Da la Lessinia Centrale (VR)

Coatro passi par la Lessinia

Camino sù e zo par stradele e senteri e rivo a la ceseta de San Bortolo.

Eco i “Trombini” de San Bortolo: i ten viva na vecia tradision del paese.

El par che lì nassa la pace, lì, nel silensio de nantra bela ceseta.

L’è istà! Far coatro passi par la Lessinia, no’ l’è mai cosa storta. Cossì, decido de nar a San Bortolo de le Montagne, ’n paese storico, a est de la nostra Lessinia. Belo, no’ solo par el panorama, ma par la storia religiosa, ’pena passà, che ’l par che la sia lì che la te speta.
Subito, fin da i primi passi, te senti l’aria fresca, te te senti ben, pien de oja de caminar: de vedar, de coriosar e de pasturar coela oja sconta de goardar e de saer!
Gnanca a farlo aposta, cato subito ’n me vecio amigo, de coan’ studiàemo par deventar infermieri. El me dise che l’è uno de i “Trombini”, che ’l vive lì, e cossì ’l me conta de ’sto bel grupo che i ga la passion tel tegner viva la storia de i Tronbini de San Bortolo.
Lo saludo e camino sù e zo par stradele e senteri, traèrso prè, goardo le montagne che ghè a nord, lì te vivi tuto el grupo del Carega. Pi te camini, pi te cati: capitèi, crose, cesete, piture su i muri e tanta e tanta belessa.
Vivo, come no’ éa mai vissù, la oja de caminar e nel stesso tenpo, la oja de fermarme par védare ben tuto coel che me gira atorno. El cel el par che ’l me varda, coalche nebiola la scrimaja ne l’azuro. E dopo ’n po’ da la vergona la se consuma e la sparisse.
Alora, mi vao, camino fra storie de vita che no’ vol morir e, par fortuna ghè gente che no’ i lassa nar a remengo tanta e tanta nostra storia e fra sta gente, ghè anca i artisti, come coel pitor che vedo ’n mèso al prà, e che ’l par che no ’l veda altro che la belessa da fermar lì su na bela tela, anca parché, de mi, no ’l se ne acorse che ghe passo arente!

[torna sopra]