|
Da Rovigo
John Spadon
 |
| (Foto P. Gardin, Villadose) |
Vegnendo casa da Stienta, ignonde ca gèrimo 'ndà a la festa de la Repùblica, mi e Andreini a passemo dopodisnà par raquanti paesini del ferarese. E lu, co 'l so sòlito spìrito de osservazion, el me fa: "Varda che deserto!" "Pàrlito de i àlbari?" "Nò, de i fioi. No ghemo catà gnanca on fiolo par le strade, da Stienta in qua." "Propio dabon - a ghe digo - gnissun ca zoga. I sirà in casa soa a zugare." "A zugare co chi, sa ghe manca i amighi?" E alora a go pensà chi xe tanto missi male, i nostri bòcia. Na olta, có ghe jera el sole, no ghe gera verso ca stìssino in casa: a gèrimo tuti fora a zugare a còrarse drio, a scondajòa, a scalon, a baléte, a cavaleta, a s'ciafeta, a banditi, a marcheto e a balon. E s'à pioveva, a se intanàvino so 'l fenile o in casteonara a zugare a mame o a duturi. Adesso, i nostri putini i ne pare persi, come tanti piòcari, 'pena morta la ciòca. Fin da pìcoli i xe tratà malamente, toléndoghe i fradèi e dàndoghe numi foresti che puòco i se vien co i cognùmi vèneti: e cussì in giro, a se cata (a buto a caso) Giònatan Berton, Samanta Masarin, Margareth Formenton, Bobby Tenan e John Spadon. I parte par la scuola, poarini, senza mai fare du passi a piè, ch 'i no sia quili ca ghe vuole par montare in coriera o in màchina, e carghi de zaini come s'i ghesse da scalare le zime de Lavaredo. E dopo ch 'i ga passà zinque-siè ore sentà su i banchi, i vien casa - smonà e senpre col zaino - e i se ponara, na Gèssica qua, on Màicol de là, in cusina o in tinelo a vardare la television ca ghe inbotisse el zervèo de monade senza costruto.
Insuma, a zugare co luri a ghe resta solo la television, come ca ga scrito sol tema na putina de prima media - ve sicuro de no cuntare bale! - "Anche quest'oggi, io e la mia televisione ci siamo organizzate la giornata. La mia televisione è la mia migliore amica e siamo sempre insieme, anche in camera da letto. La mia televisione ha pianto tanto quando mia mamma è andata a stare col suo nuovo marito e ci ha lasciate sole. E mio papà va a lavorare, e così in casa siamo rimaste noi due sole, io e la mia televisione." Ma no basta che on putin el sia da lu solo, come l'orco. A gh'è anca da dire che andando avanti de sto passo presto a ghe mancarà i zii e i cugini. E le parentele le se farà più strete, de nùmaro intendo: du noni, du genituri e on fioleto: zinque in tuto, come se la piràmide de la vita la se roessasse a ponta in zo. A crèssare de nùmaro se podarà farlo solo divorziando, e cussì el putin el se cata, oltre ai noni da parte de mama o papà, anca i noni procurà dal nuovo papà o da la seconda mama. In te sto caso, a cresse anca la possibilità de zugare co i noni, visto ch 'i dise che deventando veci la zente la torna putina. A sirà par questo, par farghe conpagnìa al nevodeto, che senpre più i veci i se màscara da putini, pituràndose le zeje e restauràndose le ganasse. Ma s'a ghe zontemo el fato che la zente la mete al mondo el so ùnico fiolo da i trenta a i quarant'ani, a vedaremo che in te on sècolo, le generazioni le passarà da quatro a tre: e cussì a sparirà presto anca i noni, e le fameje le deventarà ancora più strete: pare, mare e fiolo. Insuma el destin de l'Italia el xe segnà: aumenta i veci e cala i fiòi. A ne salva solo el fato ca riva i cari albanisi a portarne on fià de gioventù, da far zugare par le strade longo i marciapiè. E intanto luri i se ciapa on franco.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Marso:
Editoriale
Cara dona, te scrivo...
... parché no sò dove catarte, dove che te stè de casa e cossa che te fè, no sò gnanca parfin chi che te si: par questo, dunque, te scrivo...
de Mario Klein
Sbiansi de Civiltà Contadina
In prestio de brassi
"Un canpo ben arà e consà, un bon santo el s'à catà." Cussì se diséa na volta có se costumava leamare le tere 'ndando...
de Dinerio
Storia Visentina
Le case de na volta
Demo na ociada a queo che ghe gera rento na casa contadina de un paeseto visentin de qualche sècolo fa
de Giordano Dellai
|
