|
Editoriale
Sto Diluvio? Tuta colpa nostra!
La storia se ripete: l'aluvion del sècolo distruge mezo mondo. E 'desso, spetemo l'arcobalen o se preparemo al pezo?
 |
| ...e dapartuto comanda l'aqua. (foto R. Carraro) |
El "tormentone" estivo, st'ano, el xe stà pitosto longo e grando. Semo stà tuti inpressionà, e in qualche parte del Vèneto anca colpìi, dal cataclisma che s'à roversà su quasi tuta la Tera, fasendo dani enormi, come na guera mondiale, co tanti morti da no savere gnanca 'desso quanti che i xe stà.
El disastro, spià da l'ocio de la television, lo ghemo vudo 'dosso tuti i giorni. Davero un maltenpo senza frontiere: prima qua in Italia del Nord, Piemonte, Lombardia, Liguria, Vèneto, Friuli; dopo ne la repùblica Ceca, ne la Slovachìa, in Ungherìa, Germania, Austria... Gnente de mèjo in Asia, in America. I fiumi in piena, l'Elba, el Danubio, la Moldava i ga roto i àrgini, le aque le xe nà a spasso dove ghe ga parso e piasso par paesi e cità, le ga visità musèi, ospedài, ricòvari, ciese, case, fàbriche, piasse, giardini, canpagne; le xe deventà parone spòtiche de l'anbiente, portando via tuto quelo che le ga incontrà so la so strada, conpresi òmeni, done, putini. Na bestia feroce scapà da la gabia!
No xe la prima volta che 'l càpita - ghe xe testimonianza del primo disastro ecològico 'ncora nel 3° milenio avanti Cristo - ma sta volta la paura xe stà tanta, parché se ga l'inpression che la catàstrofe... no la sia piovù dal cielo come na punizion del Signore, ma la sia nata proprio qua so sta Tera. On poco a la volta, l'omo l'è riussìo a métare da parte Dio e quindi el s'à sentìo lìbero de fare e desfare, iludéndose de dominare la natura, de métarla in cadene, al servizio del progresso, del consumismo, de la qualità de la vita. No 'l ga badà a gnente, tajando àlbari, foreste, brusando boschi, inquinando fiumi, laghi e mari, scaldando l'aria fasendo esperimenti nucleari, desfando giazi, roersando tere, scadenando finimondi e guere.
Conossemo tuti el deto "Dio perdona senpre, l'omo qualche volta, la natura mai". Ècone qua: la natura xe deventà mata, la ga perso la testa, la ga spacà le cadene, la ga tacà a semenare distruzion e terore, quasi disendo a l'omo: "Basta! Dove vuto rivare?" Na domanda soratuto a l'omo ocidentale, quelo che no ga gnancora capìo che no se pole parlare de progresso fin che i beni e le richesse le sta tute da na parte, quelo che ga a disposizion du etòlitri de aqua al giorno e el resto del mondo el ghe n'à solo du goti. On squilibrio che la natura ga deciso de troncare. E 'lora eco cataclismi, inondazion e distruzion. E no ocore nare a Praga, a Berlino, a Budapest, a La Ventilla, a Tokio, in Iran o ne le Filipine a védare parcossa i fiumi e i mari no i xe pi boni de star calmi. Basta vardare le nostre cità, i nostri paesi. Dove xei nà a finire i fossi e i scoli, le passaje, le file de àlbari che interonpéa le distese infinite de canpi? Al so posto: tonbini, sfalto, cemento, piste par bici, marciapiè, edilizia urbana ligà al profito...
Quando vien a mancare l'umiltà, la prudenza, la precauzion, el riconossimento de i bisogni de i altri, el sacro timore de Dio, se comete on pecato de superbia e, quando manco te te lo speti, riva 'l conto da pagare, e anca pitosto salà. Tuto questo serviralo a calcossa o ghemo da prepararse al pezo?
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Otobre:
Editoriale
Sto Diluvio? Tuta colpa nostra!
La storia se ripete: l'aluvion del sècolo distruge mezo mondo. E 'desso, spetemo l'arcobalen o se preparemo al pezo?
de Mario Klein
Da Belun
Có se 'ndéa al mar
de Biancamaria De Vecchi
|
