Editoriale

Europa: con o senza Dio?
Le règole de la futura convivenza quasi quasi le xe drio desmentegarse de i valori religiosi de la nostra civiltà. Dove pensemo de rivare?

Càvaghe l'aqua dal bicere che tien in fresca el fiore de la primavera europèa... e sarà sùbito inverno!

No lo sò cossa i gavarà deciso i "paroni de casa", a livelo europèo, quando vegnarà fora sto me scrito. Vedaremo se i gavarà tegnù conto de le preocupazion che xe nate dopo la presentazion del progeto de la "Costituzione europea".
No intendo, so sto argomento, fare discorsi che no me conpete. Vojo solo osservare, proprio in nome de la "cultura e tradission vènete", che el xe un fato grave quelo de aver lassà fora da l'orto la semenza de chel prodoto che in qualche modo fin 'desso ga dà i so boni fruti. Mi capisso che xe senpre manco de moda el "non avrai altro Dio fuori di me", ma pare proprio che se gabia paura del pensiero religioso che, dopo tuto, el xe una de le do "forze motrici" che fa girare el mondo, una de le do sponde che tien incanalà la forza "bruta" de la natura umana.
Prova a cavarghe le regole morali e in princìpi de fede che guida le cossienze, te vedarè quanto presto che se fa a desfare el mondo. I ga un bel dire che la religion la xe l'oppio dei popoli: sarìa pi giusto dire che la xe un freno a la "irrazionalità" de i pòpoli. I milioni de zóvani e de fedeli che core in Piaza San Pietro a scoltare el Papa no i xe certamente drogà e no credo che i sia pezo de quei che va a P.le San Giovanni a scoltare Cofferati. I milioni de putéi che vedemo sfilare in sti giorni co le armi in man, quei sì, poarini, che i xe co la testa a l'amasso!
Xe assurdo ignorare la necessità naturale de la religion ne la vita de l'omo e xe assurdo no tegnérgane conto quando se vole organizare la so vita. Prova cavarghe el tapo a na botilia de vin e lassarlo là che 'l ciapa aria: te bevarè asedo! Prova cavarghe el machinista a na locomotiva in corsa e te vedarè cossa che ghe sucedarà al treno. Càvaghe a l'omo l'idea de un Èssere Supremo e te vedarè de cossa el sarà capace. Questo par dire che no se pole tirar sù na casa, senza tegner conto del tipo de fondazion che ghe ocore.
Xe fondamentale, quindi, che el progeto de la Casa-Europa el tegna conto de le orìgini cristiane de i europèi.
E che no se diga che questo xe contro i diriti de i "nuovi ospiti" che ne riva in casa ogni giorno, parché senò ga reson quei che sostiene che no semo pi paroni in casa nostra! Xe
proprio desmentegàndose de sto fato che se fa créssare el razismo, chela bruta bestia che proprio qua in Europa la ga consumà uno de i più grandi deliti de
l'umanità.
Se no canbia el progeto de la "Costituzione europea", presentà da Valéry Giscard d'Estaing, deventa proverbio profètico el deto "qua no ghe xe pi religion" e sarà inùtile votarse a qualche santo, parché avanti de sto passo, podarìa tornare de atualità le cataconbe.

PAR STA PASQUA 2003 REGALÉMOSE UN SORISO E NA SPERANSA

[torna sopra]