|
Da Adria (Rovigo)
Incontri a tola
I ghe ciama club de "service", ch'a vorìa dire ch'i ga come scopo quelo de darghe na man a zente che conbate la sena col disnare, a fioi che se distingue a scuola, contribuisse a salvar òpere d'arte, a tegner sù storia, tradission e folklore de serti loghi, insuma a fare un saco de robe che altri o gnanca i ghe pensarìa o no cata schei par farle. Inte le intension e le règole associative gh'è na stramenara de boni propòsiti: amicissia, iutarse l'un co' l'altro, svilupare el cosideto "senso civico", e via de sto passo. I ga tuti nomi strafàlfari, in inglese, ch'a ne se sa cossa ch'i voja dire, anca parché i è nati tuti fora dal nostro paese e nantri a i emo inportà insieme a la coca-cola, al fast food, al drink, al slim fast, al rock, al veek-end, al break, ai jeens e altre barache del gènere.
I soci i se cata regolarmente de sera sentà a tola, tant'è vero che i so incontri i se ciama "conviviali". I òmeni i ghe va in àbito scuro (anca parché el gh'è scrito sul bilieto d'invito), le done(quando e se ghe se consente de partecipare, parchè ogni club ga le so règole) le se mete in grìngola par far s-ciopare le amighe d'invidia, che, come ch'le se incontra "Oh, come ch'a te sta ben! Ma dove l'ato catà chel bel vestito?" "Cossa voto, na strasseta ch'a gheva inte l'armaro..."(invesse l'à girà tuta Padova par catarlo!); 'pena fato el cunplimento le se gira verso n'antra amiga par dirghe: "Ato visto? Chissà cossa ch'la l'à pagà!" "Ela pagà? Disi pitosto: chel béco de so marì!" "Ogni giorno nasse un cuco, beati chi se lo cuca..."
De le volte a ste "conviviali" se magna bastansa ben, de le altre manco, ma questo l'è un fato normale có te magni fora de casa tua. De sòlito el ristorante l'è senpre quelo, anca se gh'è le so mate ecession: el primo, o l'ùltimo, incontro de l'ano - qualche volta tuti du - el se pol fare int'un posto inportante: na vila co 'n nome de nòbili venessiani, un castelo, un palasseto, un cason de vale o na stala, basta ch'i sia posti che "fa fin" e ch'a se paga più del normale. Sti incontri i ga tuti un so cerimoniale. Se se cata, se se saluda, se pàciola fin ch'el presidente invita tuta la marùgola a passare in sala par l'aperitivo, che se consuma regolarmente in piè co 'n sfurisso inte na man e un goto co' chelcossa de colorà inte st'altra (el famoso aperitivo de la casa). A un serto punto se se senta e ognuno serca de stare vissin a l'amigo - s'a gh'è le done: a l'amiga, sinò con chi se spetégola? Co na strania, che magari va a fenire ch'l'è amiga de quela che s'è drio dir male e po' la va a cuntarghe tuto? Nò, nò, mèjo 'ndar sul sicuro -; cussì se fenisse par ciacolare senpre co' la stessa zente e parlar de le stesse robe. Có finalmente tuti i è sentà el presidente dà na bota a la canpana - gh'è senpre na canpanela sora la tola granda col stema del club -, el passa la parola al cerimoniere. Sto chi mete in funsion na registrassion co l'ino nassionale, internassionale e quelo del club. Tuti i se leva in piè fasendo la facia seria come per na roba inportante, invesse no ghe ne frega 'n assidente e no i vede l'ora che i fenissa; a sto punto i se senta e el cerimoniere, dopo i saludi, el presenta l'òspite de la serata - no manca mai l'òspite de riguardo, che de le volte l'è na persona inportante ch'el te cunta robe interessantìssime o ch'el t'intratien tiràndote sù de susta co' chelcossa che l'à scrito lu o parché l'è uno che sa far star ben la zente co' la so parlantina e le so batutine, de le altre l'è un meneche qualsiasi ch'el vien a parlare de le cretinade più grande de sto mondo sercando de farle passare par robe inportanti (un fià come le fritele de Barba Sucon Suchela) - e dopo el fa el nome de tuti i invitati; có fenisse lu, ciapa la parola el presidente par ilustrare la serata, par dare avisi, par fare qualche comunicassion su l'andamento del club: se l'è bravo, el se la cava in du minuti e tuti i è contenti; se, invesse, l'è una de chele persone che ghe piase scoltarse, el la tira per le lunghe e i presenti i se 'gura che no ghe sia risoto come primo, sinò se ris-cia che vègna in tola d'i bìguli. Finalmente i camerieri i scuminsia a girare: antipasto, primo, secondo, dolse e cafè. Có riva sto ùltimo, l'òspite el se guadagna la sena mostrando a la nòbile conpagnìa la so siensa, conpetensa, bravitù in questo o inte st'altro canpo. Tuti i è ben felissi có l'à fenìo e i ghe bate le man de gusto: de le volte par mostrare tuta la so sodisfassion de le altre, più che par quelo che l'à dito parché l'è rivà de cao presto. Inte sto secondo caso l'aplauso l'è tanto più forte, convinto e sincero quanto prima l'è riussì a conclùdere sensa stufar ninsun. A sto punto la serata l'è conclusa. Qualchidun se levà sù da la carega par andare a congratularse col relatore, qualche altro el sbrissa fora a l'inglese, altri ancora stà lì a paciolare fin ch'i vede la sala svodarse. Finalmente tuti i se tole sù le so strasse e la conpagnìa se sfanta col propòsito de catarse la pròssima paca.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
A la scola de i proverbi
La morale de l'omo la xe vecia come 'l cuco: da senpre e in tute le lingue, i proverbi màsena el stesso gran e buta fora la stessa farina
de Mario Klein
Memoria viva
Do bonbe sul Domo a Padova in do guere diverse
Na longa conversassion in tola a casa nostra tra el Papà e do Zii.
Argomento Padova durante la guera 1915-18.
La bonba austriaca cascà sul Teatro Verdi.
El svodamento de civili a Padova dopo Caporetto. Fogo e fiame su la linea del fronte da la metà a la fine de giugno 1918
de Gigi Vasoin
|
