|
Robe de Ciósa
El ponte de Vigo
 |
| Ponte Vigo a Ciósa. |
I lo ciame "el balcon de la sità". Da in sima se pole gòdare, come da un balcon, un panorama e 'na vista incomparàbile su la laguna, el mare, i Murazzi e, se l'aria xe tèrsa, se pole distìnguare anche el campanile de San Marco de Venessia. A xe el ponte de Vigo, cossì ciamà da "vicus", che in latin vol dire "vico", borgo, perché quelo xe stà el primo "sito" abità de Ciósa. A xe rivà quasi ai 500 ani, ma a se li porte ben, anche se ultimamente l'à dimostrà de i aciachi dovùi a l'età, cossì che adesso i sta provedendo a "curarlo" (ghe n'avarémo fin al 2004).
E a vanta anche un so antenato, naturalmente in legno, no a la so altessa, oviamente, che esisteva adiritura nel 1300 e dove, secondo un cronachista contemporaneo de l'avenimento, un serto Daniele Chinazzo, se ga combatùo el scontro fra Venessiani e Genovesi durante la stòrica guera de Ciósa, proprio sul "ponte di Vigo che sula piaça de Chioça", soto la guida del podestà Pietro Emo (1379).
A xe stà ricostruìo in piera, come che a se vede adesso, nel 1685, nel pien de la guera col Turco, soto el podestà Francesco Morosini, dopo avere abatùo quelo vecio.
Tuto in marmo e armile in piera d'Istria, el ponte xe stà fato pi belo e còmodo nel 1762 quando che a xe stà ornà de fregi e de statue: caraterìstici i quatro lionsini ai àngoli (uno sostien el stema de Ciósa) e i quatro bassorilievi ne la parte centrale che rapresenta sul fianco verso sud l'Anunciassion e su quelo verso nord i Santi Patroni de la sità, San Felisse e San Fortunato, co una làpide sormontà da oto stemi gentilissi, e fissà proprio sóra l'arco che varda verso la laguna. In sta làpide se ricorda i consilieri e i deputati che governava la sità quando che xe stà costruìo el ponte e la data: "1685".
La decorassion marmorea, co balaustre e lionsini, risale invesse al 1762, soto la podestarìa de Girolamo Arnaldi.
Nel 1796, soto el podestà Angelo Memmo IV, sul ponte xe stà montà 'na lanterna co do lumi. Questa, insieme co l'altra sistemà nel Castelo de la Lupa o de San Felisse, gera i soli mezi che podèva garantire la salvessa de tanti infelissi, i pescaori, e "preservare cossì da la desolassion le povere famegie de i òmeni in mare". Infati, sti segnài luminosi i diventava necessari per entrare con sicuressa in porto. La luse de la lanterna del ponte de Vigo se podeva cossì intravédare "passi 5 d'acqua fuori del porto di Malamocco per Ponente e Garbin".
A quel tempo sta bela inissiativa del podestà Memmo xe stà cantà in versi adiritura dal Foscolo, che a gera òspite alora a Ciósa de un so amigo.
El ponte de Vigo xe sta traversà da Garibaldi, quando a xe vegnùo a Ciósa nel 1867 e a xe andà a casa òspite de un patriota ciosòto, so amigo, un serto Tommaso Venturini, che abitava in cale S. Caterina, al de là del ponte, su la riva Vena.
Fin a la fine de l'Otosènto sul ponte de Vigo se metèva de vedeta el cosideto "vigariòlo", un vecio pescaore, che avisteva da lontan l'arivo de i bragossi dal mare; non solo, ma su i so scalini un tempo se sentèva co la so pipa in boca i veci pescaóri ciosòti a vardare el so mare "discorendo del pi e del manco del so mistiero". Sóra del ponte de Vigo, xe passà pi de 'na volta el maestoso Crocefisso in legno de San Doménego, deto el "Cristo dei pescaóri", quando che i lo portèva in procession per el Corso.
Lesionà durante i bombardamenti ne l'ùltima guera, intacà da la salsèdine, a xe stà restaurà nel magio del 1947 e adesso xe in corso, come avemo dito, un'altra... cura ricostituente.
A xe el pi belo de i oto ponti che scavalche el canal Vena, el pi belo architetonicamente, e l'à fato tante volte da sfondo a manifestassion, spessialmente a le rapresentassion de la famosa comedia goldoniana "Le baruffe chiozzotte", ressità da la cognossutissima compagnia teatrale locale "Piccolo Teatro Città di Chioggia", che nel 1947 la ga rapresentà a la presensa de l'on. Palmiro Togliatti, òspite de Ciósa.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Aprile:
Editoriale
Europa: con o senza Dio?
Le règole de la futura convivenza quasi quasi le xe drio desmentegarse de i valori religiosi de la nostra civiltà. Dove pensemo de rivare?
de Mario Klein
Da Verona
Pasqua con l'agnel
Giacinta Dall'Ora
|
