|
Devossion popolare
L'Aria de Dio
 |
| L'Aria benedetta che tuti respiremo: l'Aria de Dio... |
Sto mese che ghe spalanca le porte a la primavera, anche se le stajon ga perso un fià del so smalto antico, l'è el sòlito fassinaro de santi dal primo a l'ùltimo de i so giorni, e sensa contare la Pasqua. E sicome ogni santo ga el so altare e le so devossion, xe ben che queste no fassa barufa fra de lore, magari solo par invidia, mèjo assarle in pace e parlare de na devossion che gaveva un ùnico apòstolo, ma no un solo devoto: la devossion de l'Aria. Forse la gaveva inventà un imbriago - diseva la zente - o forse un gran poeta de quei che no ga stampà gnente su la carta, parché el ga assà scrite solo ne l'aria le so storie de poesìa, de amore e de vita, e solo quei che gaveva avù la fortuna de sentirle le conosseva.
L'Aria de Dio gera la devossion più grande de Toni Balei, un omo de tante parole e de altretanto savère, uno che incantava la zente ne i marcà e, par vèndare la so crema da scarpe (la pàtina), el tirava in balo el vangelo, i santi, la Madona e tute le storie che ghe passava par la testa, compresa la so devossion particolare: l'Aria de Dio.
Aprile el gera el mese forte par la so assienda, parché se meteva via le scarpe da inverno e bisognava darghe na man de pàtina al curame par tegnerlo mòrbido fin a la pròssima stajon. Naturalmente, solo lu gaveva sotoman e vendeva a un presso miseràbile, in scàtole de lata co l'apertura a scroco, la crema miracolosa che conservava le scarpe come nove, anche par do ani de sèguito se le gera tegnùe al suto e fora da l'aria. E gera proprio a sto punto che el tacava a sproloquiare su l'Aria benedeta che tuti respiremo e nessun vede, nessun ghe pensa, e se va a sercarla solo quando la ne manca par no morire. "Se no ghe fosse l'Aria - el scominsiava, vardàndose torno par tirare l'atension - no ghe sarìa la vita, nessun èssare vivarìa e gnanche el mondo restarìa in piè. Solo sto pensiero povero e nudo come un verme l'è bon de farve capire tuta l'importansa de l'Aria benedeta: l'Aria de Dio. Parché xe stà lu a inventarla, a fabricarla e xe sempre lu a mantegnerla in movimento de dì e de note, de festa e de giorno de lavoro, solo parché el mondo viva, e col mondo anche noialtri, anche Toni Balei, che ga de i fioi da mantegnere.
L'Aria de Dio la xe el sostegno del mondo, la strada de ogni pensiero e de ogni parola: voialtri me sentì parché ghe xe l'aria che ve porta le parole fin dentro a le rece: se no ghe fosse l'aria, mi diventarìa muto e voialtri sordi. L'Aria, quela de Dio, la tien su le nùvole, la tempesta, la porta in giro le semense de le erbe, de i fiori e de le piante de ogni sorte. E dove credìo che se sentarà el Padreterno el giorno del giudissio universale? Sora un cussin de aria come le nùvole, e cussì anche i angeli e tuti i santi che ghe starà torno, quei che sona i pìfari d'oro e quei che canta nel coro celeste, che se ciama cussì parché el ga el colore de l'aria de matina bonora prima che spunta el dì. E sensa contare che ormài semo dentro a la primavera. No sentì quel che gira ne l'aria e va dentro par el naso fin su i polmoni? Sta carga de odori de piante, de tera, de verde, de fiori, de profumi mai sentìi che quasi ne imbriaga come el vin novo, sensa che ghe femo caso. E chi credìo che se toga la briga de cargare sù le corenti de l'aria tuta sta grassia de tesori che se ciama primavera? L'è sempre e solo Lu, el Padreterno, che xe el Dio de tuto e de tuti e anche de l'Aria. Par questo, secondo mi, l'Aria de Dio dovarìa avere, come i santi, la so cesa, la so catedrale e anche la so pala de altare, che sarìa fàssile da disegnare: bastarìa darghe a la tela na man de celeste de diverse gradassion e po' lustrarlo par rèndarlo trasparente, no ve pare? "
A sto punto qualcun se stufava e tajava la corda sensa dar ne l'ocio, ma i più restava incantà da sti discorsi e i comprava la patina par sostegnere un omo de tanto savere, costreto da la sorte a vèndare pàtina par campare. Capitava anche - ma solo qualche volta - che fra i tanti ghe fosse el furbeto che tentava el colpo gobo par farlo confóndare co na domanda a ponta de ago: " Ma anche el temporale xe aria, solo che la porta tempesta e la fa disastri e alora, xela aria de Dio anche quela? "
Ma Toni no se perdeva par cussì poco e replicava, a bòta calda: " Bravo el signor, questa qua sì che la xe na domanda inteligente, lo sa anche i pessi che se i vien fora da l'aqua co l'aria i more, solo che lori no parla. Sicuro. Come ne la natura ghe xe el belo e 'l bruto, el ben e 'l male, el seren e 'l temporale, cussì anche l'aria ga dentro de tuto, ogni belessa più bela e anche el temporale più bruto, che el vien par farne capire, a meso Aria, che semo tanto picenini e che ghe xe Uno che, par fortuna, pensa a far vegnere l'arcobaleno dopo la tempesta, e tuto parte da novo."
La magior parte de la zente restava convinta, i più dondolava la testa in segno de muta aprovassion e de maraveja. Toni Balei gera proprio un genio, incompreso e sprecà a vèndare pàtina da scarpe. Questo solo par dire che anche ne i marcà de un tempo, serti giròvaghi, gera boni de interpretare la vita e parfin l'Aria de Dio, come na devossion da cristiani.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Aprile:
Editoriale
Europa: con o senza Dio?
Le règole de la futura convivenza quasi quasi le xe drio desmentegarse de i valori religiosi de la nostra civiltà. Dove pensemo de rivare?
de Mario Klein
Da Verona
Pasqua con l'agnel
Giacinta Dall'Ora
|
