|
Da Maran Lagunare (UD)
Nomenanse
Come in tanti paisi de mar anca nantre a Maran vemo un saco de zente che la se porta drio nomenanse. Jera bastò che al vecio Bepi ghe fussi tocò fa l'operassiòn colpa che 'l fumeva, parché 'na volta fora de ospedal vedéndolo co sto lavro spacò de sfòio porato el se gera vantò indrumàn la nomenansa de Porato. Un omo parché in Conpagnia Granda, barufando co so fio soto prova co la so vosata grossa el veva sveiò duti, zac che i lo ga ciamò Bucalòn. Un antro, parché el tigniva senpre i cavìi inpirài par sù, patasgnàchete: no 'l ga gnanca fato tenpo rispirà ch'el se ga sintìo ciamà Cavìi de diàvolo.
In quela volta che de fiòi se ziogheva partìe de bala tra visinài ricordo che Stiaca 'pena fora de scola el me veva lanciò la sfida disendo che le Case Niove le varissi vesto caro bàtesse co 'l visinàl mio de la Fabricà.
"Che fiòi tièn le Case Niove?" ghe vevo domandò, anca pa savè regolame chi ciamà in squadra.
"Pena disnò vignì in canpo e là me trovarè mi, Broca, el Batài, Dente de Cavur, Notre Dam, Strassa, el Gobo..." Stiaca el veva fato ùndese soranomi duti in un fiò.
Cò dopo disnò gerevo rivò in canpo co la squadra, trovo Stiaca che sganassàndose de ride, el ponta el déo verso un fiòl disendo: "Eco la me squadra."
Ma Stiaca no 'l gera l'ùnico a tirà fora nomenanse. A Maran ghe ne jera tanti, cognossevo anca mi qualchidun; Tedesco, Sòto, Beleto... a propòsito de elo, mensonàndolo me xe vignùo inamente un so anèdoto. 'Na doménega, dopo esse stò a balà fora paese co amiçi, rivò casa a do boti, savendo che 'l veva isasse a le tre pa 'ndà a pescà, prima, prima de distirasse el ghe disi a so mare: "Mama, cò vien el Botoneto a ciamame pa 'ndà via, dighe che no son gnancora rivò a casa, sa!" La cale Emo là che 'l bitèva, xe la più scura e strenta che tignimo in paese e la se trova proprio vissin la Tore Milenaria.
La canpana la veva pena sunò tre bòti cò so mare del Beleto la sinti ciamà in cale. La se issa de leto e sercando de fa pian pa no svejalo la va sul barcòn, lo versi e cò la vidi el Betoneto la ghe disi: "Benedeto fio, vara che me ga dito el Beleto de dite che no 'l xe rivò a casa, no!"
Che zente! Va ben che i lo varà ciamò Beleto parché no 'l gera tanto bel; pa furtuna, gavando qualchiduna, no se bitua più cassà nomenanse. Dopo duto, co' c'entra i fiòi, che magari 'desso i xe maestri, professuri o doturi. Ma 'ndemo a lèsele, provemo sintì che rassa de brute nomenanse che gera: Magnacarbuni, Patacamerda, Scoresòn, Modòn, Museto, Scàntina, Cugoliti, Macia, Fussinin, Baghega, Tiraca, Cagabuèi, Gato, Sòrse, Cotegheto, Caghiti, Cagnasso, Botoneto, Bondant, Aquacalda, Strasseta, Meso Muso, Paiasso, Camiseta, Casoto, Figurina, Santissima, Sàtana, Sivole, Fasiòl, Casenete, Porcaria, Angusìgolo, Sculassa, Busièr, Potote, Malaria... e fermemo qua sinò magnemo duto el posto. Serto che i vari Stiaca, Sòto, Tedesco, Mùscolo, Volpin, e altri, 'pena che i vedeva 'na persona fa qualcossa de stanbo, tac, indrumàn i ghe sgnachèva la nomenansa: L'Apostolo parché 'l vendeva la Vita Catolica pa le case, Fussinin, parché dopo molò i cugùi de altri pescaùri el fussinèva i bisati posta fa vede che li veva ciapài parando, Meso Muso parché ghe mancheva el barbùs, Volpin parché el gera nevodo de la nona Volpina, Aquacalda parché el scotèva i gransi su la rete co l'aqua sbrovènte posta faghe cascà le sate... Malaria parché 'pena finìa la guera el 'ndeva pa le case a butà el D.D.T. posta copà i peoci. Insoma, 'na volta bastava 'na monada pa' vadagnàsela. Tanti i se feva 'na malatìa e invissi altri, come sti do che mensono 'desso, gnanca no i se sconponèva.
Toni Angusìgolo el gera pena entrò in ostarìa Ai Pescatori de sior Toni Sòto, cò 'l se sinti saludà: "Bongiorno, Toni, te ga ciapò angusìguli stamatina?"
"Sì - fa indrumàn el pescaòr, e co 'l soriso in boca el rispundi - però, sior Toni, stavolta li go ciapài duti sòti!"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Majo:
Editoriale
Un monumento a la mama
Viva nel ricordo de tuti, inmortalà ne l'arte, presente ne la vita de ogni giorno: parché no farghe un monumento?
de Mario Klein
Ciàcole Visentine
La sagra de le siarese de Pianesse
A Pianesse, vissin Maròstega, la penùltima doménega de majo de ogni ano, ghe xe la sagra de la siaresa "Sandra"
de Giordano Dellai
|
