|
Robe che càpita
Eco parché a go paura de l'aqua
Sicome so' stà oparà ai zenoci e caminare me stufo presto, par fare movimento, el dotore el me ga consilià de 'ndare in pissina. Me so' cussì iscrito a un corso de nuoto e ghe vago volentieri parché a me son fato anca de i amissi novi e me passo via na matina tuta par mi. Xe ormai un tòco che ghe vago, ma no go fato massa progressi, cussì me càpita de fare de chele bevude che a go paura che na volta o l'altra i me fassa pagare anca la boleta de l'aqua. Dopo tre mesi de scola, 'desso, la va na s-ciantina mèjo, ma no xe miga fàssie, eh! A ghe xe un saco de "stili"! Un giorno la maestra la me ga dito de provare a noare "a dorso": mi no savevo proprio come che 'l noasse un orso e cussì go vardà quelo che faseva st'altri. Noare "a morto" xe proprio quelo che me vien mèjo, ma fasso istesso fadiga parché có movo i brassi pa 'ndare vanti, che po' se va indrìo, me buto l'aqua in tel muso e... bevo istesso! N'altra volta a go provà a noare "a delfino", ma fasevo fadiga a tignere i piè vissini, cussì me trovavo 'ndare senpre più soto e no ghe la fasevo de stare sensa respirare più de tanto e cussì... bevi! A la fine a go deciso de noare a "stile libero", cussì a fasso quelo che vojo e no se ne parla più!
Se fin 'desso no go gnancora inparà a noare; la colpa no la xe mia: fin da putèo 'ndavo al mare ma in aqua ghe podevo stare poco o gnente. Có jero in colonia, se 'ndava in spiaja a la matina dopo la colassion, gera le nove pressapoco e le signorine ne diseva che prima doveva passare almanco quatro ore par via de la digestion. Ma anca se disévimo che ghévimo magnà poco, lore rispondeva che jera istesso, bisognava spetare e basta! Intanto passava el tenpo e vigneva l'ora de tornare a la colonia par el pranzo e cussì par la matina gnente bagno. Dopo disnà i te parava a fare un pisoeto parché, le diseva senpre le vigilatrici, el mare faseva diventare nervosi e cussì jera mèjo riposare un fiantin. Al dopo pranzo, prima de tornare al mare, i te dava la marenda e magnando se 'ndava in spiaja. Altre quatro ore par la digestion, cussì el tenpo passava e vigneva ora de tornare par sena e chel giorno el jera 'ndà! Chi xe che podéa inparare a noare? Gnanca bagnarse i piè no te riessiva, però te ghevi respirà l'aria iòdica e te stavi ben tuto l'inverno. El mare el faseva ben par quelo: i diseva che el jera un tocasana par l'inverno!
Me ricordo na volta che jero riussìo a scanpare da le sgrinfe de l'assistente e so' 'ndà drito al mare! Vissin l'aqua ghe jera na biondina che me piaseva e la se ciuciava de gusto un bel ghiaciolo a la fràgola. Mi ghe go fato el sòlito soriseto e ela me ga dimandà se ghi ne volevo un tocheto. Eva la xe senpre in aguato! Me son vardà torno par paura che i me vedesse smorosare e dopo go dà na smorsegada al ghiaciolo e son 'ndà drento in aqua. Finalmente, dopo tanto, jero riussìo a bagnare el costume e quelo che ghe jera drento, ma sùbito na vosse me ciama par nome e la me dise de vigner fora. Spaurìo come na oca, me vardo torno e, vista la signorina vigilatrice ghe digo: "Parché?" Ela la me risponde de vigner fora da l'aqua che go za i làvari viola. Mi serco altre rason par restare in aqua ma quela la insiste e la siga senpre pi forte, cussì vegno fora co la me coa in mezo a le ganbe. Tornando indrìo, vedo la me biondina che la 'ndava vanti a ciuciarse el so gelato e 'lora me vien in mente... "Porco can, el ghiaciolo: quelo me gheva fato i làvari viola, altro che l'aqua!" E cussì anca chela volta la xe 'ndà sbusa e so' stà co la me paura de l'aqua!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Aprile:
Editoriale
Late, sport e pumidoro
Da dove vienlo tuto sto goasto che rovina persone, sassina fameje, distruge sogni e fa morire speranze?
de Mario Klein
Robe de Ciósa
La Quarésema e le "carte onte"
a cura de Angelo Padoan
Da Verona
Le età de l'amor
"El dolor l'è senpre quel de alora; / come un cortel mai rùseno, / destinà a 'verghe gnaro par senpre / nel fodro del cor." (Ghedi - BS, 1936)
de Wanda Girardi Castellani
|
