|
Editoriale
Da la parte de mame e putini
Da i tremendi deliti de sti ùltimi tenpi parte un segnale preocupante da ciapare sul serio, prima che sia massa tardi
 |
| I putini ne intèroga: forse bisogna tranquilizarli su la storia del lupo cativo in casa... |
"Maledeto el saère massa"
diséa me mama, ironizando su la so terza elementare; "maledeto el saère massa brute robe e massa in pressia" vien da dire 'desso, co sto tenpo col pelo te 'l core. No sò se quei che stemo vivendo i sia proprio tenpi pezo de quei de na volta, ma de sicuro 'desso se vien a savere massa robe che te fa scareze al solo sentirle contare e che te lassa drento on dolore che no va via gnanca co le pulizie de Pasqua.
Massa orendi sti casi de violnza su creature inocenti e su mame, copà tra i muri de casa, on paradiso domèstico trasformà in macelo. Se fa fadiga anca a catare parole par parlàrgane e par afrontare el problema.
No credo che possa bastare l'esame de i studiosi del crìmine, che de sicuro i parla de raptus omicida, de disturbo mentale, de impulso violento e improvviso ma privo di coscienza... Bisogna fare de più, bisogna che se domandemo cossa ghemo fato parché no ghe sia el clima adato, l'anbiente ideale e le ocasion propizie che fa scopiare sti conportamenti bestiali.
E parché proprio su i putini, su i minori e su le done?
Parché i xe i pi déboli! E solo su i pi déboli se pole roversare tuto quelo che cativi maestri (la strada, el cìnema, la television, la droga, la guera, la stralibertà, el turismo sessuale...) ga insegnà e continua a insegnare!
Se no se ghe metarà on freno a sto "libertismo" de parola e de azion, dove naremo a finire?
Tra "grandi fratelli" e "talpe", tra "isole dei saranno famosi" e guere in direta, tra scontri in Parlamento e sène scabrose de sesso che no ga gnente a che fare co l'amore... anca el massacro de na putina de du ani e mezo o de na mama copà insieme co so fioi, no i ne fa quasi pi inpression. Questo xe el drama pi grando: do làgreme, do giorni che se ghe ne parla e tuto finisse lì.
Semo drio deventare cìnici, fredi, de piera.
E quindi portà anca a la crudeltà, a la pèrdita del rispeto de i sentimenti, a na toleranza che rasenta l'indifarenza, anticàmara de la non-civiltà!
Qua no xe el caso de èssare "bacchettoni" o "retrogradi": xe el caso de fermarse fin che se xe in tenpo. Anca nel progresso, ogni passo in avanti ga da nare sul sicuro. Vardè quanto la xe invadente e invasiva - e dàghela! - sta television: bisognarìa cronparse 10 automòbili, 8 tipi de cafè, 9 televisori, 5 tipi de carta da cesso, 6 telefonini, na montagna de pasta, on mare de detersivi... e tuto par na vita soltanto! Na vita intacà da tute le parte: da le malatìe, da la cativeria, da le tasse, da i prezi che cresse in barba ai euro che cala, da l'insicureza che ne tormenta, da legi senpre pi déboli...
No me se vègna a dire che tuto questo no ghe entra co la violenza su i putini e su le mame. Ridusendo el valore de la vita e calando la so difesa, xe ciaro che le prime vìtime le sarà senpre le stesse. Vìtime de na società che xe drio pèrdare el cuore e che ris-cia de sostituire el valore de le robe che conta con la sola e pura esteriorità.
Sicome da qualche parte bisogna senpre stare... mi dirìa che xe el caso de stare da la parte de le mame e de i putini!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Majo:
Editoriale
Da la parte de mame e putini
Da i tremendi deliti de sti ùltimi tenpi parte un segnale preocupante da ciapare sul serio, prima che sia massa tardi
de Mario Klein
Cultura orale
Na onza e meza de speranza
Da un insustoso sgrugnoto desbrocà fora da i denti in malo modo e co insolensa rabiosa, t'un logo pùblico pien de zente, xe nata l'ocasion de ficare el naso te na pelagnara, un inserto modesto custodìo con cura, come na risorsa pressiosa, ne le fameje contadine de na volta
de Dinerio
Da Thiene (VI)
Intorno al fogolaro
Ne 'e longhe e frede sere de inverno, al caldo del fogolaro se faséa filò
de Bepin Daecarbonare
|
