|
Editoriale
Late, sport e pumidoro
Da dove vienlo tuto sto goasto che rovina persone, sassina fameje, distruge sogni e fa morire speranze?
 |
| In primo pian, Aurelio (Lello) Scagnellato, capitan Panzer (350 partìe da biancoscudato), de quando al posto del doping ghe jera... na bona bisteca de cavalo! |
Le batoste de sti ùltimi tenpi le pare proprio confermare che sto mondo el se ne strafrega de la morale e de la poesìa, e non solo de quela scrita da i poeti, ma anca de quela de la gente comune che vorìa vìvare in pace e in règola, che vorìa poder sbarcare el lunario senza teremoti, che ghe piasarìa sognare, entusiasmarse, vardare 'vanti, sostegnere, fare el tifo, esaltarse, gongolare de gioja quando el so beniamin sportivo ghe regala na vitoria. Ghè solo da sentirse delusi e tradìi par tuto sto marasma, sta buriana de aziende che scopia, de scàndali che se desgrana, de canpioni che pianta in asso baraca e buratini, ritiràndose par senpre dal giro de la vita.
El dio palanca, co tramaci e trafuji, el mete in crisi la pora gente, servéndose de persone senza dignità, che no varda in facia nissun pur de avere, muciare e scóndare. Cossa vorli muciare e scóndare che dopo i lassa qua tuto anca lori, e i gavarà da pagare a qualche Altro el male che i ga fato ai so sìmili qua in tera!
E el sport che no l'è pi quelo da quando el demonio ghe ga messo i cormi e el sportivo ga acetà de vèndarghe l'ànima, deventando na màchina che funziona a comando! Eco che 'lora l'atleta el se droga, el se "dopa", el tole descondon pastroci che ghe fa spuntare le ale ai piè, che lo fa xolare so le strade bianche de montagna, che lo fa deventare on superomo te 'l canpo da calcio.
La morte de on canpion del pedale come Marco Pantani, quela de l'ex zogadore de balon Nello Saltutti e, dio no voja, anca l'infarto de on zogadore nostran, i xe i ùltimi segni negativi de on tipo de sport che no 'l xe pi tale, da quando la forza fìsica, la resistenza, la lucidità mentale e la volontà no dipende pi da l'atleta, ma le vien decise tute t'on laboratorio chìmico. Pochi esenpi de protagonisti distruti e de sogni, entusiasmi, passion e miti sofegà a tradimento. E tuto questo càpita senpre parché, dedrìo de l'atleta, del zogadore, del ciclista, ghe xe altri intaressi ben difarenti dal trionfo del sport, ghe xe obietivi che no punta al significato de l'inpresa, ma al "valore indotto", cioè a quelo che l'inpresa rende in zanzani!
Se no se ghe metarà un freno a sto malcostume, anca el sport pi sano, pulito, leale, onesto, inteligente sarà destinà a morire... insieme con chi lo pràtica: vìtime de na cultura assurda che senpre se rifà... al dio palanca. On dio fredo, àrido, spietato, crudele che, dopo averte portà su la cresta del sucesso, el te mola sora la lama de la pegior solitùdine.
Comunque... mai pèrdarse de ànimo! Da sti interogativi e da ste considerazion ga da créssare la nostra volontà de ostacolare l'òpera de i furbi, de i disonesti e de i senza scrùpoli che mira senpre al risultato fàssile, e de difèndare el lavoro onesto, el guadagno dignitoso, el sport senza doping.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Aprile:
Editoriale
Late, sport e pumidoro
Da dove vienlo tuto sto goasto che rovina persone, sassina fameje, distruge sogni e fa morire speranze?
de Mario Klein
Robe de Ciósa
La Quarésema e le "carte onte"
a cura de Angelo Padoan
Da Verona
Le età de l'amor
"El dolor l'è senpre quel de alora; / come un cortel mai rùseno, / destinà a 'verghe gnaro par senpre / nel fodro del cor." (Ghedi - BS, 1936)
de Wanda Girardi Castellani
|
