Tradission e folclore in Lessinia

La festa de i tronbini

Nereo Stoppele, presidente del grupo Pistonieri.

La prima doménega de giugno Badia Calavena, comune ponà tra le pitoresche e malgualive coline de la Lessinia, in provincia de Verona, el se tira a lustro par la tradissionale festa de "i tronbini", i caraterìstici s-ciopi da parata che da sècoli co i so sbari anuncia e 'conpagna i avenimenti bei e bruti de i "Badioti".
I tronbini, o pistoni, come anca se usa ciamarli, i xe curiosi s-ciopi co la cassa de legno trocagnota e la cana curta che finisse a inpiria o mèjo a boca de tronba, come riciamà dal stesso nome de l'arma. L'antica usansa de far sbarare i tronbini in ocasion de feste civili e religiose, sagre, gare atlètiche e altro, tegnùa sù fin i primi ani sessanta del sècolo 'pena passà (l'ùltima volta che i gaveva sbarà in bateria gera stà nel 1962) coreva el ris-cio de 'ndar in desméntega, se on s-ciapo de amissi apassionà de cultura e tradission locali no i la gavesse ravivà formando nel magio del 1992 el grupo folclorìstico ciamà "I Pistonieri dell'Abbazia", denominassion ciapà da l'antica abassìa benedetina presente in logo, che dà anca el nome al paese, cioè Badia, sinònimo de la stessa.
El grupo, forte de oltre on sentenaro de soci, tra pistonieri (chi manegia le armi) e sinpatisanti, organisa assenblèe, convegni, i gira e i se esibisse in tuto el Vèneto, in Italia e a l'èstero, par tegnere alta e far conóssare al mondo la bea tradission. Siè ani fa, nel 1998, xe stà publicà co la partecipassion de l'Aministrassion Provinciale de Verona, on bel volume intitolà "Il Tronbino - I Pistonieri dell'Abbazzia di Badia Calavena I e II Convegno Nazionale". L'elegante libro, edission a cura de Nereo Stoppele, presidente del Grupo Pistonieri, stanpà da le grafiche Busti de Colognola ai Colli (VR), mete ne le varie relassion de i colaboratori on fraco de notissie e curiosità riguardanti el tronbin. La storia de i sbari e de i tronbini, xe sicuramente antica ma inserta. Ne le documentassion de sècoli indrìo, rancurà so i archivi, se parla de spari de armi par la fine de 'na epidemìa de peste, pa 'l ritorno de i soldà da 'na guera, par saludare on ano novo o conpagnare i riti de la setimana santa e altre ocasion oncora, ma no i mete né l'arma né la fatessa. Se pol 'ver pèra tratarse de tronbini solo verso la metà del 1800. Pare, che la fatessa del tronbin el sia fruto de 'na evolussion de le colonbrine venessiane e spagnole; risulta anca che on tenpo i sia stà usà come arma da sparo (più par far paura che par altro) in man ai valigiani e gendarmi cinbri che difendeva i passi e i confini che portava in Lessinia.

Pistonieri del grupo co i tronbini in primo piano.

'Desso el tronbin par 'verlo eredità o par 'vérselo fato fare novo, el xe presente in quasi tute le fameje e i se tira fora oltre che in ocasion de le feste paesane, a la nàssita de fiòi, batesi, matrimoni e altro.
'Na volta come 'desso, par rèndarlo pi personale, ognun el ghe fa intajare so la cassa o so la cana, a seconda del gusto, figure de animali, màssime, modi de dire che ghe dà on'inpronta ùnica e personale del paron.
El tronbin vien fato de sòlito grando o pìcolo a seconda de chi che lo dòpara. Però pi grossa e pesante xe l'arma, pi forte e entrante dimostra èssare el paron. El peso va de sòlito da i venti ai quaranta chili. Ecessionalmente ghe ne xe stà censìo uno de cinquantasete chili e par farlo sbarare bisogna tegnerlo in do. L'esibission in baterìa la vien grosso modo cussì: el pistoniere col tronbin posà par tera, ricevù dal comandante de la baterìa la giusta dose de pólvare nera, el la buta dentro so la cana, fricàndoghe drio man a la stessa de i tòchi de carta de giornale e co on tòco de legno e na massa, senpre de legno, el la fraca in modo da creare cussì la càmara a scopio. Inbrassà l'arma co la cana puntà verso tera, el pistoniere (anca se no ghe xe perìcolo, co 'l garìtolo de la ganba pi vissina a la cana, inbragà da un scalsiroto de pele, dito s-ciavin, el speta el suon de 'na tronbeta che segnala ai presenti che xe drìo rivare el sbaro. Al sbaro del potente colpo, par amortisare el rinculo, el pistoniere fa 'na specie de mesa piroeta, mentre tra on batiman generale de i festanti tuto 'torno se alsa on gran fumarò.
Ne la relassion riportà nel libro, fata dal sìndaco de Badia Calavena, Stefano Valdegamberi, piena de anèdoti e curiosità, ghe xe 'na tiritera che dise: "Vedermi ti fò spavento/ provami che resterai contento./ Abbi maniera nel caricare/ se in terra non vuoi andare/ il piacere che tu mi fai/ sempre in spalla in terra mai".
Rivà a sto punto 'ne resta solo de 'ndare tuti a Badia Calavena, par amirare e farghe onore a l'antica tradission. 'Na giornata a l'aria pura e in alegrìa, on regalo senpre pi raro da farse.

[torna sopra]