| a cura de Romano Beltramini |
|
"La sguaratà" - Ciàcole polesane
Artidoro
El circo, a Adria, el rivava quasi ogni ano. La gera na festa perché, contornà da giostre, barache, tiri al bersalio e bancheti de dolsi, el prà "de Zanforlin" canbiava siera e, ai do d'agosto, fiera de S. Francesco, i fioi e i grandi gaveva el so gudiolo e desmentegava tute le rogne e disgrassie de l'ano. Giostre e cavài de cartapesta tirà da un cavalo vero ca se inbriagava a forsa de girare e, po, quele co le gabie e a calcinculo, quele co le barchete ca coreva su aqua vera, autopiste, tiri al bersalio col s-ciopo per butar zo le pipe de gesso e vìnsere el simioto per la morosa. Ciucio, caramèi, sùcaro filà, dona canone, bóte de la morte co la moto ca coreva su le pareti, Michelina oto ani sentosinquanta chili, Gina la dona sintila ca faseva inpissare le lanpadine co i ghe le posava in tel corpo. Insoma, na festa ca faseva inboressare tuti, co fioi ca sigava perché ghe gera scapà el balon col filo e mame e papà ca li petufiava perché i ne gera mai contenti.
Ma el centro de tuto gera el circo e, in particolare, quelo de i Caveagna che, co Adria, i gheva un raporto de amicissia consolidà da ani de vìsite, da entusiasmo e aplausi ca sostegneva i artisti per tuto un ano. Co le so trabalanti carovane de legno, meze sgangherà, inpiturà de celeste co na granda scrita in bianco "circo Caveagna", Artidoro, paron de tuto e capostipite, rivava in Adria come se el fusse stà Garibaldi a Teano. Aplausi, strucà de man, pache su le spale da i veci Adrioti ca lo conosseva da na vita. Sto circo gaveva le so balarine, i so piaiassi, i cavai ca girava intorno a la pista a comando, i cani ca stava sù su le sate e, sento altre meraveie. Ma el nùmero più sensassionale gera quelo sul balansin in aria, co Artidoro ca caminava sul filo da na parte a l'altra del circo. Tuti vardava col fià sospeso e, po, aplausi a no finire, co Artidoro, in maieta a righe e mudandoni neri, ca vegneva zo per la pèrtega fin in mezo a la a pista, per ricévere el so segno de gloria. Ben, el fato stòrico, però, che é restà in ti anali de fiera adrioti, gera capità un ano, verso i ùltimi giorni de fiera. El circo gera inpenì in ogni posto. Orchestrina a tuto volume el spetàcolo gera partì al mèio e, proprio in tel mezo del spetàcolo, gera vegnù fora Artidoro Caveagna, co i so bafoni e el so costume da trapessio, portàndose in alto per la sòlita passegiata co la spranga d'equilibrio in man, da na toreta a l'altra. ùltimo rulo de tanburi, pùblico in silensio col fià sospeso e bocia a boca verta e oci in su. Taca la caminà ma, sul più belo, a Artidoro ghe se sbrega i mudandoni proprio in tel mezo, in posission crìtica, lassando vedere ogni grassia... de natura, sensa che el podesse rimediarghe. Gran rìdare del pùblico, done e òmeni fin col singioto e le làgreme ai oci dal rìdare. Mame ca ghe molava patone ai fioi perché no i vardasse, ma sensa otegnere risultato. Artidoro, in silensio, rosso come un peveron che el se gera portà sul terassin oposto a quelo de partensa, liberandose de l'asta, el gera vegnù zo per la pertega fin in mezo al circo, scondéndose, co le man, le ...vergogne e scapando inbarassà in tel retro del circo per canbiarse costume.
Da cla volta el vecio leon l'aveva preferì lassare Adria fora dal giro de i so spetàcoli, tanto el ghe n'eva dà uno straordinario e de memoria, e, lassà el balansin, l'eva preferì lavorare co i paiassi che, ben inpiturà, nissun riconosseva.
El restarà in te la storia de le sagre adriote anca perché, ai Caveagna Adria no gaveva serto tolto la stima e l'afeto per l'inprevisto nùmero del balansin e la considerava ormai, el caro vecio Artidoro, quasi un adrioto de adossion.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Aprile:
Editoriale
Europa: con o senza Dio?
Le règole de la futura convivenza quasi quasi le xe drio desmentegarse de i valori religiosi de la nostra civiltà. Dove pensemo de rivare?
de Mario Klein
Da Verona
Pasqua con l'agnel
Giacinta Dall'Ora
|
