Da Verona

E zo aqua!

L’aqua l’è mèjo de na medissina.

Se pol dir che chi fa vita sedentaria l’è ben che ’l beva 9 biceri d’aqua al giorno…

El Covid el spanpana i so bisseti…

La me amiga ghe sa caro passar a saludar me mama che no la vede da prima del Covid. La ghè tacà come se la fusse la sua, de mama.
Quan che l’à sentìo che l’avéa ciapà anca ela sta malora, la s’avéa preucupà assè e la me telefonàa tuti i giorni par sentir come la staséa. Rivemo a casa vecia e catemo là anca me neoda, quela co la fiola sbetegheta.
La picenina la se gode star da so bisnona parché la pol zugar co i fili, uce, spilini, metro, dial, sbrìndole de so ‘nona vecia’ (la le ciama cosita), che l’à fato la sarta na mota de tenpo, e fin a 95 ani, adesso la ghe n’à 96, l’à poncià, cusìo, taconà, streto, slargà, slongà, scurtà par tuta la so tribù. Tre done che ciàcola e na petoleta che zuga a far la stilista de moda.
La regina madre, l’è el soranome de me mama che l’è nata el istesso giorno, mese, ano de la famosa Elisabetta, l’è bona come un tòco de pan, basta no dirghe de ber tanto, come el ga ordinà el dotor.
Me neoda la prepara el tè ma no ghè verso che me mama la de buta zo un gossin.
La me amiga alora la parte co i so consili:
“Bison che la béa, Francesca, i le racomanda tuti i dotori. L’aqua l’è mèjo de na medissina. La fa bon par ci ga dificoltà a nar in bagno e la funsiona come resta par ci ghe va massa, la va ben par ci ga el diabete, par ci sofre de rèumi, de asma, de mal de cor, par molificar la tosse, el catar, prima e dopo le operassioni e dopo che i t’à cavà el sangue par farde de nóo.
Parfin l’oculista el m’à dito che go i oci senpre rossi parché beo massa poco.
Secondo el me ortopèdico m’è vegnùo l’àluce valgo e el deolin varo parché ò tegnùo poco umidificà le buele, cosita ga tolto da dir anca i ossi.
El me omo l’è stà da la nutrissionista par sercar de butar zo un fià de pansa e ela, dopo averghe ordinà na bela dieta studià aposta par lu e messo in scarsela 100 euri, la ga ordinà anca de ber tanta aqua, forsi par negarghe dentro la fame.”
Parole al vento che a me mama le ghe va dentro da na recia e fora da quel’altra, ansi, le se ferma su l’oridel de l’entrata parché ghè el passagio stupà dato che la ghe sente poco gnente.
La me amiga la canbia argomento e la parla del virus. “Na bela sassinada! Ne catemo dopo du ani e mezo difarenti da prima che el scominsiesse a spanpanar i so bisseti. Mi, par esenpio, stao ben solo a casa mia. No me conpro più gnente da vestir, no me truco più, me son vacà la musarola e ela la s’à vendicà franfugnàndome la pele…”
La striosseta, sentà par tera e invià a vestir na pueta, la salta fora e la ghe dise: “Cara, se te avessi ’scoltà i dotori e beùo tanta aqua anca ti, invesse de le ràpole te gavaressi la facia bela destirà!”

[torna sopra]