Cultura orale

Na onza e meza de speranza
Da un insustoso sgrugnoto desbrocà fora da i denti in malo modo e co insolensa rabiosa, t'un logo pùblico pien de zente, xe nata l'ocasion de ficare el naso te na pelagnara, un inserto modesto custodìo con cura, come na risorsa pressiosa, ne le fameje contadine de na volta

"Fate soto ca te toca ti, ciò, tripona da l'ostia! Chissà ca te ghe moli de farte tondare i sintiminti da chel pantalon seco incandìo che sèita molarte filo da la quarta. No te si mia ingaletà che basta ?"
Sanpitoco, canpare par sentìrghene! Questa, Barba, la me xe propio nova dal tuto. Gero in fila in banca luni matina par pagare l'afito, có me xe capità de scoltare sta rognada fata da na arzila ansianota pitosto trasandà e inpassiente che no ghe 'ndasèa a genio de soportare i discursi e le moine che se baratava na cubia zóvane davanti de ela. Mi la go ciapà in rìdare come na paternale fora posto, ofensiva e de cativo gusto, anche se strucando le spale come do sornioni duri de recia, i la tegnéa ancora longa faséndosene ajo cuco del so predicare. Ti come la pènsito?
Ca te vègna n'assidente strangoso, Lalo, ma te càpitele tute a ti? Intanto la pansona ingaletà ga da èssare stà insinta e sto fato ne fa ciapare na strada ben precisa che se conbina puìto co quel filo che vien da la quarta.
Spiègate mèjo.
Si, nando drio al verso che ga fato tirar la boca in smarziora a quela veciota su i spini, te m'à verto na pàgina de ricordi che solo pensàndoghe, quei trìboli de 'lora m'insèa tuto el curvon del palà fin al barbìgolo de l'ingiotauro. Pa farte àsio col dire, cade ca te sapi che pa 'e fameje de canpagna, có se magnava de magro anca a quarésema finìa, se slevava i cavalieri da seda. Fin a pochi ani dopo l'ùltima guera, có stasévimo zo par la Bassa Padoana, anca a casa nostra se tegnéa ano par ano na onsa o poco pi de somensa da slevare par vèndare le galete. Na pressiosa risorsa par 'e scarsele del contadin. No xe che gai inamente da intiero l'inviamento che danava l'ànema a tuta la fameja có nasséa i langhi, tuti niri, che se movéa cofà on formigaro. Me ricordo che to nona, bonànema, soto San Zen (12 aprile) la tacava tediare to nono che 'l stesse in traza al marcà fin che 'l catava in piassa na partìa de roba bona e conveniente da tòrghene na onza e meza, sinò i ovi prenotài al bacològico de Montagnana ch'i gera pi sicuri, drio na invernada incagnìa, i costava un ocio de la testa. Có i rivava casa, ela la i lavava puìto col vin bianco par disinfetarli, po' la i metéa a polacio drento na foreta bianca ben destirài sora on folio de carta zala da casolin, fra el paion de scartossi e el stramazon de pena parché i stesse al caldin de note. De giorno, un paro de volte al dopodisnà, la ghe passava sora el nissolo col scaldaleto pien de bronse foghenti sofegàe dal sendron, sinò la ghe diséa a to nono: "Pace, 'ndè butarve a fare un pìsolo cossì tegnì in calda quela somensa." Có Dio voléa, da San Marco (25 aprile) i nasséa e da lora tuta la fameja se daséa le man da torno pa no farghe mancare el pasto. Tutti i dì, a ranpegarse sù e zo da i morari a pelare foje gera na struma che tocava a noaltri boce. In primo entro to nona la ghe stajussava infin co na róncola ben gussà el fojame che ghe portàvimo casa noaltri snarociuni, na provista giornaliera che dovéa èssare senpre fresca sinò te la corba la podéa fare el bojo. La so corensa de bisogno quotidian la ghe scarmenava lesiera lesiera soravìa anca do-tre volte al dì, co la 'vertensa, man man che i cresséa, de sgrandarghe el tamiso che li tegnéa rancurà. Intanto, giorno dopo giorno, to nona che la tegnéa senpre soto ocio la créssita de le so bestiole, perdendo de vista parfin el ponaro, có ghe paréa 'minente l'ora de portarli basso, la ghe daséa òrdane a Elio Cereghin, un segantin de sata bona da marangon, che vegnéa a giornata da noaltri so 'l fare de l'istà, de tapare in camarassa na bela pelagnara a sie calti de rele. Dopo la prima mùa, quando i cavalieri canbiava el colore de la pèle deventando biancastri co na stela in fronte, la i faséa portare basso da la so càmara da leto co tuti i riguardi del mondo e, se gera el caso, la ghe faséa dare na sfogarà par stenparare l'anbiente. La tegnéa quele bestiole cofà che la gavesse pa 'e man l'oràcolo. Col racolto de le galete la savéa che la se rangiava a far suso la dota a le me sinque sorele che, pistando i pie, le naséa in gara fra de lore par maridarse. El tristo vegnéa se, qualche ano in majo, de note s'inbrocava na brosemada come, lustrando le ranghine inrusenìe te la me melona, me vien inamente che xe capità un paro de volte e s'à brusà le foje de i morari. Sicome la nostra possansa de piante no la gera tanto gajarda, a to nono ghe tocava nare in serca de cronpare fojame foravìa, ma el costava cofà l'oro. Alora de sera col scuro se rangiàvimo noaltri tosati a sgranfignare da i altri che gavéa i morari a la remocia, col ris-cio de ciapare na s-ciopetà te i legssi. Defati coréa el deto: "birbo chi le galete suna dai ciari de luna".

In ste do foto d3 regime... na pelagnara a quatro calti (a sx) de rela e la fameja impegnà a desgaletare. (foto de Ario G. Stevanin)

Fra na drita e na storta se rivava dal Santo e voléa dire che i cavalieri gavéa za fato el so quarto sòno, ossia la so quarta muda e i gera maùri par ingaletarse. "I cavalieri no dà pensieri se da San Marco i nasse e Sant'Antonio ghe mete le fasse". Gera questo el proverbio che tegnéa tuti i slevaduri a l'erta. 'Lora s'inbachetava a spaliera i calti de la pelagnara co de le frasche seche parché le bestie par filare gavéa bisogno de tacarse so 'l sicuro. Quando le galete gera rivà tute a cao, se sgaletava sernendo le mèjo da i sboci stracanpìi, da i bòssoli sbusoni o, pèso 'ncora, da quei butà in vaca. To nona la gera cussì meticolosa che la pareciava un prodoto che faséa invidia a védarlo.
Finìo l'assidio del slievo vegnéa portà el racolto al marcà de Cologna dove ghe gera tre filande grosse che funsionava. Finalmente gera rivà l'ora de portare casa quel fià de providensa considerà na vera risorsa pa i bisugni de la casa.
Grassie, Barba, da sto raconto go vissùo le ansie de la to infansia.

[torna sopra]