|
Robe de Ciósa
La Quarésema e le "carte onte"
 |
| La più antica imàgine (xilografia) del famoso Cristo de San Doménego (cm 36x26), risalente al 1700. |
Fin quasi al tèrmine de l'Otosento a Ciósa el periodo de la Quarésema e spessialmente i vènare de Quarésema doveva ubidire a "règole" e usanse antiche e ben precise. A tal punto che el primo dì de Quarésema, cioè el mèrcore de le Sénare, che prescriveva l'òbligo de digiuno e de l'astinensa da la carne, tuti i bechèri tegniva serà le so becarìe: i profitava de la circostansa per portarse a casa i so "arnesi" de lavoro e pulirli co aqua de bógio, e fra questi anche la tapa (el "ceppo", in italian) de legno, dove che se meteva la carne per tagiarla. Restava verta solo 'na becarìa ne i vènare de Quarésema per permétare ai amalà de magnare de grasso su... prescrission mèdica, mentre a le doméneghe gera verte solo dó becarìe e qualche banco de vèndita al pùblico soto i pòrteghi de l'antico palasso del Granèro. Le "vere famegie cristiane" (come se lèze ne le crònache de quel tempo) in Quarésema beveva de matina el cafè sensa late e no le fasèva i "merendini" a metà matina e gnanche a metà dopopranzo. Gera proibìo missiare durante el pranso el grasso al magro e anche durante la séna de la doménega; gera proibìi pure i latesini e i cibi grassi ne i giorni de mèrcore, vènare e sabo, come pure l'ogio vèrgine de oliva ne i ùltimi quatro giorni de la setimana santa. Tuti i boni cristiani viveva alora co soli tre pasti al giorno a tute le età e quando un bambin domandava un tòco de pan, la mama ghe rispondeva che bisognava digiunare e no sprecare. 'Na tradission curiosa e che aveva anche un serto valore religioso, gera el cosideto Canto popolare de la Passion, che se meteva su proprio durante el tempo de la Quarésema. La gera 'na sorta de "sacra rapresentassion" perché se ripresentava fati del "Vecio Testamento", ma anche de la vita e de la passion del Signore e fati de la vita de i Santi. Ste "rapresentassion" le gera colegà a le antiche "laudi", conposission in versi, fra cui la famosa "Donna del Paradiso" de Jacopone da Todi (1236-1306). Queste se podarìa ciamare le prime testimonianse de drama popolare a Ciósa, ricolegàbili ai misteri medioevali e le gera un insieme de brani derivà da diverse region.
I testi de la Passion ciosòta i à forse un'origine semi-leteraria. In principio i doveva èssare abastansa regolari, ma col passare del tempo e de le generassion i veniva cambià secondo el gusto, la sensibilità e le abitùdini de òni coro. A una de ste rapresentassion pare che abia assistìo da bambin nel 1528 el famoso musicòlogo ciosòto Gioseffo Zarlino, che, apunto, a descrive una de queste preparà da i confradèi de la Scuola dei Batuti, fondà dal frate capucin padre Paolo Barbieri da Ciósa. La sacra rapresentassion se fasèva sóra un burcio (à scrito el Zarlino) per "fare" sù i schei necessari a la costrussion de la cièsa e de l'oratorio, che alora i gera fati de tòle provisorie. Sta sacra rapresentassion se tegniva ne le case durante la Quarésema e ghe partessipava fiòi, adulti e anziani d'ambo i sessi. La se fasèva drento 'na stansa abastansa granda, quasi sempre ne l'intrà de la casa e la se svolgeva in maniera del tuto primitiva. Gera le done che pareciava el tuto: in fondo a la stansa se stendeva un ninsiolo, che faseva da sipario, e da drio se sistemava 'na carta onta de ogio, illuminà per dadrìo da candele: se faseva mòvare, a seconda de i casi, varie figure de la Passion del Signore tagiàe in cartonsin. Le gera 'na sorta de "ombre cinesi" de ancùo. El canto se missiava al "parlato", sempre a òpera de done. I "spetatori" assisteva a scuro e el gran fògio de carta onta de ogio faseva védare le imàgini tegnùe sù e mosse co un bastonsin de legno. El "spetacolo" vegniva ciamà le "carte onte", perché onséndole le diventava trasparenti; el pùblico partessipava cossì intensamente che a se comoveva fin a piànzare e a se imedesimava cossì tanto ne i fati rapresentà che qualchedun de le volte manifestava la so rabia verso Giuda el traditore tirando 'na scarpa, un sòcolo o qualcoss'altro contro la "carta onta".
Sto originare "spetacòlo" scomissiava a un'ora de note e per entrare bisognava pagare un pomolin o 'na forchéta ('na forcina da cavéi, in italian) e più avanti un centésimo e a procurava un godimento che durava quasi dó ore.
El canto de la Passion
Agnello di Dio / di bianco fu vestito / la canna ei tien / chè davvero fu schernito. / Di spine s'incoronò / sulle tempie provò / dolore infinito. / Ponzio Pilato / poi comandò / che a fusse flagellato. / Un dio lasciò / che fosse flagellato. / Sangue versò / da ogni lato. / Poi lo mostrò / al popolo insolente / e questo gridò / contro Gesù cremente: / "Mora quel seduttor / con pene e con dolor / subitamente!" / Portò il Signor / da Erode in casa d'Anna / scorno e dolor / per l'iniquità s'affanna / schiaffi pontite e po' / da Pilato tornò / per la condanna (...) Maria trovò / per strada el suo Signore / che domandò dov'era el suo cuore. / Gesù se mette a dir: / In croce voi morir / pel peccatore". / El mio Gesù / era tutto impiagato / quando che fu / al calvario rivato. / La turba lo spogliò / sui panni ghe restò / 'l sangue attaccato. / Gl'infami ebrei / le tre croci preparonno / chiodi e martei / per conficcar partonno. / In mezzo a due ladro' / la croce sua si alzò / vergogna e scorno (...) Quando morì / il nostro Redentore / tutto quel dì / il mondo è pien d'orrore: / il sole s'oscurò / e la terra tremò / con grande dolore. / Viene Longin / con quel ferro spietato / fóra il divin / sacrosanto costato; / acqua e sangue versò; / con questo Dio lavò / 'l nostro peccato.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Aprile:
Editoriale
Late, sport e pumidoro
Da dove vienlo tuto sto goasto che rovina persone, sassina fameje, distruge sogni e fa morire speranze?
de Mario Klein
Robe de Ciósa
La Quarésema e le "carte onte"
a cura de Angelo Padoan
Da Verona
Le età de l'amor
"El dolor l'è senpre quel de alora; / come un cortel mai rùseno, / destinà a 'verghe gnaro par senpre / nel fodro del cor." (Ghedi - BS, 1936)
de Wanda Girardi Castellani
|
