|
Vita de na volta - in dialeto rùstego de la Bassa
A Medjugorje
Jera on tòco che se sentìa dire che 'nton paeseto da la Jugoslavia i vedéa la Madona e ghe jera de quei che naséa a védare. 'Nton pese de la Bassa Padoana se ga riunìo na zinquantina de parsone par nar védare anca luri. I xe partìi a la sera 'nte l'inbronire, in coriera, par èssare là a la matina drio. 'Nte sta conpagnìa ghe jera anca Toni Borela, on magnapreti, sbraicon, rasiarca e on biastemadore de prima riga che tuti i se n'à dà de maraveja. Na fémena, có la lo ga visto, la ga dito: "Mariavé, anca carlì viene? Có rivemo, la Madona la scapa via!" E nantra la ga seguità: "L'ùltima volta che 'l xe stà in ciesa xe stà chel dì che i lo ga batedà." Ma la capa de ste fémane la ga dito: "Ma sì! 'Assè che 'l vegna anca elo, poareto: el ga el derito come tuti. Pitosto disighe calche Avemaria, parché el se converta e finìmola co sti discursi." 'Nte la parte dedrìo de la coriera i discursi i jera difarenti. On toso ga dito a Toni: "Anca vu vegnìo a védare la Madona?" E elo: "Ma che Madona: a si tuti punti 'ntel zarvelo! Madona no ga n'è! La xe tuta no invenzion de i preti par ciapare schei! Mi a vegno par perdarme via e par vedare on tòco de mondo ca no go mai visto!" Defati el viajo a Toni ghe lo ghea pagà du maestri in pension e no se ga mai savesto el parché.
A la matina có i xe rivà i ga visto sta bela ciesa con du canpanili in medo a on gran spiazo e on stravento de jente ca no te capivi da indo' che i fusse spuntà fora. I xe nà a Messa, dita da on mucio de preti e frati e al dopodisnà i xe nà a sentire cossa che dise na tosa de quele che sèguita a védare la Madona. A la matina drio sti pelegrini i xe nà 'ntel monte indo' che par la prima volta i ga visto la Madona. Là no ghe jera né strada e né sentiero, bisognava caminare inzima a de le piere tute a ponta e a farse largo par in medo ai spini. Có i xe rivà al posto, ghe iera na gran crose fata co du pali e tornovìa altre crose pìcole; lì sti pelegrini i ga dito el rosario e prima da tornare indrìo, tanti, ai piè de la crose granda, i se ga rancurà on sasseto. El xe stà on viajo gran fadigoso ma tuti i xe stà contenti de averlo fato. Chel 'altro dì i pi dóvani e i pi corajusi i xe nà inzima al monte de la crose. El xe stà on vero Calvario: ogni tanto i cognéa fermarse par ciapar fià, i ga senpre pantedegà cofà cani soto el sole de lujo e i xe tornà tuti desfigurìi da la fadiga. Al dopodisnà ghe xe stà le funzion in croato con el Rosario; la ciesa la jera piena a marteleto: italiani, tedeschi, francesi, ingrisi, polachi e tanti altri. A la fine el frate a ga intonà la Salveregina in latin: se ga sentìo na cantada che paréa che vegnesse doso el cuerto de la ciesa. Toni no xe mai stà su i munti e né in ciesa; el naséa védare el tabaco, i frutari e i uliviti; na volta el xe nà a védare quei che se confessava indenocià 'nte i cantuni; passando par in medo a la jente el se sentìa uno difarente de luri, el se vedéa perso, e no 'l saéa pi 'nte che mondo èssare. Sti pelegrini, che i vardava de stare senpre uniti, i se ga inbatù 'nton frate da Pola che parlava come luri e lì i ga tacà boton.
Sto frate el ga contà tuta la storia de Medjugorje fin dal scumizio: i segnài luminusi che se ghea visto in zielo e 'nte i du munti, la storia de i tusi che vedéa la Madona, quela del frate pàroco del paese e de la jente tuta. Ma sicome che quei che comandava i jera contrari a tute ste robe i ga zercà in tute le maniere da smarazare fora tuto, e el pàroco, credéndolo colpévole i lo ga messo in buso a Citluk, on paese grosso, poco distante. Che comandava sta bojosa ghe jera on capo e che faséa servizio ghe jera on caporale con na diesena de militari, el caporale el jera on omo del partito, rugante e cativo cofà na peste. Là a xe sucesso che ogni altra matina i catava la porta del sgabussin indo' che jera inciavà drento el frate verta. El capo se ga infurià: el ga dito, el ga fato, el ga brigà, na no 'l xe sta bon da savere chi che verdéa la porta. Sto omo no 'l saea pi che acoa trarse 'dosso, el jera desparà. Finalmente al caporale, che 'l jera quelo che pi de tuti maltratava el frate, el se ghea messo in testa che a vèrdare la porta el fusse el frate par drento co on grimandelo. Alora zerca sto grimandelo prima indosso al frate e po' dapartuto, ma i lo ga zercà inte na maniera che i gavarìa catà anca on gran de méjo. Alora el capo el ga volesto fare métare 'nte la porta on cadenazo grosso cofà na méscola dotà de on locheto de assale de i pi moderni, el ga volesto che la ciave la tègna el caporale e che 'l sia l'ùnico responsàbile de la porta. Ma el toso no se ga contentà: el ga volesto métarghe on militare de guardia a la porta dì e note. Par on tòco la porta no se ga pi verto: capo e caporale i ga dà on suspiro de sulievo e i jera tuti du contenti. Na note xe vegnù sù on furioso tenporale. Tonà as'ce,
s'ciantisi da mati, site che le svis'ciazava el zielo, vento e piova che Dio la mandava; se ga stuà la luce, la caserma tremava tuta, la paréa la fine del mondo, i soldà i jera pieni de paura, i coréa da na parte a l'altra par no saver cossa fare. Có xe cessà i ga catà la porta del frate spalancà e elo indenocià 'nte la branda pacìfico cofà du schei che'l patanostrava. El caporale ga verto el pugno, el ga vardà la ciave del lucheto er la ga 'assà nare par tera, el xe restà inmatonìo. A la matina el capo ga racomandà a tuti che quel che xe sucesso no i ghe lo contesse a gnissun.
Col tenpo xe capità che el frate i lo ga molà, che el capo e parte de i soldà che prima no i credéa i ga tacà a crédare, e che el caporale se ga fato frate.
Al di drio sti pelegrini i xe tornà a casa; Toni Borela se ga fato amigo del prete, no 'l ga pi biastemà e tute le feste l'è senpre nà a Messa e comunion.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Majo:
Editoriale
Un monumento a la mama
Viva nel ricordo de tuti, inmortalà ne l'arte, presente ne la vita de ogni giorno: parché no farghe un monumento?
de Mario Klein
Ciàcole Visentine
La sagra de le siarese de Pianesse
A Pianesse, vissin Maròstega, la penùltima doménega de majo de ogni ano, ghe xe la sagra de la siaresa "Sandra"
de Giordano Dellai
|
