|
Da Vicenza
El primo giro in bicicreta
 |
| "...dopo 'n par de giri finalmente el va!" (Club Fotoamatori Noventa) |
L'aria la scominsiava farse tibieta e i giorni pi longhi; da i àlbari sbociava fojete tènare color verde indùsia e drio le cavessagne no se catava pi, la matina, chéi merleti de brósema che le note d'inverno co passiensa ricama. Insoma, la primavera se faséa vanti, la vestiva da festa i baruscari stravanìi, la sbiansava i strosi co 'e testine de le tìmide viole... Se descantava on mondo fin 'lora tristo e indormensà. I bocia de 'a contrà, daromài orbi de pestolar par casa, ghe tirava a simènto a mame e none par córar fóra, 'pena finìo scola, a chietar el morbin.
Risseto, el toso pi pìcolo de la Ernestina, el ghe faséa da tenpo l'amore a na bicicreta, ma so popà Angelo, che co sinque tusi el gavéa senpre le scarsele lustre, no 'l podéa serto contentarlo: el jera solo lu a portar casa on franco e la so paga la ghe bastava 'pena par rivar, ben o male, a fine mese. Momi el casoin, el tegneva, par la botega, na bici Campagnolo co 'n canbio da fàvola e do sesteli, uno par davanti e uno par dadrìo, par portar in giro el pan. Tito, so fiolo, de do ani pi vecio de Risseto e pròssimo a finir la quinta, el faséa na prima consegna la matina presto e nantra finìe le lession, prima de sena. E Risseto senpre drio, a farghe la posta par poder fare 'lmanco on giro... On bel dì el pìcolo el lo fa convinto e 'l se la fa inprestare.
Tito el lo juta tegnerse su la sela pa' on fià, dopo el lo mola; i pìe del bocia par che i se intrabùca par so conto te i pedài, ma dopo 'n par de giri eco che finalmente el va!!
Par dadrìo, Tito se sgola: "Va' pian, sta' 'tento, me racomando, che se me popà vien saverlo, el me copa! Ocio, par carità!"
E Risseto zola, beato, emulatore de Bartali, Coppi, Massignan (sì, pròpio l'Imerio che sta dopo Arcugnan)! Debba, el so paeseto, el deventa on paradiso: parfina l'aqua del canale la sluse e le rode de la bici gira, gira, gira...
Ma in quela se vede rancar, dadrìo del Cotonificio, Don Camillo, pàroco de 'a frassion. Sorapensiero el prete inbroca el ponte ma... riva defilato el nostro, sbandando co la màgica bici.
El prete fa par scansarse ma 'l xe propio lì, a on passo da la do rode.
"Don Camillooo! Ocio!" Risseto se sgola ma no 'l ghe la fa a scantonar in pressa: co la roda davanti l'infila el pàroco, drito in meso le ganbe. El porocristo, sensa né ao né bao, el va finir justo col culo sora el sesto del pan e te vedi passar sul ponte el prete a brassi e ganbe larghe, el bocia su la bici in gran velocità, co le massele rosse infogà e la boca sbalancà: "Pistaaa!!" Infine 'l pìcolo riesse darghe na frenada da Olinpiade e i do se ferma... Don Camillo desmonta, se posta par quel ch'el pole la tònega, el lo varda ben in facia e, co fare bùrbaro, el ghe fa: "Grassie del passajo: el me sarìa 'ndà 'nca ben, pecà che gavéo da 'ndar da tut'altra parte..."
Risseto el sbassa la testa, messo in confusion. El prete parò sbòta in na bèa sganassada e par Risseto tuto finisse lì.
E te na maniera on fià stranba, el pi pìcolo de i tusi de Angelo ga inparà chel dì a 'ndare in bicicreta, anca se ghe ga vossudo 'ncora qualche aneto parché 'l podesse vèrghine una tuta sua...
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Febraro:
Editoriale
'Desso ghè bisogno de otimismo
Fin che le robe le va ben... tuto va ben; xe quando le taca nare storte che ghe vole corajo a dirse: "Ciapa le robe come che le vien"
de Mario Klein
Da Belun
Al me rui de tosatela
de Luigina Tavi
Da Vicenza
El primo giro in bicicreta
de Ines Scarparolo
|
