Da Belun

Al me rui de tosatela

Al me rui: la prima cascata.

"Là, tel rui del zimitero, dove che l'aqua la se buta da 'n spunton e dó sot la fa 'n boion, se véa catà na olta e, no ne paréa vera, an mucio grant de creda: na miniera! Era 'n dì, in tra mézˆ l'inverno, an dì de quei che par primavera e despiase che vegna sera...
S'era 'ndati par canpanele: l'é là al posto che le gnen bele.
Era 'ncora bonora, l'era nat sol piciole foietine fate a spadeta, somejéa filet teneri d'erbeta, gnesti sù da sera a matina, par dir: "primavera l'é vizina!" Tel zercar, se ghe fusse stat magari anca sol na canpanela, avon catà de la creda tant bela, giusta par far su balete... era 'n dì che s'era 'ncora bocete. Avéa sofià al vent, al sol al sluséa, paréa che 'n pitor, co 'l so penel, l'avesse piturà tut de novo el ziel. I so colori, novi o rinfrescadi, dapartut li avéa semenadi. Po' i era 'ndati via, vent e pitor, lassando sta festa de slusori e i sass lustri i era 'nca lori. Bèi i àlberi, i boscat, l'aqua che coréa e andando tut la saludéa: "Ciao, àlberi, boscat, piante de canpanele, ciao, Boce, creda, sass, boion, ciao scaiete bele par al canpanon, ciao, rui, vae, me speta al mar! Có rive ò calcossa anca mi da contar. Contarò che volée fermarme su tel rui an dì che paréa e... era primavera, co na tosatela, no pararà storia vera, la diséa: 'Dài, fermonse qua... bocete, qua tel rui par senpre a far balete." Se era na vera s-ciapada de boce, dirìe propio cressesti longo al rui, dato che se véa inparà a conósser tut al so andar; da su tant sora la ferovìa, là so 'l pian rente al zimitero e dó, dó longo tuta la val, fonda e senpre tant selvàrega, dove sta so aqua la se buta te la Piave. Se coréa a "lu" pi spess ai primi de febraro, có la tera la scominzia a smolarse e sta vera selva cressesta co al calt, l'inverno la taje zo da parer squasi che an qualchedun sie passà co an faldin: segà via tut par farghe posto a na gran destirada bianca de canpanele che riva a speciarse, e so la scarpada a pustern i bucanevi e de là al solivo, eco rivar pi vanti ciòt de anèmoni e prìmole... che voler de pi! E po' anca sta creda... se véa mess su na vera fabricheta de balete, cusinade là entro al forno de la cusina econòmica... e scaje e scajete, no sol par al canpanon, ma anca par quel zogo che se le metéa in pie come birili.

La Chica e le canpanele... te 'l me rui de tosatela.

E, core al tenp come l'aqua... ognun de la s-ciàpada à ciapà la propia strada... la vita, se sa, la dà, la ciol e la lassa ricordi...
Anca al rui, poaret l'à vést e al continua a 'ver le so tribulazion. In zerti posti l'é stat sofegà entro tubi querti co tera, co sfalto tant che zerta zent, rivada dopo, manco la sa de "lu" de sto so 'ndar, de quele so rive che madre natura smaltéa de colori... tut griso! Par fortuna te la me zona al core lìbero: eco che al sbuca da sot la ferovìa, la strada, el va. Al bagna al prà che na olta l'era al prà dei Forti, do veciot - noni de tuta la s-ciàpada, al nono intento so i so laori de canpagna, la noca ècola anca la indenociada rente al rui a resentar la lissia... sparida anca la caseta, la stala, la vacheta che tant ghe piaséa pascolar... E... al rui dopo al prà eco pi vanti dói cascate e al va cantando fin a la Piave. Anca n'altro rui che ò vést modo de conósser e anca fezionarme, da su rente al Talvena al riva a la Piave... al mar. Che scoperta che ò fat, lassù, na matina d'inverno: là a mèda costa dove al rui se lo passa sol che slongando an s-ciant al pass... "E... l'aqua del rui / la se véa ingiazà / anca sora de ela / se véa poià la ne / paréa... che 'l tenp / al se fusse fermà / inveze... / l'é coresta via. / Fermar al tenp? Quante olte avrìe volest e ancora vorìe poder fermarlo!
Sì, torne senpre so sto me regno... a scoltar e parlar co l'aqua: "Aqua cara, aqua bela / par mi te se senpre quela / de quei dì ormai passadi / de quando che ere tosatela. / Carezando sass e piere / del to rui fin tel fondo / ti te va, te core via / che te speta n'altro mondo. / Te savesse, cara aqua, / inbrocando n'altra strada, / anca mi ò caminà... po' / qua, mi son tornada. / Son tornada tel to rui / a contarte i me pensieri / cussì, te pol missiarli / propio ben, co quei de ieri. / Ma, vorìe che te te fermesse, / qua, có riva primavera, / te savesse quanti fior... / i s-ciarisse fin la sera. / Sì, lo sò, che no te pol, / che come el tenp te core via, / el sognar che te te ferme / pi che sogno... l'é "follia". / Ma che inpòrtelo aqua méa, / mi... te pense senpre quela / aqua cara, aqua bela, / del me rui de tosatela."
Sì, le canpanele e tuti sti fiori de sto me "rui de tosatela" i s-ciarisse fin la sera... i me rasserena... i me mete entro forza... par continuar, come l'aqua par la me strada. Sto tant de mi, lo sa parfin i can... logicamente la Chica che festosa la me conpagna.

[torna sopra]