|
Ieri e ancò (in veronese)
Canbiar proverbi
 |
| "Cerithium defrenatum", De Gregori, "Eocene". |
Ieri piovéa, come al sòlito d'altra parte, cossì sicome tra i me çento e passa passatenpi gh'è anca i fòssili, me son messo a lèzar el libro del Pinna.
El me paese l'è a gnanca trenta chilòmetri da Bolca e cossì son nà a ficar el naso ne l'Eocene (55 milioni de ani fa).
Alora gh'era el mar e la scoliera coralina e, soto, i vulcani i ghe ne faséa straje. Le scoliere, strupando le insenature de la costa, le formava de i pìcoli baçini indò le acoe le era tranquile e sul fondo se depositava de i sedimenti de calcare. Sti baçini i era in comunicazion, anca se difìçile, col mare verto.
La "pessara" de Bolca la corispondéa a una de ste insenature e la gran quantità de fòssili l'è dovù a de i fenòmeni vulcànici da far spaento.
L'eruzion la scaldava le acoe de la costa e la faséa créssar i gas velenosi che ga scancelà ogni forma de vita. Po' se ga creà de le corente che le portava sù i organismi senza vita e la li faséa nar dentro de i baçini indò i se ga deposità, mantegnéndose fin a ancò.
Ben! Credìme o no, me son spaentà parché par via de vulcani gavemo l'Etna che fa el mato e el Strónboli che se ga svejà anca lu, tajando a fete le montagne come el parsuto coto.
Me sbaliarò, ma penso che el Vesuvio el tasarà ancora par poco e dopo el tacarà anca lu a nar fora de testa.
E tute ste montagne e coline che tase da mejari de ani e che i ghe dise vulcani smorzà? Che i tasa par senpre o che i se sveja anca lori un dì o l'altro?
No l'è che a Bolca tornarà ancora el mar? El sarìa còmodo parché lo gavaréssimo rente casa, ma se la "pessara" l'è a mile metri sul livelo del mar, noantri e i nostri paesi de pianura che fine faréssimo?
Qua me par che celo e tera i se staga incanando un fià massa e tuti i dì l'è acoa e inondazion dapartuto, tanto che 'na note me son insognà che stava pareciando 'n'arca te i cantieri navài de Monfalcon. Sora ghe caricava sì de le bestie, ma no massa, e tante bele tose zóene, insieme a la me fameia.
Me son svejà tuto in suor e fora... piovéa a sece roerse.
Ma alora - go pensà - i proverbi de i nostri veci i è nà tuti a farse benedir?! Sto ano go isto, infati, el formento te i canpi assè prima de Nadal e l'era anca zalo.
"Sa te vedi el formento de Nadal, copa el can! Sa 'l formento no te lo vedi, daghe el pan!" dise el proverbio. E sti ùltimi ani bisognarìa copar tuti i cani, parché l'inverno no l'è pi chel! Maché "Gran fredo in genar, formento in granar!": semo rivà a la 'Pifanìa e no semo gnancora nà soto zero.
"A febrareto ogni erba buta fora el so becheto" dise 'n antro proverbio, ma l'erba l'è za tuta fora e no la speta çerto San Valentin par métar fora el dentin!
In giardin me ga za butà le ortensie e le rosare e alora come la metemo? Go visto végner dentro casa i mosconi in genaro e el proverbio el dise: "Quando el moscon camina de genaro, ciapa el rosegoto (la roba vanzà) e métela in granaro!" come dir che la sarà gran dura.
Go visto tenporài in dicenbre e in genaro e anca qua el proverbio el prèdica: "Tenporale de genaro, sa te ghè tre vache, vèndeghene un paro!" "La neve de febraro l'inpina el granaro" e mi me domando quala neve che da ani no la vien gnanca pi in montagna? "Febraro suto, erba dapartuto" ma se seita a piovar dì e note? "'Na bona acoa de febraro, la val piassè de un luamaro!" E alora gavaremo de i gran luamari dapartuto e orti che i sarà 'na maraeja!
La primavera, po', la riva senpre pi tardi e 'l caldo se fa spetar e alora de tuti i proverbi de marzo ghi ne val solo du: "Ci ga legna de marzo, el se la tegna" e "Marzo, ogni mato el va descalzo!"
Le istà i è ormai chele che i è! O piove massa e fa fresco o fa un gran caldo: "Luio dal gran caldo"; "El sole de agosto ingana (brusa) la massara ne l'orto" (l'orto a la massara).
Setenbre no l'è pi chel de 'na olta, "el mese suto che maùra ogni fruto"; 'desso val pi el proverbio che dise: "Se pioe a San Gorgonio, otobre demonio".
Ci va a fonghi, come mi, el sospira l'acoa e el se cata davanti 'na suta tremenda; có no ghe n'è pi bisogno, de piova, la vien zo a sece roerse!
Insoma le stajon le se ga smissià come le carte da trissete: se passa dal fredo al caldo e dal caldo al fredo, senza inacòrzarse pi de la primavera e de l'autuno!
Eco parché la "pessara" de Bolca la me fa tanto pensar e parché me insogno senpre pi spesso i cantieri de Monfalcon!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Marso:
Editoriale
Cara dona, te scrivo...
... parché no sò dove catarte, dove che te stè de casa e cossa che te fè, no sò gnanca parfin chi che te si: par questo, dunque, te scrivo...
de Mario Klein
Sbiansi de Civiltà Contadina
In prestio de brassi
"Un canpo ben arà e consà, un bon santo el s'à catà." Cussì se diséa na volta có se costumava leamare le tere 'ndando...
de Dinerio
Storia Visentina
Le case de na volta
Demo na ociada a queo che ghe gera rento na casa contadina de un paeseto visentin de qualche sècolo fa
de Giordano Dellai
|
