|
Da Adria (RO)
No te capissi n'òstrega!
 |
| I è senpre drìo far chelcossa... |
"No te capissi n'òstrega! No te capissi gninte! Possìbile ch'a no te ghe rivi?" Queste e altre frasi de sto gènere i è quele che le fémene ghe dise più spesso ai mas-ci. El belo l'è che le ga rason. (Le ga senpre rason!) Specialmente se la question la le riguarda lore diretamente. Parché l'è da bon massa difìssile riussire a capire le fémene. I è drio far chelcossa che, par lore, l'è particolarmente inportante e urgente; te le vardi darse un gran dafare ch'a par che le gabia el fogo soto le pajere. "Ciò, belo, no podarìssito mina tirarte sù e darme na man za ch'a te me vidi ch'a so' fin drenà?" "Basta ch'a te me disi, cara." "Valtri òmeni bisogna senpre dirve tuto, mai ch'a vedì có gh'è chelcossa da fare. Luri, bei calmi e tranquili là a lèserse el so giornale o a vardare chele semense ch'i ghe mostra par television! E nantre chì a drenarse, a rónperse el filon de la vita parché le robe le vaga un fià da cristian..." "Cossa voto? Dìmelo, ah, che mi na man te la dago..." "Dìmelo... te la dago... Mai ch'a te vidi co i to oci; tuto bisogna dirte..." Za, a la fine la se decide a dirte quelo che la ga in testa de fare e quala che la sarìa la to parte inte sto lavoro. E tuto va a posto. Salvo la ripetission de tuta la gnola có ghe vegnarà in mente 'n antro stranbesso che ti no te te podevi gnanca insognarte né de dire e manco 'ncora de fare! A ghe n'ò n'esperiensa fata fin da i ani de quando ch'a jera fiolato. In casa ghe jera tre done. Dopo maridà a n'ò mucià quatro. Sul lavoro - fasendo el mestro - có me catavo ben el raporto jera uno (mi) a quatro, ma el jera raro parché el più de le volte se passava a uno a sinque, siè e via discorendo; int'i ùltimi ani po' fra mòduli, lingua straniera, religion, sostegno e via de sto passo, jero rivà al lìmite de sopravivensa. Par fortuna che tenpo e paja madura le nèspole, cofà el sole co' le suche, e mi jero ormai ben tenprà; cussì jera difìssile ch'a me fesse ciapare da na paca de nervoso o ch'a m'insustasse. Comunque la dificoltà de capire le fémene l'è un fato: semo difarenti - e par fortuna! - de tuti do e del mondo intiero! - e va ben cussì. D'altra parte le done le dise altretanto d'i òmeni e cussì semo pari.
[torna sopra]
|
