|
Da la Marca
L'"ombralonga"
 |
| Punto de ristoro a l'"ombralonga" 2001. |
Da 'na diesina de ani in qua la stajon autunal de le feste no la se conclude pi solo che co le Fiere de San Luca a la fine de otobre a Treviso, ma la ga 'na coa co la manifestassion enogastronòmica de la "ombralonga" che atira in çità turisti e visitatori anca da le region confinanti. 'Sta manifestassion la xe nata nel 1974 quando che se jera in piena crisi energètica e le auto no podéa circolar de doménega e la zente no savéa come passar le so giornàe festive. El cìrcolo ricreativo de i ospedalieri a la prima doménega de primavera el ga organizà par i soci e le so fameje 'na passegiata drio el Sil, par star insieme in alegrìa e far qualcossa de bon, racoliendo par i disàbili de le oferte in canbio de le onbre de vin che vegnéa distribuìe ai partecipanti ne i punti de ristoro, frasche scajonàe drio el percorso co damigiane piene de bon vin. Sicome che l'ano precedente ghe jera stà in Val di Fiemme la prima "marcialonga" ispirada a la Vasaloppet scandinava, i organizadori i ga pensà ben de darghe a la scanpagnada da 'na frasca a l'altra el nome de "ombralonga", sensa imaginar che l'ano dopo sarìa stà la volta de la "vogalonga" de Venessia e po' de le varie "skirollonga" e "maialonga" e "pedalonga".
Finìa la crisi petrolifera e l'austerità de doménega anca l'ombralonga la xe stada sospesa, ma a l'inissio de i ani '90 un grupo de amiçi el ga deciso de rinverdir 'sta tradission e l'"ombralonga" la xe stada spostada da la primavera a l'autuno e da la perifarìa al centro de la çità, co varie manifestassion e inissiative colaterali, come concerti e recite.
Cronpando un bilieto cumulativo se riceve un goto special da portar tacà al colo, 'na traversa par no maciarse e un pass par consumassion lìquide e sòlide presso i locali convensionài, che propone ai festarioli i vìni e i piati tìpici de la cusina trevisana, come pasta e fasiòi, oca rosta col saleno, fortaje co le erbete, faraona co la pevarada e via magnando e soratuto bevendo.
Le ùltime edission le ga avùo un sucesso fenomenal de pùblico che profitava de l'ocasion par védar le mostre de i inpressionisti a Ca' dei Carraresi e l'ano dopo porta novi amiçi nel cuor de la Marca.
[torna sopra]
|
