|
Da Belun
Có se 'ndéa al mar
 |
| ...dopo aver mes al costumin... an capelin che l'era uguale par tute... |
A oto ani no avée mai vist al mar. Sicome avée le adenoidi an cin ingrossade, che no senpre me permetéa la respirazion co 'l nas, me mama l'avéa deciso de mandarme in colonia.
Par tre ani de sèguito ghe son andada: la prima olta al Cavallino de Venezia, la seconda al Lido de Venezia e la terza a Sottomarina de Chioggia.
Ricorde che la prima olta che me mama la me l'à dit, me gnea da piànder: lassar, anca par poc tenp, la casa, i posti familiari e soratut me mama, me emozionéa e me rendéa inquieta, me fea paura l'ignoto. Me sarìe catada da sola in medo a tanta dent sconossuda, senza poder ricórer a me mama in caso de bison-c; questo me angossiéa.
Me mama l'avéa avest al so da far a siglar tuta la biancherìa e quel che me sarìe portada drio, ma ghe avéa cognest zercar de convìnzerme: "Te catarà tante amighete, te dugarà co la sabia, e po', al mar, l'é bel! Se te a bison-c de calcossa, ghe n'é le vigilatrici e ghe n'é anca la signora Ema che la cognos ben al papà. Par scrìverme te pol parlar co ela... e conpòrtete ben!"
Son partida senza làgreme e durante al viaio, l'é gnest fora la me vera natura: la curiosità e al desiderio de osservar. Dal finestrin de la coriera vedée scórer paesagi senpre diversi e senpre novi, che me inpienìa i oci... e intant me son catada te la colonia! L'era na scola granda, circondada da 'n parco co tante piante e panchine, e là drento i ne à diviso in squadre: no ghe n'era fra tute ste tosatele una che cognossesse, le gnea tute da vari paesi de la provincia. La me camerata l'era an stanzon, grant anca quel, e l'avéa drento almanco quìndese let a castel...
I me ricoardi i se s-ciaris par via de la monotonìa de quei dì tuti uguali, fora che 'l primo, quando ò vist finalmente al mar. Se era partide in fila, ben inquadrade, dopo aver mes al costumin, al traverson e an capelin che l'era uguale par tute; la strada l'era curta, piena de sabia e, se no se alzéa ben i pié, ne conpagnéa an nuvolon de pólver. La spiaia, riparada da na duna co alte erbe de mar, no l'era afolada, ma noi se avéa al nostro posto recintà, co 'n onbrelon par squadra.
E al mar?... Al mar l'avea an color a sfumature diverse: blu scur lontan, puntegià da barche a vela colorade; pi ciaro a riva, co la s-ciuma bianca de le onde che le fea senpre al stesso rumor rìtmico: c-sss, c-sss.
Sarìe coresta de slancio a bagnarme i pié, ma no l'era permesso!...
Se fea na passegiata longo la riva e po' sot al nostro onbrelon!
Sta s-ciapada de tosatele, strete come i sant te le madaie, fracada te l'onbrìa, par no scotarse massa, la ciacoléa e la dughéa co la sabia...
I primi dì mi ere incuriosida, in sèguito an cin anoiada; no i ne insegnéa a nodar e al bagno al duréa senpre poc!
An dì avée ciapà fursi pi sol del sòlito e la sera me ere indormenzada sùbito. A la matina me son sveiada col cussin e i niziói inbonbadi de sangue, che l'avéa iozà parfin te 'l let de quela de sot! Sta forma de "epistassi", frequente te i banbini, la me a costreto a star te'l parco de la colonia an per de dì al riparo dal sol, però me ere divertida de pi che te la spiaia. La doménega l'era gnest me papà a trovarme e me son emozionada e l'ò abrazà: al me à conpagnà te 'l paese (e drio avé vist la laguna) a vardar le bancarele e al me à conprà na banboleta (no ghe n'avée una!!), de quele co braz e ganbe de peza e paia, ma co an viset che me paréa bel e l'era bionda. Ere stada felice quel dì, anca parché 'l papà al me avea dit che no manchéa tant tenp par tornar a casa. Te i dì de tenp ventoso o piovoso se stea te la colonia e se inparéa filastroche e canzoncine, che ricorde ancora ades, da recitar e cantar l'ùltimo dì. Le avée inparade a menadet e volée èsser selta anca mi, ma fursi no ere tra le... bele!L'an sucessivo son stada al Lido de Venezia e par vigilatrice avée na me cugina: sto fato al me avea resa tranquila e al periodo l'é stat pi bel de quel de l'an prima. Da la scola andé che se era a la spiaia se fea an percorso in autobus che l'andéa su e do par i pont. Al bel l'era parché tute fracade, se spetéa al momento che se rivéa te la zima del pont e po se avea na sensazion de vodo, co scominziéa la dissesa: alora l'era an boato e tut a zigar. Smontade da l'autobus se fea na strada in medo a bei alberghi e boteghe e spes podée ciorme al gelato...
A Chioggia inveze la scola l'era in medo a le cal e ai canài e l'avea an cortivo cuert da na pèrgola de vide: là sot ghe n'era le tavolate. Se partìa a pié par ragiunger Sottomarina e la strada l'era ben longa! Tute in fila come soldatin, te 'l trato che unis la cità a la zona de la spiaia se cantéa "Pierino esploratore" a vose piena e sodisfate de farse sentir.
La me vigilatrice l'era deliziosa e qualche olta la vede ancora ades, bela quasi come alora.
Al mar al me piase anca ades, ma sol par l'efeto benefico che l'à su la me salute e al trove delizioso sol che te le prime ore de la matina quando che se se trova in... quatro gat a respirar l'aria pura e tut l'é ancora tranquilo...
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Otobre:
Editoriale
Sto Diluvio? Tuta colpa nostra!
La storia se ripete: l'aluvion del sècolo distruge mezo mondo. E 'desso, spetemo l'arcobalen o se preparemo al pezo?
de Mario Klein
Da Belun
Có se 'ndéa al mar
de Biancamaria De Vecchi
|
