de sudore.
Se le robe le podesse nare come sarìa giusto, visto che co ’l caldo xe fadiga stare in casa, laorare, studiare, respirare, dormire, se dovarìa poder nare tuti in zerca de fresco e de riposo. In teoria sì, ma ne la pratica?
La pandemia de chel bao che da pi de dó ani ne ga portà disgrazie e sacrifici che no desmentegaremo mai, el ga verto le porte al mostro de la guera che la ne ga infetà con paure, preocupazion, batarele de core e na confusion de idee che no se capisse come la narà finire, anca se xe za tri mesi che, có te vè tòre el pan o te vè a botega o a fare benzina par la màchina… a se scominzia a preocuparse e a pensare a cossa faremo se se smorza la luce o la fiama del fornelo a gas!
Stando cussì le robe, aumenta el ris-cio de tenpi pezo de quei che ghemo oncò. E ’lora taca i avilimenti, le delusion, la depression, el sangue amaro… come se se sentìssimo tradìi da “Chi ne ga dà la vita” e no ’l ga previsto che l’omo no xe fato de fero…
Ma qua a sbaliemo, parché no xe colpa del “Paron” se l’omo invelena l’aria, el fa aumentare el riscaldamento del clima terestre, el fa desfare i giazzi eterni, el fa morire le bestie, i mari, le piante… e el fa la guera a la pace.
Cussì l’istà, purtropo, no la rivarà par tuti te la stessa maniera. Ghe sarà chi restarà blocà in casa, sarà sù te la morsa de la solitudine e no catarà la forza par rónpare el muro che lo separa dal mondo che core senpre piasse in pressa… Ghe sarà chi farà parte de i “nuovi poveri” e ghe tocarà nar magnare a la mensa de la Caritas, parché fasendo i conti del mese, no ghe resta un sisin par farse on pasto in casa e tanto manco na vacanza…
Ghe xe chi che xe stà colpìo da na malatìa e, anca se el xe fora de l’ospedale, no l’è ne le condizion de nare in mezo a la gente… Ghe xe chi xe condanà te on leto, circondà da òmani e done in càmise bianco, che no i xe camerieri de albergo a quatro stele… E ghe xe chi ga ofeso la lege e el se cata al fresco… te na bojosa.
Come se vede, anca la palanca estiva la ga dó face: testa e crose, come tute st’altre stajon. Solo che no semo de fronte al scheo che on arbitro de calcio el buta in aria, par far sèliare a i capitani de le squadre la zona del canpo de destra o de sinistra. Qua no se pol sèliare: bisogna saver… zugare ben nel canpo de la vita che ne xe tocà.
No serve fare confronti o rinpianzare l’istà de i ani prima, parchè la roa del mulin del tenpo la gira, la gira senza mai fermarse e la màsena tuto e tuti.
E ghe xe chi, purtropo, a cico-cico co l’istà drio rivare, pianze la pèrdita del conpagno de la so vita, la mojere Franca, del popà e del nono.
Se riferimo a uno de la nostra fameja de Quatro Ciàcoe: l’amico prof. UMERTO MARINELLO, che el 7 del giugno, ne ga lassà par senpre. A dissenbre de l’ano passà el ne gavéa avisà che no ’l podéa pi èssare de i nostri, a causa de na so malatìa.
Jera pareci ani che, in ocasion de l’incontro de i colaboratori de l’8 dissenbre, no ’l jera presente par motivi culturali, essendo segretario del Gruppo Artisti della Saccisica, che in chel giorno el presentava l’Antologia de poesia, ma la pagina 13 de Q.C. portava senpre el so contributo.
’Desso se auguremo che el possa continuare dal celo a tegnere vivo el so legame de amicizia con la rivista e con noantri.
A la fameja del caro Umberto le condolianze da parte de la Redassion.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L’istà no l’è conpagna par tuti!
L’istà la riva par conto soo, ma non tuti gavarà i benefici de la stajon de le vacanze al mare, al lago, a i monti o del stravacarse a l’onbra... de la Tore de Pisa. Mia tuti podarà nare al Gargano o in Vale Aurina…
de Mario Sileno Klein
|
