|
Ciàcole Visentine
La sagra de le siarese de Pianesse
A Pianesse, vissin Maròstega, la penùltima doménega de majo de ogni ano, ghe xe la sagra de la siaresa "Sandra"
Dopo che in aprile le siaresare in fiore le ne ga fato cavare el fià par la belessa del so spetàcolo, inserìo in na natura bela e na volta tanto a misura de omo, in majo finalmente riva el momento de sercare i so fruti: le siarese. Sì, parché par quei puchi che 'ncora no lo savesse, a Maròstega e paesi vissini ghe xe na tradission de la coltura de le siarese, in tute le so qualità: la "Sandra", el "Duron", la "Roana". Sercare par crédare, vegnerìa da dire, qualsiasi de sti boni fruti rotondi e rossi che se mete in boca, se intiva senpre ben.
Chi che ga un tòco de tera al sole da ste parte se dà da fare par rancurare qualche pianta de siaresara, parché 'l sa che i fruti vien fora boni, e anca un poco par portarli a le tre sagre che qua se organiza. El primo a scomissiare xe el comune de Pianesse (se scrivarìa Pianezze, ma el dialeto ga le so razon), che organiza la sagra de la siaresa "Sandra" (la pi bonoriva) 'ntel penùltimo fine setimana de majo, che st'ano toca ai 17 e 18 de majo. Po', vien drio Maròstega (Marostica) propio na setimana dopo, co la sagra del "Duron", da tanti considarà la pi bona siaresa che ghe xe. Par ùltimo vien Mason, che 'ntel primo fine setimana de giugno fa anca lu la so sagra, 'ndove se porta soratuto siarese "Duroni" e "Roane", le pi dure e le pi tardive de tute.
Gnanca dirlo che par sti paesi, che xe confinanti, la sagra anuale de le siarese xe un pretesto par organizzare anca altri apuntamenti de vario tipo, soratuto de caràtere culturale. Tra quei organizà st'ano me vien da mensonare (e cussì me fasso un pochetin de publissità a bon marcà) la presentassion del libro "Pianezze. Storia di una comunità e del suo territorio" che go scrito a quatro man co 'l me amigo professor Antonio Muraro da Maròstega. Se trata de un laoro che ne ga inpegnà 'nte i ùltimi tri ani, èdito da la Editrice Veneta de Vicensa, che xe longo quasi 500 pàgine. E questo tanto par dire come ste ocasion de festa xe ùtili anca par parlare de cultura, cosa che fa senpre ben al core.
E a propòsito de Pianesse e la so storia: xe almanco mile ani che qua se coltiva siarese, parché go trovà trace de sta pianta za in època medievale, al tenpo de Ezelin, e po' anca dopo, sensa interussion. Serte volte la coltivassion de sta pianta senpre pressiosa portava via raquanto tenpo, anca ai tosi pi pìcoli, che i perdeva dotrina o la messa par laorare drio a le siaresare. In sti casi 'lora el pàroco no perdeva tenpo a lamentarse, come xe sucesso che ga fato don Silvestro Gallerio, pàroco de Pianesse 'ntel 1698. Davanti al véscovo padovan Giorgio Corner, in vìsita pastorale, el pàroco ga dito che a la dottrina gera iscriti 136 zòvani scolari. Za el pàroco no gera contento che raquanti de sti qua, par pura comodità, i preferisse 'ndare a dotrina 'nte le parochie vissine. Ma la gossa che ga fato trabocare el vaso xe stà el conportamento tìpico del mese de majo, stagion de la racolta de le siarese, cò pareci adolessenti lassava lì de frequentar le lession de la dotrina par fare òpara de custodia a le piante da fruto de propietà de la fameja. Na condota, sta qua par el pàroco, assolutamente da condanare, tanto che don Silvestro ga dichiarà sconsolato al véscovo Corner, de 'vere da tenpo abandonà la speransa de canbiare ste antiche e radicàe abitùdini, detàe pi da l'interesse che dal zelo relijoso.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Majo:
Editoriale
Un monumento a la mama
Viva nel ricordo de tuti, inmortalà ne l'arte, presente ne la vita de ogni giorno: parché no farghe un monumento?
de Mario Klein
Ciàcole Visentine
La sagra de le siarese de Pianesse
A Pianesse, vissin Maròstega, la penùltima doménega de majo de ogni ano, ghe xe la sagra de la siaresa "Sandra"
de Giordano Dellai
|
