|
Raconto 2° premio al Concorso del Ventenale 2003
L'ongia incarnà
 |
| In cusina òmani e done indafarà: chi a masenare la carne del mas-cio, chi a salare la carne... |
Sarà stà par quele scarpe nove a ponta o par el gran caminare de sotignon su le caresà par tute quele vìsite che gavevo fato durante l'epidemìa de influensa, serto che pian pianéo l'ongia del déo grosso del pìe drito la se gaveva ben incarnà. Un dolore boja. Pare impossìbile, ma andavo sempre a sbàterghe 'dosso; fin el calseto o el ninsolo del leto, có me tocava la ongia, me faseva védare le stele! Prima de andare dal me compare Professore, gavevo provà un poco de tuto. Bagni caldi de aqua e sale grosso, tintura de iodio, co la quale gavevo brusà un calseto, alcol e aqua ossigenà, pomata de itiolo che gaveva macià de maron fin la scarpa nova e infin anca un inpaco de "Erba diavolona" che me gaveva dà na vecia striga. Gnente! Ansi pèso. A la fine me gavevo deciso de sentire el Professore me amigo. Dopo averme strucà do-tre volte sensa compassion el déo grosso, el ga sentensià: "Caro amico, se vuoi guarire, bisogna cavare l'unghia del tutto!". Benon, co quea paura che ga i mèdeghi del so mae, na solussion cussì la go sùbito scartà. No gero più bon a métarme le scarpe e alora su consilio de un vecioto, go comprà al marcà un paro de "noni": na specie de papusse a scarponsin de pano tenaro che no me bateva più su l'ongia. Co sti noni andavo in giro par el paese a fare le vìsite e tuti me domandava se cussì zóvane gavevo i cai. Gera intanto rivà l'inverno e i Boletin quel giorno i gaveva massà el porsèo. Dato che ne 'a boarìa gavevo visità do putèi, uno co la fersa e st'altro col molton, el paron vecio me ga invità a magnare un bocon co lu. "A femo festa, magnemo do osseti e na fetina de poenta brustolà insieme." In cusina òmani e done indafarà: chi drio a le caldiere, chi a masenare la carne del mas-cio, chi a far colare l'onto dentro la vessiga del porsèo. El porsearo Citron, àbile mas-ciaro, el gera un omenon grando e grosso che tuti ciamava par insacare i saladi ne i buèi. Al lavoro tuto suà, in canotiera, co un paro de braghe bianche par l'ocasion e ai pìe do sgalmare de legno de moraro.
"Dotore, ghe fasso sajare un salado da rosto tajà a metà e messo su le bronse e po' un piatin de "dolse" co la so redesina", e zo un goto de Friularo. Gero là che me gustavo l'ocio in 'sta cusina piena de foghi e de festa rosegando na costesina tuto gusto, quando Citron el monta sora na carega par picare i saladi a la pèrtega tacà al sofito par farli suare vissin al fogo. Finìo ch'el ga da picare i saladi, dato che de ombrete el ghe ne gaveva ciarìo bastansa e la vista gera ormai nebià, par vignir zo da la carega el fa un salto par aria piombando col taco del sòcolo sora el me nono del pìe destro proprio drito al déo grosso! Go visto tute le stele del firmamento compresa la luna piena. Un male bestiale. "El me scusa, dotore, no me gero acorto del so feton". "No sarà gnente" rispondo, "go sentìo na pìcola fita sul déo." E par no pèrdare tuto quel ben de Dio che gera rivà in tola, go fato finta de star ben.
Tornà a casa me go cavà pian pianèo i noni: el calseto gera tacà al pìe, incolà da i grumi de sangue moro. Tiro a sangioti co educassion e distaco el calseto. Vardo el déo grosso: no ghe ze più l'ongia! La gera restà tacà al calseto. Fasso alora de i bagni de aqua e sale, me disinfeto un poco e po' vado in leto sognando finalmente un paro de scarpe nove.
Dopo tre-quatro giorni el déo stava mèjo, me pareva quasi che stesse nassendo n'ongia nova. Infati come gaveva dito el me Professore: "Per guarire bisogna cavarla." Sì, ma sensa anestesìa, fata solo da na ombreta de bàcaro e nò col bìsturi, ma co na sgàlmara de legno piombà a tradimento sora el me nono! Intervento perfeto, poco costoso, ma che la Mutua no passa. Qualche giorno dopo ze vegnù in ambulatorio na vecieta de sotignon: "Dotore, gavarìa n'ongia incarnà sul déo grosso. Sò che la gaveva anca lu, come xeo guarìo? Vorìa fare anca mi la so stessa cura." "Ma, veramente, no ghe la consilio, cara, parché l'intervento me lo ga fato un mèdego da pìe. Ela xe mèjo che la vada dal me amigo Professore!" La xe andà via mogia mogia, ma no la me pareva tanto convinta. Forse la pensava che no gavevo vossùo spiatelare el me segreto professionale.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Febraro:
Editoriale
'Desso ghè bisogno de otimismo
Fin che le robe le va ben... tuto va ben; xe quando le taca nare storte che ghe vole corajo a dirse: "Ciapa le robe come che le vien"
de Mario Klein
Da Belun
Al me rui de tosatela
de Luigina Tavi
Da Vicenza
El primo giro in bicicreta
de Ines Scarparolo
|
