|
Vita de la Bassa Veronese
Morbin morubiese
 |
| ...uno de quei àngeli che vegnéa messi su l'altar magior... |
L'è giusto sostegner l'inportanza e 'l vigor che ga i proverbi ne la vita de tuti i giorni, soratutto tra la gente de le nostre canpagne, indó che resiste la memoria de tanta sageza e 'ndó, al momento oportuno, i salta fora. Ve conto, a propòsito, quel che è capità na olta, tra do fameje, vizine de corte, a Via Larga de San Piero de Morubio, propio de giugno, in tenpo de fien e de fine scola.
I Modenese i gavéa on caro de brespagna (erba medica) da descargare e po' métarla sul fenile par far el ciuso (l'ammasso). De sòlito, sto laoro el se faséa in tri: la Elena la folava la brespagna sul fienile coi pié, Silvano el la tirava ìa (via) da la porta e... ghe mancava el terzo, par far on laoro a cadena e imagazinar el fien. Alora la Elena la va da Càuci, un de la fameja vizin de corte, e la ghe dimanda:
- Càuci, podarésselo so fiol Renato a vegner a jutarme a descargare?
- Eh, nò! - ghe fa el Càuci, - parché Renato el ga i esami e bisogna che 'l studia!
Alora i Modenese ghè tocà rangiarse a far da lori soli, naturalmente col dopio de fadiga.
Passa el tenpo e vien che Càuci el ga bisogno del musso par on laoreto nel canpo; sicome che lu no 'l ghe l'à, el va a domandàrghelo a la Elena. El ghe fa:
- Elena, podaréssela prestarme el musso ché go da fare on laoreto nel canpo?
- Eh, nò! - ghe risponde la Elena - parché el musso el ga i esami... e bisogna che 'l studia!
Morale de la storia: "Se se vol che l'amicizia se mantegna, che na man vaga e st'altra vègna".
* * *
St'altra storiela la sa de... sagrestìa. Difati l'è ligà a on scherzo fato a la perpetua de la canònica de San Piero de Morubio, persona piena de grazia, ànima "pudica e pia" che la stava senpre su le sue.
Bisogna dire che, na olta, la canònica de San Piero de Morubio l'era verta a tuti, specie pa i studenti zóeni, che al dopo disnar i vegnéa a fare i cònpiti e a scaldarse, visto che a casa soa a olte mancava anca la legna. Po' i tornava de novo a la sera par zugar on poco a le carte o a tónbola. Alora, television no ghe n'era! Savemo che tuti i butèi i ga ója de scherzi, specie in chei tenpi, che ghe bastava gnente par gòdarse. Cussì i à pensà de farghe on scherzo a la Mariana, la perpetua, sorela del prete. Descondon del sagrestan, iè 'ndè sul granaro a tor on àngelo a grandeza natural, uno de quei che vegnéa messo su l'altar magior, quando ghera le Quarantore o le feste soleni. Jera apunto a la vigilia de Nadal e in canònica ghera du predicatori che i tegnéa la novena.
A la vigilia de chel Nadal, verso mezanote, la Mariana la fa par 'ndar in leto e la se ìnvia col scaldin pien de brase in man sù par le scale, guardando ben de far l'ùltima cicada, tirando fora da la scarsela del grunbial na presa de tabaco.
Cussì inbroià la vèrze la porta de la so càmara e la se spoja. Na olta cavà zo, la se ne incorze che calcossa no va sul so leto. Tuta rabià, la fa de novo le scale e, 'pena rivà in tinelo, la dise:
- Mariasanta! Don Luigi, ma cossa alo fato el predicator che l'à sbalià càmara: a l'è 'ndà nel me leto, inveze che ne la càmara de i forestieri!
Cussita don Luigi e i butèi presenti i va a védare. No ve digo le sganassade che i à fato, a védar la facia de la Mariana quando l'à descoerto el leto e l'à visto che soto le coerte ghera l'àngelo de gesso co i brazi in alto! No sto a contarve quante la ghe n'à dito ai butèi:
- Farabuti, vigliachi - e tuti i tìtoli piassè bruti de sto mondo, anca se ghera el prete darente.
Morale anca de sta storia: "Ci de l'omo se smaraza, prima o dopo el te strapaza!"
* * *
Nantra olta, senpre i stessi butèi de la canònica, i à tolto de mira el sagrestan. Era pròssima la sagra de San Gaetano (ai 7 de agosto). Prima ghera el triduo de la festa; maginarse el canpanaro quanti segni (richiami di campane) che 'l dovéa dare, par finire in beleza co el concerto de canpane. Gino Modena, el canpanaro, poareto, el cognéa alzarze d'istà a le quatro e meza par dare el primo boto e dopo l'era tuto on sonar de canpane. Ma chela matina, l'era on tirar le corde par gnente: no ghe n'era una che sonava, paréa quasi che le canpane le volesse far siòpero. El canpanaro, preocupà, l'à fato de corsa tuti i scalini fin de sora a la cela del canpanil par védar cossa era sucesso.
L'è stà cussita che 'l se n'à incorto:
- Fioi de cani! - l'a dito -, verde da la rabia.
Ancora na olta i butèi i ghe l'avéa fata. Coss'era sucesso? I butèi, de note, i s'avéa procurà la ciave de la portina del canpanile, po' i avéa fodrà tuti i batoci co le scorze verde de le angurie. Figureve che spegazo che i à conbinà. Par tera, torno al canpanile, paréa che ghe fusse stà na tenpestada su la molonara.
Morale: "Quando uno l'è massa bon, se ne profita el lazaron".
Vien proprio da dir che ogni proverbio e ogni modo de dire ga le so raise ne la vita corente, de tuti i dì.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
A la scola de i proverbi
La morale de l'omo la xe vecia come 'l cuco: da senpre e in tute le lingue, i proverbi màsena el stesso gran e buta fora la stessa farina
de Mario Klein
Memoria viva
Do bonbe sul Domo a Padova in do guere diverse
Na longa conversassion in tola a casa nostra tra el Papà e do Zii.
Argomento Padova durante la guera 1915-18.
La bonba austriaca cascà sul Teatro Verdi.
El svodamento de civili a Padova dopo Caporetto. Fogo e fiame su la linea del fronte da la metà a la fine de giugno 1918
de Gigi Vasoin
|
