|
Da la Marca
Castagne e maroni
Ne le nostre çità l'inverno no 'l se presenta solo che col canbio de i capi de vestiario ne le vetrine, l'aria pesante par le esalassion del riscaldamento e la publicità del Nadal mesi prima, ma anca col profumo de maroni e castagne che se brùstola drento a le rostidore posàe sora i fogoni a carbon in qualche canton de strada o de piassa.
Par noaltri fortunatamente la castagna la xe un golosesso, 'na specialità oramai careta che uno se gusta par cavarse la voja, ma fin a quaranta ani fà la castagna co la so farina nutriente la jera el pan de i puareti e ne le coline de la pedemontana trevisana la çena de i montagneri la jera fata co un piato de late calda e tre castagne lessàe, i famosi "mòndoli" de i nostri veci.
Da quei paeseti vegneva zo in pianura, prima col caval e dopo col camion, la zente de i boschi par scanbiar castagne co panocie o formento o fasiòi: un chilo de farina el valeva un chilo de farina de formento, ma el ghe ne valeva do de soturco e questo dise in che considerassion fusse tegnùo el fruto de la castagna nel mondo contadin.
Al dì de unquò se preferisse i maroni, pi grossi e consistenti de le castagne comuni, mentre che 'na volta se çercava de otegner le varietà pi bonorive e pi tardive, anca se manco frutose, che consentiva 'na provista abondante par l'inverno. Par farle durar de pi le castagne le vegneva anca secàe, diventando cussì "stracaganasse" che se podéa magnar par tuto l'ano avendo boni denti; chi no gavéa denti se rangiava faséndole desfar nel late de bojo, formando 'na specie de crema; chi podeva permétarselo el mescolava la crema col miel.
Co la ripresa de la castanicoltura i produtori, anca par sfrutar mèjo tere incolte o poco produtive, i se ga rivolto a le varietà antiche, che conprendeva specialità bonorive come le "bonete", le "rossete", le "castagne de la Madona" e anca quele tardive come le "castagne de l'apòstolo", quele de "la mort cea" e quele "de la brosa" che no ga bisogno de tante cure par evitar le malatìe, ma le xe oramai squasi sconparse quando che no le se ga inbastardà.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Novenbre:
Editoriale
Cossa xela sta crisi?
Ormai el xe tuto on discoramento su la situazion generale che se ga fato crìtica. Se ghe dà la colpa al governo, a l'euro, a la guera, al petrolio...
de Mario Klein
Da Belun
Ai tenp de na olta
de Biancamaria De Vecchi
|
