|
Memoria Euganea
El "pio bove"
 |
| ... e dopo vegnéa el tenpo de 'a meanda... |
Boarìa deriva dal bo che a l'età de on ano el vegnea privà de i so atributi genitali: na necessità par rèndarlo mansueto e cussì el se rendéa idoneo a lavorare la tera. Sta parola "bo" la xe na antica pràtica: ghe voeva tuta na solfa par castrare i toreti có i gaveva on ano circa: adesso ghe xe la Università che prima jera na spece de laboratorio co de i veterinari (praticoni, se pensemo che a chei tenpi no ghe jera de serto sta categorìa) 'ndove i contadini i portava i toreti a farghe la funsion; on poco a la volta sto sito ch'el jera frequentà da afaristi e comercianti e girava idèe nove, on poco a la volta la xe deventà la Università famosa che la xe adesso. Ma tornemo a la boarìa. Có se passava vissin a 'e grande stale se saeva sùito quanti pari de bestie i gheva in stala: bastava contare i belconsèi e ogni belconsèo on paro de bestie, e co pi grande jera el nùmaro, pi inportante la jera la boarìa.
Na boarìa la jera na vera asienda: la stala, le tese sora la stala, i pajari, e i loamari; na volta no ghe jera concime, se doparava quelo naturale, anca se i dise che a tegnere in stala tante bestie el jera on spreco. Difati tuti sti bo i lavorava par do stajon: in autuno 40 dì e in primavera nantri 40 dì. Ma ghe jera anca i so vantagi: i bo i magnava ben có i lavorava, ma có i jera a riposo i se mantegnéa co i canoti del formenton e co la stéola. Na volta, quando ch'el formento el faséa la spiga, se somenava in meso del trifojo, e có se 'ndava a meanda el formento el se tajava altesin e dopo la stéola co el farfrojo a vegnéa fora na pastura par le bestie durante i tenpi che no le lavorava: no se butava via mai gnente, jera tuto programà. Sicuramente na volta a ghe jera pi cura par le bestie che no par i cristiani; le stale le jera fate de quarelo, le case de i boari le gheva i pavimenti de tera, in te na càmara viveva tuta la fameja, (e se sa che na volta le fameje le jera piene de putèi) e ghe jera na granda rassegnassion. Me vien in mente quando ca vedéa ste boarìe de siè, sete pari de bo a tirare el versuro. El paradore co ordini precisi el li faséa marciare; se faséa araure fonde anca da meso metro, la tera la rendéa tanto de più parché quela che la 'ndaséa soto la se reposava, a jera come che la stesse ferma on ano sì e on ano nò; comunque no sò se sia vèro.
Tornando a la boarìa, la jera come na fàbrica: a la matina rivava i bracianti, le fémene co la sapa e ognuno el vegnéa mandà a fare la so mansion.
De istà tuti i gheva la possibilità de lavorare; in majo se tacava a tajare el fen, on mestiero da schiavi, forse el pi fadigoso, e dopo vegneva el tenpo de meanda, tajare el formento, nantro mestiero copa òmani, e dopo se scumissiava a caresare, portare in corte le faje, fare el cavajon, e dopo machinare el formento. Po' vegnéa el tenpo de la seconda segà del fen, e le done, fra scalsare e rincalsare el formenton no la jera mai finìa. Par i bracianti ghe jera na tregua fin al tenpo de despagnocare, ma par i òblighi (boari e salariati) no ghe jera mai fine; festa e dì de laoro, senpre soto: sbiansare le vigne, tajare l'erba drio i fossi, drio le bine (filagne) 'ndove no se podéa 'ndare co altri mèsi, e po' guernare le bestie, festa e dì de laoro, istà e inverno. Po' bisognava loamare le tere, destirare el loame, tajare i pali so le piope e i salgari, fare le ponte ai pali, bruscare le vigne, preparare le strope, curare i fossi, e có nevegava sgonbrare le strade e la corte da la neve: tute fature che ogni ano le se ripetéa. Sta poara gente analfabeta co sgnarà de putèi i jera costreti a mandare zo par sopravìvere, e ogni tanto, a vera discrezion del paron, da San Martin el ghe disea: "Ménego, sércate on'antra corte che no go pi bisogno de i to servizi!"
E cussì el metéa fora on mediatore par catarse on antro paron. Questa jera la situassion in te na boarìa.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
A la scola de i proverbi
La morale de l'omo la xe vecia come 'l cuco: da senpre e in tute le lingue, i proverbi màsena el stesso gran e buta fora la stessa farina
de Mario Klein
Memoria viva
Do bonbe sul Domo a Padova in do guere diverse
Na longa conversassion in tola a casa nostra tra el Papà e do Zii.
Argomento Padova durante la guera 1915-18.
La bonba austriaca cascà sul Teatro Verdi.
El svodamento de civili a Padova dopo Caporetto. Fogo e fiame su la linea del fronte da la metà a la fine de giugno 1918
de Gigi Vasoin
|
