|
Editoriale
Come canbiare el mondo
El mondo xe drio passàrsela maloto. Xe necessario intervegnere. Ma come? Canbiando la cossienza, el cuore, l'imaginazion
 |
| A sto punto xe ben fermarse e riflètare so on progresso ragionévole... come fa sta Santa Caterina, te on quadro de Carlo Dolci (sèc. XVII, Salisburgo Residenzgalerie). |
Ormai no ghe xe pi dubi: el mondo no 'l pole pi restare come che 'l se presenta in sti ùltimi tenpi. E no ghe xe scorciatoje: l'alternativa xe la fine de tuto e de tuti e questo ne dispiasarìa parché ghe nemo de mezo anca nialtri. Xe on tòco che el tenpo tànbara e se no 'l canbia, i xe afari seri. Se ghe tegnemo a vìvare, forse xe mèjo che coremo ai ripari. El cielo se ga fato scuro e l'aria minaciosa: el fondamentalismo e el terorismo che se sconde drio la religion i xe i do mostri che sta metendo a ris-cio l'umanità.
El massacro de i àngeli de Beslan xe el segno evidente del necessario canbiamento. Pecato che ghe gabia vossudo on disastro cussì grando par svejare i sordi, i tièpidi, i incrèduli, ma d'altronde, la xe senpre stà cussì. E par canbiare, dopo l'enésima strage de inocenti, bisogna che metemo da parte la rabia, el dolore, el senso de ribelion, la voja de vendeta, le strategìe de guera e tuto quelo che pole 'sassinare la vita, se no volemo che le sia morte par gnente le vìtime de l'ùltima carneficina de l'Ossezia, che ne ga fato inoridire, a la pari de quando la stessa roba la xe capità l'11 setenbre a New York, o l'11 de marzo a Madrid.
Quante strage de creature ancora, se no decidemo de canbiare el nostro cuore, la cossienza e l'imaginazion. Pare proprio che i òmeni no i gabia inparà gnente da i mali del passato e i ga senpre la stessa cativeria.
A ogni guera, a ogni massacro cala la note pi profonda sul mondo, anca parché se se 'bitua fassilmente a le robe pi dramàtiche e la reazion la tènde a sfantarse in pressia. Basta vardare quanta comozion, quanto sdegno par la tragedia de Beslan, ma no se fa altretanto davanti a l'infamia de i putini africani, drogà e mandà a conbàtare, de i meniņos de strada brasiliani che copa e che vien copà, de i putini abusà ne i bordèi de Bangkok o de quei che perde le ganbe in tera afghana...
Se no volemo fare el zogo de chi sémena terore e suna morte, prima che el virus de la vendeta e de l'odio l'infèta mezo mondo, coremo ai ripari, decidemo de canbiare el mondo, fasendo nostra la gioia de vìvare e la serenità inocente de chei putèi che la crudeltà de i "adulti" sòfega tuti i giorni par proprio tornaconto. Inparemo a vìvare da i putini. Le so làgrime le dura poco: l'alegrìa, l'inocenza, el stupore, l'ingenuità e l'incossienza che i se porta drento, li aiuta nel processo de créssita verso la libertà. In canbio però dovemo sicurarghe el pan e le medicine. A propòsito, par esenpio, parché no decidemo de saltare on pasto la setimana e no ghe mandemo el valore corispondente ai missionari che i xe anbassiatori de fede e de pace, là dove el bisogno el xe tanto grando? Na volta, sta roba, la se faséa, portando in cesa la cassetina par la Santa Infanzia. Ve ricordèo?
Quante volte gavemo dito par scherzo: "Ah, se podesse tornare indrìo!" Ben, stavolta disémolo sul serio e fémolo: tornemo indrìo, tornemo a vìvare co manco aroganza, manco cativeria, manco egoismo, manco superbia e avidità. Reinparemo a vìvare da i putini, putèi, buteleti, toseti, pici, fantolini... e canbiaremo el mondo!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Novenbre:
Editoriale
Cossa xela sta crisi?
Ormai el xe tuto on discoramento su la situazion generale che se ga fato crìtica. Se ghe dà la colpa al governo, a l'euro, a la guera, al petrolio...
de Mario Klein
Da Belun
Ai tenp de na olta
de Biancamaria De Vecchi
|
