|
Da Verona
Pasqua con l'agnel
 |
| Eco la me amica col so butin (a destra), so marì a sinistra e l'altra copia de sposi al centro. |
La me amiga l'è vegnùa a farme i auguri de Pasqua e la m'à contà quel che ghè tocà al bateso de so fiol qualche ano fa. Dato che l'era l'ùnica creatura nata ne la parentà dopo tanti ani e considerà che l'era un bel mas-ceto, i avéa pensà de batesarlo la note de Pasqua e i s'avéa organisè par tenpo, contatando i preti e n'altra copia de sposi che gavéa anca lori piaser de batesar el so butin in ponpa magna.
I pretini, tri e zóini uno piassè de l'altro, i era stè entusiasti de l'idea e na sera sì e una nò i se presentàa a la porta de la me amiga con la scusa de sercar fora le leture, de far le proe de la procission de ingresso in cesa, de preparar i genitori a la celebrassion de 'l Sacramento. I rivàa che i era un pochetin moleti e i partéa dopo un par de ore con i oci lustri par l'entusiasmo e par el vin che ghe tocàa ber par no ofèndar el paron de casa. Man man che passàa i giorni, la fameia la naséa sù de giri. I avéa ciamà el mèio fiorista de la cità parché el fornisse la cesa con garòfoli bianchi e càpole celeste. I avéa tirà fora da la naftalina un conpletin da bateso ricamà diese ani prima da le móneghe de clausura: copri foreton, coertina, vestitin longo da cerimonia e cufieta de organdis bianco ricamè con fioreti rosa e celesti, rifinìi con nastrini de i stessi colori, par poderli doparar anca par na butina. I avéa invidà de largo par el pranso de Pasqua, prenotando par un sentenar de persone a Valegio. De scondon de i preti i avéa anca ordinà un agneleto che dopo i gavaréa regalà a la parochia.
A le siè de 'l Sabo Santo era rivà el pastor da San Pereto a portarghe quel che avaréa dovùo èssar l'agnel e che invesse l'era un pegoroto che (par fortuna) no 'l voléa savèrghene de desmontar da la machina, spaentà da i sighi de la me amiga. L'era fora de ela da 'l pensier de come far a incastrar quel bestion nel sestin fornìo de celeste, che l'avéa preparà con tanta passiensa. Par scurtarla, l'avéa mandà de olta el pastor e el so animal e la gavéa mandà drio so marì parché el serchesse qualcossa de piassè adato a la cerimonia.
Ghe mancàa solo n'ora par nar in cesa e la situassion l'era grave: par l'agitassion ghera vegnùo fora trentaoto de febre, so suocera che la gavéa da aiutarla a vestir el butin la gavéa telefonà che la saréa rivà in ritardo, de so marì gnanca l'onbrìa e in più el picenin el gavéa el cagoto. Quel de Sora, forsi comosso da i so sengioti, nel giro de 'n quarto d'ora l'avéa fato rivar so marì con in brasso un agneleto che el paréa vestìo de bonbaso, con du ocioni lustri lustri. I l'avéa messo ne 'n canton del coridoio e marì e moier insieme i avea canbià par la tersa olta el buteleto che el seitàa piànsar parché l'era tuto rasìo. Anca l'agnelin l'avéa tacà a sbegolar, ma no ghera tenpo da darghe abado. La l'avéa ciapà e ficà de bruto nel sestin. Finalmente i era pronti par partir. Ma da 'ndo vegnéela tuta quela spussa? L'avéa snasà el fiol che, tanto par canbiar, el l'avéa fata n'altra olta, ma l'udor che se sentéa 'torno l'era da voltar ia e no l'era mia colpa del picenin. Butando l'ocio su l'agneleto che el seitàa sbegolar disperà, la s'avéa incorto che l'avéa canbià color, no l'era più belo bianco, ma l'avéa ciapà un colorin cafelate e el spusàa come un vèro. El s'avéa inpienìo de bruto, l'avéa sbrofà el muro darente e sbrodolà el sestin. Parché no la ghe fesse un infarto, so marì el l'avéa mandà a canbiar el picenin fin che lu el ghe faséa el bagno a quel'altra creatura e el sercàa de netar el più grosso da 'l muro. Par el sestin, però, no ghera gnente da far; l'era tuto inbonbegà. Anca se derenè da tuto quel laoro estra i saréa né in lèto, a du minuti da la cerimonia i era su la porta de la cesa par l'ingresso trionfale con el butin bardà come un sioreto che 'l dorméa 'n brasso de so mama e l'agneleto che scuriosàa da 'n plotonsin portà da du chiericheti.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Aprile:
Editoriale
Europa: con o senza Dio?
Le règole de la futura convivenza quasi quasi le xe drio desmentegarse de i valori religiosi de la nostra civiltà. Dove pensemo de rivare?
de Mario Klein
Da Verona
Pasqua con l'agnel
Giacinta Dall'Ora
|
