|
Devossion popolare
Santa Polonia de i denti
 |
| Santa Polonia co Santa Caterina d'Alessandria (particolare de pitura su legno, fata da Neri di Bicci, 1472, par el Monastero de S.Apollonia a Firenze). |
Questo, par la zente dei campi del me tempo, gera el mese de la Candelora. Na ricorensa dedicà la Madona par na sicura protession, tràmite candela, da i temporali d'istà. Robe a la portata de tuti e chi sa quanti ne parlarà, in prosa e poesìa, dentro sto mese. Ma forse pochi se ricorda che i veci de la nostra Bassa onorava, al nove de febraro, santa Polonia de i denti. Par la verità, come xe scrito nel necrologio de i santi, la se ciamava Apollonia, la xe morta màrtire a Roma a la fine de 300, e la tradission la vole protetrice de quei che sofre el mal de denti.
Su i calendari de prima del Concilio Vaticano Secondo, la vegneva festejà insieme a san Sabino, un predicatore gajardo che xe stà véscovo de Canosa in Puglia dal 560. E pare, sempre secondo i stòrici, che sia stà proprio lu a darghe a la santa l'incàrico, sto incàrico doloroso. El mal de denti, sicuramente uno de i più atroci, quando no ghe gera le medisine de i nostri giorni. Ghe sarà fàssile védare, par quei che se rancura le tante e care devosssion popolari, che continua a ripètarse anche ne la storia del cristianesimo de tuti i tempi, la mecanica de le divinità protetrici che gaveva i antichi greci e i romani. Solo che lori se fabricava a belaposta un dio par ogni necessità e i cristiani, invesse, ga messo de i santi che no xe dèi, ma solo potenti intercessori presso l'altare de l'ùnico Dio.
Naturalmente circolava, ne le case e ne i filò, fra i devoti de sta santa, diverse legende che la riguardava, parché la gera ritegnù importante e potente. El mal de denti no perdonava a nessun e prima o dopo, quasi tuti subìva sti dolori insoportabili. Sensa contare che solo pochi conosseva e podeva permétarse el dentista che riceveva solo in cità. No xe raro trovare scrito ne le crònache del tempo, diligentemente rancurà ne i libri de le parochie, che qualcun xe diventà mato dal mal de denti. "El mal de denti gera cussì forte ch'el dolore ga ciapà el servelo, el povareto xe andà via de testa el se ga tolto la vita..." Questo par segnalare ai fedeli e anche a le autorità eclesiastiche, el parché i gaveva portà in cesa par el funerale un suicida che, secondo el codice de dirito canònico, no se doveva.
Fra le diverse legende in circolassion ne i filò del me paese, una contava par filo e par segno el parché santa Polonia xe diventà la protetrice del mal de denti. "Essendo Polonia romana de nàssita e de bona fameja - i scominsiava - la gaveva imparà a lèzare e a scrìvare, che gera un fato raro ai so tempi, cussì, na volta convertìa al cristianesimo, la se dedicava a le òpere de apostolato. La andava in giro par le comunità cristiane a lèzarghe le létere de i apòstoli, a parlarghe del Vangelo e la curava, in particolare, l'insegnamento e la preparassion de i catecumeni.
Par i romani la gera na fontana de guai parché la convertiva sempre novi cristiani che, secondo l'insegnamento de Cristo, viveva e se comportava, anche nei confronti de le legi vigenti, in modo diverso da i altri, creando confusion e scàndalo.
Sicome la so fameja godeva de na serta reputassion presso le autorità del tempo, i ga passientà, i la ga richiamà, i la ga minacià, ma sensa che Polonia la se preòcupa più de tanto. La so fameja, che vedeva el cristianesimo come na peste, la 'a gaveva abandonà al so destin e proibìo de tornare a casa se no la cambiava idea. No i voleva comprométarse co le autorità e magari pèrdare el prestigio e cascare in miseria. Ma sicome Polonia gera decisa e se fidava del Signore, la ga continuà par la so strada, sensa fermarse mai.
Na sera e proprio de febraro, a causa de na spiada de qualcun, i la ga sorpresa in un posto segreto dove la catechisava i catecumeni. I la ga portà via e messa in preson co la acusa de seminare fra el pòpolo dotrine rivolussionarie e contrarie a le legi romane, fomentando, tramite altri so compagni fanàtici, rivolte contro le autorità e turbamento de l'órdine pùblico. I ga fato i sòliti interogatori, na spece de processo e i la ga condanà a morte, par la grande pericolosità che la rapresentava par el pòpolo.
El fato che la gabia avù na sorte de processo, significava un tratamento speciale par riguardo a la so fameja. Solitamente i cristiani vegneva incarcerà e torturà fin a la morte, sensa nessun processo, e sensa farghe savere gnente a nessun. Santa Polonia ga avù un tratamento speciale in sto caso ma no 'l xe bastà a salvarghe la vita. Visto che no la gaveva nessun segno de pentimento o de intension de cambiare, prima de tajarghe la testa, i la ga torturà cavàndoghe tuti i denti, uno a la volta co na tanaja infogà. La tanaja infogà forse ghe la zontava in più, qualche naratore fantasioso par butarghe del sale su la piaga.
Ma el fato che a causa de quel so martirio la sia sta messa a protession de quei che sofre el mal de denti, filava a maraveja.
Quando uno gaveva mal de denti, el doveva bagnare su l'acqua tiepida un rodoleto de molena de pan co un gran de sale grosso dentro e posarlo sul dente malà, ripetendo par quatro volte de fila, sete Gloria Patri in onore de la santa. La potensa de la fede che - come ne ga insegnà Cristo stesso - la ga la possibilità de spostare le montagne, tante volte se contentava de guarire anche el mal de denti.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Febraro:
Editoriale
'Desso ghè bisogno de otimismo
Fin che le robe le va ben... tuto va ben; xe quando le taca nare storte che ghe vole corajo a dirse: "Ciapa le robe come che le vien"
de Mario Klein
Da Belun
Al me rui de tosatela
de Luigina Tavi
Da Vicenza
El primo giro in bicicreta
de Ines Scarparolo
|
