Un archivio de la memoria

Confidense e passion de nono Bepi

Giuseppe Borina

Otantaquatro ani su la gropa, calegaro par passion e mecànico par necessità, Giuseppe Borina, el pi vecio fra i so sinque fradèi de i Canevèa, nominaja redità da so nono Gigi, cussì ciamà par via del so cavejo rosso-biondastro come el cànevo mauro; maridà co la siora Francesca, el ga 'vùo do fiole, maridàe da un bel tòco, che lo ga fato nono de sinque nevodi in créssare che ghe slonga la vita e pa 'i quali el deventa mato. Lo gavemo incontrà te la so abitassion, drio l'àrzere sanco del Piovego, a pochi metri dal cason dove che 'l xe nato, butà basso oramai da pareci ani. "Sò orgolioso de stare 'ncora qua", el ga tacà contarne a roda lìbara, "parché le raise de la me tàpara, secondo risserche fate da mi te i archivi comunali e parochiali, rissale al 1619, quando go catà scrito che un serto Santo xe stà el primo Borina batizà a Noventa. No sò stà bon de 'ndare più indrìo scalumando fra le carte parché i registri de la canònica se fermava lì, a quel ano."

El zóo, el primo atresso rancurà da Borina

- Na generassion de orìgine contadina la sua?
"Serto, de zente poareta che lavorava la tera e no me vergogno de dire che me pare Santi gera inalfabeto e gnissun de noaltri fioi xe rivà a fare le scole alte a Padova: semo fermà tuti a la quinta 'lementare. Mi, co un fià de fadiga pi de i altri, parché có rivavo a casa da scola, ancora col bocon tel gargato ciapavo i órdeni da me mare che gavéa lassà me pare a la matina bonora prima de 'ndare a laorare in concerìa da Mattioli. "Varda che ghe sarìa da inbeverare le verze", la me diséa bonànema, "e có te ghe finìo ghe xe da netare el ponaro, da vangare l'orto e po' da tajare le cane pa 'i canpi", quele che cressìa un fià partuto par via de la sortìa del canale e bisognava farlo a le svelte prima ch'i rivasse co la boarìa a arare la tera. Le lession de scola me tocava farle al ciaro de canfin, straco morto e pien de sono. Tanto xe vero che go passà la quinta da ripetente, dopo do bociadure."

Segon da tole a quatro man

- Come e quando galo messo sù fameja co so mujere Francesca?
"Fasevo l'amore co ela, oramai da sete ani, quando sò vegnùo casa da militare, dopo che xe finìa la guera, la seconda intendo dire, parché quela del 1915-18 la gavéa fata me pare, prova ghe ne sia che mi sò nato dal Vinti, do ani dopo, giusto el tenpo de sistemarse da capelan soto el coverto de i Cainati (Cavinato), parché essendo morti presto i fradèi de me mare Conceta, ghe gera bisogno de un omo che stesse drio ai mestieri. Anca mi no go possùo maridarme presto, come che me sarìa piasùo, parché tel Cason de i Canevéa no ghe stàvimo. Alora me pare ga fato sinque tòchi del so ètaro scarso che ghe gera tocà da le spartission fate co 'i sui e cussì se gavemo messo d'acordo fra fradèi, oramai tuti grandi e co un lavoreto pa 'e man (do calegari, do marangoni e un salamaro che lavorava da Collizzolli), par tirare suso do logheti da métarse al coverto. Cussì, essendo el pi vecio, mi sò partìo par primo a inpastarme la malta, anca parché intanto gavevo tacà lavorare da calegaro."

Bepi Borina co la so colession de stari

- Me pare de capire che lu xe uno de i do che ga ciapà el lavoro del scarparo?
"Quela xe senpre stà la me passion fin da bocia. Go scomissià drissando ciodi, fasendo busi co la subia al curame, tra sòla e tomara e tirando i spaghi inpegolài. El mestiero lo go inparà 'ndando calche mesa giornada da un serto Coje (Antonio Ferrato), maestro artesan che gavéa un bancheto da lavoro torno al quale se sentàvimo in quatro snarocioni co tanta voja de inparare el mestiero. La nostra, de la Riviera del Brenta, xe senpre stà na zona de scarpari che, dopo la rivolussion industriale, xe deventà famosa in tuto el mondo. Dopo 'ver messo sù un bancheto par conto mio e èssarme invià benesin rivando a fare un paro de scarpe al giorno, có xe vegnù vanti i machinari, la scarpa fata a man xe cascà fora marcà, siché par vìvare me xe tocà canbiare lavoro, cussi go dovesto 'ndare soto paron te na fàbrica de la Stanga, 'ndando in pension come metalmecànico."

Torcio mecànico (oferto da Anita Saccomani)

- Ma la so passion pa 'l dialeto e le tradission vènete come ghe zela maurà?
"Noaltri tuti de fameja, se gavemo senpre parlà in dialeto. Mi nato fra i sgrèbani e 'vendo conossùo fin da pìcolo le fadighe del lavoro de i canpi me xe restà tel sangue sta passion che go tacà coltivare co più intaresse da dopo che go conossùo le me antiche orìgini noventane, rancurando testimonianse autèntiche de quela civiltà contadina che par na vita go 'vùo inansi ai oci e che 'desso oramai xe rivà al tramonto."

Sgranatoio con sìvolo in banda (foto InVi)

- Fra la so colession "etnografica" ghe xe calche reperto al quale el xe pi afessionà?
"Ghe tegno bastansa a tuti parché, essendo sta usài te quei ani, a mi i me parla ancora de un mondo che no ghe xe pi, risvejando memorie del me passato che ricordo senpre volentiera. Però conservo calche tòco raro che oncò se fa fadiga reperire pa' i mercatini foravìa, come sto segon da tole, sto sgranatojo a puleja co 'l so sìvolo in banda, sto vaso da sotrativi e sta colession de stari da misura marcà e pionbà, doparài te i granari par vèndare biave. Quelo al quale ghe sò pi afessionà xe sto torcio a stela, na roba rara e de grosso pregio, un pèsso da novan-
ta che me ga regalà la signora Anita Saccomani."
- Ne contarìsselo un fato curioso de la so infansia?
"Volentiera. Se trata de la prima volta che co me pare, a scuro de luna, sò 'ndà a calare in canale la trèzola, un lungo spago con mèsa pierà ingropà da un cào e tanti ami ligài de picolon lungovìa, tuti coverti co la so véscola (esca), par lo più bigati de canale. No desmentegarò mai la maraveja e la sodisfassion che go provà a la matina drio quando sò 'ndà tirarla suso che go catà ingansà do bisati e na bela tenca. Gavevo ciapà da magnare par quel giorno."
- Grassie infinite, sior Bepi, la s-cetessa de i so ricordi pensemo che podarà sicuramente interessare ai letori de Quatro Ciàcoe.

[torna sopra]