|
Da Thiene (VI)
Intorno al fogolaro
Ne 'e longhe e frede sere de inverno, al caldo del fogolaro se faséa filò
 |
| El fogolaro inpissà dove la sera se catava intorno tuta la fameja. (foto Bruno Dalle Carbonare) |
Questa xe na storia contà da Albino Dall'Alba de Vacaria (Brasile) nel 1993... "Tornemo indrìo verso el 1917. Mi ghea alora 6 ani e da chel tenpo me ricordo de tante robe. Noantri se gera na fameja granda, oltra i genitori gèrimo in 13: 8 sorele e 5 fradèi.
Come se magnéa a chel tenpo? Bon, no se ghea mia un fogon come 'desso, ma un fogolaro. Prima de nare in nana, l'ùltima racomandassion la gera senpre la médesima: "Ricordeve de cuèrder el fogo co la cendre"; par far sto laoro se uséa na paleta. Cossì el primo che se levéa sù la matina te na s-cianta el inpisséa el fogo co le bronse del dì vanti.
El cafè de la matina
Te la nostra cosina se ghea el canton de 'e legne, longo do-tre metri. Sul fogolaro che gera na napa fata de strope "rebocà" de tera bianca, che tiréa sù el fumo. De le volte la nostra casa coerta de scàndole la ciapéa fogo insima tel camin e 'lora la mama la trea sù tel fogo un poco de sal par smorsarlo.
Par picar su i brondi sul fogolar se uséa na caena. La matina par far el cafè se tachéa la cafetiera tel gancio de la caena; co un bel fogo in poco tenpo l'aqua bojéa. El mànago de la cafetiera el restéa caldo; 'lora se ciapéa na pèssa de la polenta e se podéa tirar dó la cafetiera o altri brondi sensa scotarse le man.
Dopo se metéa do guciari de cafè; parché 'ndesse do i fundi che restéa tel bèco de la cafetiera se metéa un poca de aqua. Dopo do-tre minuti el cafè el gera bel che pronto. E quando se gujéa el cafè no vegnéa mia fora i fundi, che i se butava via solo dopo na stimana; parché no i deventasse agri no se metéa mai sucro ne la cafetiera. De règola se indolséa el cafè col miel e col sucro rosso che 'l vignéa da Santa Catarina. Ma senpre se ghea in casa sucro Usina, bianco, par quando vegnéa calche vìsita inportante.
El late el gera bujo te la ghisa sensa mànego, metesta in sima el trepìe. Se ghea late de vaca e late de cavra. El popà el magnéa el cafè te la scudela, ma senpre col late de cavra, che 'l gera considarà un grande rimedio. Col cafè e late se magnéa sol pan.
El magnar del medodì
A chel tenpo no ghe gera relogi; alora quando se gera in canpagna par saver se gera medodì se vardèa el sol e l'onbrìa de 'e piante; ghe gera un pin che quando la onbrìa la rivéa su la divisa de la colonia gera ora de 'ndar casa a magnar. Ma el relojo pi giusto gera propio la fame. Se magnéa casa quando se gera darente le nostre case. Se magnéa polenta, tajada col fil de la polenta, formajo, salado, ovi coti te l'aqua o fortaja, carne de vaca, calche galeto o capon. Calche volta ghe gera carne de cavreti co quaranta dì slevài solo a late. Prima de coparli se ghe déa raquanto late, e 'pena copài se ghe tiréa fora el stómego ancora pien de late, se ghe metéa na bona presa de sal e dopo se pichéa sto stómago de late su le travi de la cusina e sto late indurìo el gera el conajo (caglio) par fare 'l formajo. I cavreti se li cosinéa a rosto. Tante volte se magnéa osèi co polenta e vin che no ghin manchéa mai; radici e altre verdure ghin gera senpre a volontà.
Quando se laoréa distante da casa se portéa el magnar te la sestela de la polenta; se gera caldo se 'ndéa soto calche onbrìa, senò se magnéa te la ròssa (roggia) tuti torno la sestela.
La sera el magnar el gera na minestra ben tenperada. La mama la savéa far un desfrito te la parsora che la resta bona che mai.
Come vedì, sti ani se magnéa quasi sol quel che se cultivéa a casa e da le bestie che se slevava, come le vache e le cavre, ne i potrèri o te i staloti, come i porchi. Cada do-tre mesi se copéa un porco par far i saladi, le cope, le sopresse, i codessini, le mortandele, brasole e altro... La carne de vaca la se cronpéa in becarìa. Altri gèneri che se cronpéa el gera el sale, el sucro, el cafè e la farina de manioca par méter te la feisoada co i ossi de mas-cio. In soma, el magnar in chei tenpi el gera guadagnà col nostro sudor e par questo el diventéa pi bon; el gera san, sensa veleni, nò come sucede al giorno de ancó."
de Bepin Daecarbonare
Da "Vita, storie e fròtole" a cura de R. Costa e A. Battistel.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Majo:
Editoriale
Da la parte de mame e putini
Da i tremendi deliti de sti ùltimi tenpi parte un segnale preocupante da ciapare sul serio, prima che sia massa tardi
de Mario Klein
Cultura orale
Na onza e meza de speranza
Da un insustoso sgrugnoto desbrocà fora da i denti in malo modo e co insolensa rabiosa, t'un logo pùblico pien de zente, xe nata l'ocasion de ficare el naso te na pelagnara, un inserto modesto custodìo con cura, come na risorsa pressiosa, ne le fameje contadine de na volta
de Dinerio
Da Thiene (VI)
Intorno al fogolaro
Ne 'e longhe e frede sere de inverno, al caldo del fogolaro se faséa filò
de Bepin Daecarbonare
|
