Memoria viva

Do bonbe sul Domo a Padova in do guere diverse
Na longa conversassion in tola a casa nostra tra el Papà e do Zii.
Argomento Padova durante la guera 1915-18.
La bonba austriaca cascà sul Teatro Verdi.
El svodamento de civili a Padova dopo Caporetto. Fogo e fiame su la linea del fronte da la metà a la fine de giugno 1918

Padova. Guera 1915-18. Una de le tante fotografìe in possesso de la me fameja. Se vede ciaramente el disastro fato a l'interno del Teatro Verdi da la bonba austriaca cascà su la "cùpola" in te'l 1917.

"Ciò, in quea sera ga cantà la Toti Dal Monte!" Lo dizeva me Zio Lino, fradèo più vecio de me Papà. Gèrimo a casa mia, tuti 'torno a lu, al Papà, a me Zio Clemente, 'na sera de l'inverno del 1936, do giorni prima de Nadale. El Zio Lino gera el primario "pneumologo" a l'Ospedale de Padova. Un omo alto, co' 'na bea figura "robusta", co' la barba e i bafi za bianchi, che te meteva rispeto e sogession. El se gaveva laureà a Padova a pieni voti, po' l'assistente e, dopo aver fato el primario a Castelfranco Veneto e a Este, el gaveva vinto el concorso a Padova. In te le nostre fameje lo ciamàvimo "el Zio dotore"; su tuti el gaveva 'na grande autorità e considerassion e, in casa, no' se moveva foja in canpo sanitario de ogni gènare se prima lu no' gavesse dà el so giudissio.
L'altro Zio gera Clemente Ciccarelli. El gera stà ufissiale de Cavalerìa a Padova verso la fine del 1800 e, da la so finestra de l'Albergo Aquila Nera in via Altinate, el gaveva conossudo la sorela più vecia del Papà, Maddalena, dita Nella.
El la gaveva sposà e, dopo ani de "guarnigione" in varie sità italiane, el se gera ritirà da l'Esèrcito e a Milano el gaveva fondà la Casa Farmaceutica che, senpre più grande, continua ancora. La so fameja gera de Cupra Marittima, ne le Marche. Sinpaticìssimo e spiritosìssimo, pien de 'na grande cultura stòrica, militare e "umanistica", el se divertiva a contarne co' tanti particolari l'andamento de le batalie più inportanti del Risorgimento italian.

Padova. Guera 1915-18. Altra fotografia de la fassada del Domo dopo la bonba del 1916.

Mi lo scoltavo emossionà e penso che anca lu sia stà "determinante" ne la me passion stòrica de quel periodo. Ancora ancò, quando che vedo el so ritrato giovanile co' i bafeti sul tubeto de 'na pasta "dentifricia" fata da la fàbrica de so nevodi, fasso un soriso e ghe mando col pensiero un baso de riconossensa.
Tornando al discorso de prima, el Papà e i Zii gera drio parlare de la inaugurassion del Teatro Verdi dopo i lavori de restauro in te 'l 1920, a causa de la bonba austriaca che gera cascà sora al teatro in te 'l novenbre del 1917 durante la Grande Guerra. L'inaugurassion gera stà fata co' l'òpera lìrica "Rigoletto" e, in te la parte tràgica de Gilda, la fiola del bufon mantovan, gaveva cantà un "usignolo" secondo la stanpa de alora, 'na soprano zóvane, Toti Dal Monte.
La bonba austriaca gera cascà proprio su la "cùpola" del Teatro Verdi fasendo crolare squasi tuto el sofito che gera artisticamente afrescà. Naturalmente anca l'interno gera stà rovinà e, dopo, el dano se gera slargà a causa de le piove e de la neve che cascava dentro dal gran buso fato da la bonba.
El discorso gaveva ciapà anca la storia del Teatro Verdi. Go savudo cussì ch'el gera stà fato in te 'l 1748 da l'architeto Gloria e inaugurà in te 'l 1751 co' 'na òpera lìrica che gaveva la mùsica de Baldassarre Galuppi e i versi de Metastasio. El teatro, co 'l primo nome de "Nuovo" e la proprietà e "gestione" de 'na società de aristocratici padovani, gaveva traversà un periodo de grande splendore: rapresentassion de altìssimo livelo de mùsica e de prosa; "anteprime" de òpere lìriche de Meyerbeer, Rossini, Donizetti, Bellini; presense de duchi, granduchi, prìncipi e inperatori, anca de Napoleone I co' la mujere Giuseppina Beauharnais. Gaveva sonà anca el grande violinista Niccolò Paganini. In te 'l 1846 el Teatro gera stà restaurà soratuto a l'interno dal famoso Jappelli, che ani prima gaveva fato el Stabilimento Pedrocchi, conossudo in tuto el mondo. Dopo la bonba austriaca del 1917, el Teatro Verdi, deventà da tenpo oramai comunale, gera stà de novo messo a posto e inaugurà apunto col "Rigoletto", co' el "Parsifal" de Wagner e la "Butterfly" de Puccini, e altre òpere che 'desso no' me ricordo.

Padova. Guera 1915-18. El scopio de la bonba austriaca e l'incendio de la Ciesa del Carmine in Piassa Petrarca.

Quea sera del 1936 el discorso fra el Papà e i Zii, in tola dopo sena, coreva gualivo e interessante; parlava ora l'uno ora l'altro a seconda de i ricordi personali su la Grande Guerra, che i gaveva fato dal scominsio a la fine. Vigneva fora storie e particolari insieme che par mi e i altri gera novità. Se capiva perfetamente che se tratava de fati veri, de esperiense vissude qualche volta anca su la propria pèle, de avenimenti incastrà in te 'l quadro dramàtico de l'Italia del 1917. I tre gera rivà a la ritirata de Caporetto e i gaveva esaltà la fermessa del Re Vittorio Emanuele III che, in te la riunion de le fòrse aleate de l'Intesa a Peschiera sul Garda, gaveva vossudo e inposto la resistensa sul Piave, invesse che sul Mincio e sul Po, come che voleva e consiliava i altri.
Da qua el discorso gera passà al fato che, dopo Caporetto, Padova gera praticamente deventà la capitale del fronte de guera. El Comando Supremo, co' i generali Diaz e Badoglio, se gaveva trasferìo a Abano, a l'Albergo Orologio. El Re e la Regina, par èssare vissini al Comando Supremo, se gera sistemài a Villa Sgaravatti, da quel momento ciamà "Villa Italia" da drio del pìcolo cole de Lispida, su la strada che portava da Battaglia a Arquà Petrarca. Padova, i so alberghi, le so pension, i so cìrcoli, se gera inpenìa de militari de i vari comandi, de giornalisti "inviati speciali" de i più inportanti giornali nostrani e foresti, de òmini polìtici che voleva védare da vissin come che 'ndava le sorti de la nostra Italia in quel tràgico momento.
Tuto gera possìbile, sia che i austriaci e i tedeschi fosse boni a sfondare soratuto su 'l Piave, sia che i italiani controatacasse sul canpo.
Coreva vosse che l'Austria, anca se le aparense gera contrarie, fosse a la fine de le so risorse e gavesse 'na profonda crisi interna.
Comunque Padova, anca se la gera piena de zente interessà a la guera, anca se i treni in stassion scaricava e caricava mejari de soldài che vigneva in licensa o che tornava al fronte, anca se da le nostre tere partiva ogni gènare de rifornimento par le trincèe, gera 'na sità deserta.

Padova. Guera 1915-18. I efeti de la bonba austriaca cascà senpre par bonbardamento aereo sul Domo inte'l 1916.

'Na bona parte de padovani gera scapà verso el centro del Paese, par paura de 'na invasion austriaca, e par i bonbardamenti aerei. Se durante el giorno ghe gera un pochetin de vita, dal tramonto in avanti la sità pareva morta. El silensio gera roto da qualche conpagnìa de soldài in licensa in serca de straviarse dopo setimane de trincèa, ma soratuto da i spostamenti de le ronde de guardia che tendeva la sicuressa. Se pensava a le spie, data l'inportatnsa che le caserme, i comandi, la "logistica bellica" rapresentava in te la nostra Padova. Posti de bloco militari controlava le strade più inportanti che portava in centro, faséndose mostrare permessi e documenti.
La conversassion in particolare del Papà se ga fato ancora più interessante quando che xe scominsià el ricordo de la note de metà de giugno del 1918. Lu gera "portaordini" a disposission del Comando Supremo. Ogni giorno ghe tocava córare in motocicleta fra i vari comandi e el fronte, dove ch'el gera senpre in perìcolo de mitraliade e s-ciopetade. El ga contà che la note del 15 giugno xe stà convulsa. Evidentemente Diaz gaveva savudo che su tuta la linea del fronte da l'Altopiano de Asiago al Grappa, longo el Piave fin al mare a Cavazuccherina (ancò Jesolo), i austriaci e i tedeschi gavarìa atacà co' grandi fòrse, probabilmente le ùltime. Cussì, durante la note, tuto el Vèneto ga sentìo e visto lanpi de un sordo continuo scanbio de canonade che xe continuà sensa interussion par quìndeze noti e quìndeze giorni.
Me Zio Lino, che gera stà ufissiale mèdico a Cavazuccherina, co' la testa fasseva de sì, confermando tuto queo che contava el Papà.
Che ga finìo dizendo ch'el nemigo gaveva tentà l'ùltima possibilità, che l'ataco gera stà "respinto", che i italiani gera za drio prepararse par la vitoria finale. Me ricordo che tuti i tre i ga osservà che dopo la vitoria italiana sul Piave del giugno 1918, tanti padovani, pròfughi ,xe tornà a casa, segno de tanta speransa.
Vojo conclùdare co' 'na storia squasi inverosìmile. Quea sera del 1936, in tola, xe stà ricordà tanti particolari de la guera 1915-18. Xe stà ricordà come Padova sia stà da considerare la sità più atacà da i bonbardamenmti aerei. Fra le altre, che ga fato tante vìtime, 'na bonba austriaca xe cascà in te 'l 1916 su la fassada del nostro Domo.
Che no 'l gera un "obiettivo" militare. El grosso dano xe stà riparà e messa sul posto 'na lapide in ricordo. Go savudo più tardi che el destin ga vossudo che ne l'ùltima guera 1940-45 'na bonba o americana o inglese cascasse co' precision sul stesso posto, portando via la làpide che però xe stà trovà e recuperà da i reigiosi del Domo. Incredibile!

[torna sopra]