|
Editoriale
Un monumento a la mama
Viva nel ricordo de tuti, inmortalà ne l'arte, presente ne la vita de ogni giorno: parché no farghe un monumento?
"Mama, mama,/ chi la ga la ciama/ e chi no la ga, se la brama", rècita un vecio proverbio che fiorìa su la boca de i veneziani. Oh, se xe vèro! No passa giorno che la mente no la ghe bata in coste: sia che la ghe sia 'ncora e sia che la siora Betina la se la gavia portà via.
No ghe xe esperienza o canbiamento de costumi, no ghe xe lege o costumanza che possa canbiare o cancelare el ruolo esclusivo e fondamentale de la mama.
Senza de ela no ghe sarìa vita umana su la tera, no ghe sarìa continuazion de la specie: la tera deventarìa na roscara, prima de trasformarse in te un deserto de tipo lunare. Sto bruto pensiero dovarìa un fià
spaventarne e un poco svejarne fora, o se non altro farne nàssare un sentimento de gratitùdine verso quela grande figura de dona che xe nostra mama e, pi in generale, la mama, l'eroina de tuti i tenpi.
Ma, vuto dirme che la mama no la se meritarìa un monumento?
Se ghemo vuo el corajo de fàrghelo a la lupa, al pescadore, al coridore, a la pagnoca del fromenton, a Pinochio... no dovarìssimo sentire el bisogno de fàrghelo a la mama?
Sarìa belo incontrare sta statua, in bronzo o in piera, al centro del paese, a ricordarne che tuti semo al mondo par mèrito suo, par averne tegnù "tre mesi in sangue, tre mesi in ossi, tre mesi in carne".
E questo xe stà solo el scumissio. Zontémoghe i dolori, i sòni persi, le làgreme versà de scondon, la pena se el fiolo ga butà male, se el mondo o la guera o la droga el ghe lo ga portà via, robà, copà...
Cossa dire de la strage de inocenti che fare no cessare mai in Nigeria, ne la Costa d'Avorio, in Kenya, in Etiopia, in Zaire, in Cecenia, nel Kurdistan, Iraq o Sudan? E cossa dire de chele mame che se consuma nel segreto de la casa a narghe drio a un fiolo handicapà, a un anziano malà, e che vive ogni ora del giorno e de la note la so Via Crucis, senza che i altri i lo sapia?
Come se fa a no sentire un sentimento de conprension, de conforto, de solidarietà e sostegno anca verso chela pora mama che - notizia de pochi giorni fa - dopo 'ver lassà la so creatura 'pena nata su na panchina, la se ga dà da fare par riaverla indrìo?
Nel volto de ogni mama, vecio quanto el mondo, dovemo inparare a lèzarghe la memoria stòrica de l'umanità, la dura lota par vegner fora da la caverna, el difìssile percorso de la civiltà e l'ùnico posto dove catare speranza e corajo par nar vanti.
Cussì, la Madona del mese de majo no la sarà solo quela de i altari e de i capitèi, ma anca quela che xe presente in ogni mama e che mèrita almanco tuta la nostra pi afetuosa devozion.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Majo:
Editoriale
Un monumento a la mama
Viva nel ricordo de tuti, inmortalà ne l'arte, presente ne la vita de ogni giorno: parché no farghe un monumento?
de Mario Klein
Ciàcole Visentine
La sagra de le siarese de Pianesse
A Pianesse, vissin Maròstega, la penùltima doménega de majo de ogni ano, ghe xe la sagra de la siaresa "Sandra"
de Giordano Dellai
|
