Da S.Stefano de Zimela (VR)

El luamaro

Chelo che resta de un luamaro de na volta: Francesco ghe vien da ridare a vedere ste robe...

A dire la verità a ghe go messo un bel poco de tenpo a decìdarme de scrìvare 'sto artìcolo chì parché a tratare de zerte robe mi a me fo ancora na s-cianta de riguardo. Ma dopo a go pensà a do robe: primo, el luamaro el fa parte a pieno dirito de la storia de la nostra civiltà contadina; secondo, aromài la pianificazion mondiale la ga portà anca da noantri la globalizazion de la maleducazion e de le sporcarìe dapartuto e cussita tuto el teritorio a el xe deventà un luamaro, ma no de chei seri e rispetàbili de 'na olta.
I fossi, le piazole drio le strade, i posti un poco sconti i xe diventà discàriche indóe che i ghe buta de tuto, che parfin a go visto un bloco motore de na automòbile co' drento ancora i so pistoni.
I vèrze i finestrini de la màchina e... zac... fóra el sacheto de imondìzie, el pacheto finìo de le sigarete, el bussoloto de la bìbita, la botilia de plàstica de l'aqua minerale e calche olta anca quela de vero de la bira. E dopo ghe xe chei che, fermi al stop o col semàforo rosso, i sbacia (socchiude) la portela e i uda par tera le ciche del portacénare che magari a casa sua so mojere la ghe fa métare le patine par girare e a ghe tóca fumare in t'el balcon anca de inverno parché senò la lo sbrana se'l buta la zénare sul pavimento.
E dopo a ghe xe i cani che i so paroni i ghe fa fare i so bisogni su i marciapiè che i deventa come dei canpi minati che a bisogna che te camini vardando ben indóe che a te pesti e i li porta anca su l'erba de i parchi indóe che a ghe va a zugare i putini.
E ancora i spuaci par tera, la roba pi schifosa che a ghe sia. Par ani e ani prima e dopo de la guera i ga conbatù 'na gran batalia par far sparire 'sto bruto vizio che, tra le altre, a l'è portatore de malatìe. Se ve ricordè a ghe iera la canpagna antitubercolare che el so sìnbolo el iera 'na croce rossa co du brazi, co chelo de sora pi curto de chel'altro e che dopo a go savù che la iera la croce de Lorena: tuto fià butà ia par gnente!
Anca i canpi i ga 'vu la so bela batosta. 'Desso i xe deventà de le latrine indóe che tanti 'levatori i ghe buta i liquami de ogni tipo de bestia, cussita come che i xe stà 'pena cavà da i alevamenti che zerte olte a te te senti stofegare par la spuza.

... e mi me vien da pianzare a vedare sto luamaro drio le strade

Ma el vecio luame (stallatico) nò che no 'l spuzava, anzi a se pol dire che a modo suo el gavéa un so odore, quasi un so profumo.
In t'el luamaro a ghe finìa tuti i rifiuti de le stale e tuto quelo de orgànico che no podéa mia èssare riciclà par i animài de la corte. A caduta lìbara a ghe naséa anca i prodoti umani, in colegamento direto co' el cesso che imancabilmente el ghe iera su un so canton. El cesso, de canoti, de asse o de quarèi, el iera anca la "sala de letura" de la fameja parché par carta igènica se doparava le pàgine de i giornài veci, sostituìe in te i ùltimi tenpi co le schedine vanzà del totocalcio, roba che la ga portà un abassamento culturale par mancanza de notizie da lèzare.
In te nantro canton del luamaro a ghe iera ricavà un pozeto quadrato co' de i busi a la base demodoché el se inpinasse de pisso (urina). In te chel pozeto lì a se ghe metéa in moja (ammollo) pali e pèrteghe parché cussita i se inbonbegava (si inzuppavano) ben ben che dopo i deventava inatacàbili da i bai (insetti) e anca no i smarzìa mia 'na olta piantà par tera.
Co' un palo co' in fondo fissà un bussoloto e, 'pena finìa l'ùltima guera, un elmeto todesco, a se toléa el pisso da el pozeto par bagnare ben ben tuto el luame parché el maurasse al punto giusto prima de èssare portà in te i canpi.
Par concimare i fiori e inspecialmente i gerani, le done le naséa par le strade a rancurare (raccogliere) i petoloti (escrementi) de i cavài e de i mussi e dopo a i li metéa in màsara (a macerare) in te l'aqua in te de i bidoni. Passà el so tenpo i doparava chel'aqua lì par bearare (innaffiare) le piante. In te l'orto e in t'el giardin come concime le done a le ghe butava anca la zénare del fógo (del focolare o della cucina economica) e anca el calùzene de i canoti (tubi) de la stua quando che i li netava a primavera.

[torna sopra]