Emigrassion

XXVI Giornata dei Migranti

El tàvolo de i relatori.

Doménega 3 otobre, a Citadela ne la stòrica "Villa Rina", gentilmente concessa dal Comune, se xe tignùa la XXVI Giornata dei Migranti. El xe un apuntamento che l'ANEA, Associazione Nazionale Emigranti ed Ex Emigranti in Australia e Americhe, organisà ogni ano par sensibilisare e par incontrare le persone che se òcupa e che ga vissùo l'emigrassion. "De i emigrati se ga dito e se ga scrito de tuto par ani", el ga dito el Presidente de l'Associassion, dotor Aldo Lorigiola, "robe bele e robe brute, robe vere e robe false in particolar modo se sta zente xe stà vardà e giudicà in maniera setoriale. A xe pi de ventisinque ani che l'ANEA parla de lori in te sto convegno anuale, verto a tuti: òmeni de governo e de la politica, òmeni de le associassion che se òcupa de i emigrati e ex, sercando de capire sto fenòmeno par poderlo conóssare mèjo. Sto ano se vorìa tentare de capire e de presentare l'emigrassion come fato de globalisassion a tuto canpo e portare come esenpio sta zente che, sensa saverlo, i ga vissùo sta realtà prima ancora che se usasse sta parola globalizzazione. òmeni e done che ga savudo inserirse ne la Cultura, ne la Politica, ne la Religiosità e ne l'Economìa del posto dove i se gheva trapiantài. Eco par cossa che se ga sielto par sto convegno el moto: Emigranti globalizzatori a tutto campo da oltre un secolo".

L'ing. Aldo Lorigiola, Presidente de l'ANEA.

Gera presente Mauro Kolobaric, cónsole generale in Australia, come rapresentante de l'Anbassiatore de l'Australia a Roma, che 'l ga ringrassià i emigranti italiani che tanto i ga fato par far conóssare sto novo paese nel mondo. El ga dito anca che la diversità culturale la xe stà e la continua a èssare na richessa e che ga portà l'Australia a sto svilupo culturale e econòmico de 'desso, e che i do stati, Italia e Australia, i ga de i programi de cooperassion che li unisse ancò pì che mai. El ga infine invità i emigranti co la dopia citadinansa a 'ndare a votare ne l'anbassiata par le pròssime elession, parché l'è un dirito che i ga otignùo.
Par la Region del Vèneto gera presente el dot. Egidio Pistore, responsabile de i Flussi Migratori in rapresentansa de l'assessore Raffaele Zanon. Anca lu ga dito la sua e, fasendo el paragon co l'abatimento de le bariere par i "diversamente abili", el ga dito come ghe sia tante altre bariere da butar zo, sociali e culturali, par na conpleta integrassion. El ga ringrassià i emigranti parché co la so esperienza, a xe possìbile èssare pì atenti e savere fare bona siera, par jutare chi che ne vien a dare na man ancò. El ga ricordà anca come sta esperienza de vita, vissùa da i nostri emigranti nel mondo, la sia tegnù in considerassion par preparare la Conferenza che se tegnarà a Sydney ne l'ano che vien.

L'intervento del dr. Egidio Pistore.

Par ùltimo, visto che 'l faseva i onori de casa, xe intervegnù l'Assessore a la Cultura e vicesindaco de Citadela, el prof. Giuseppe Pan, che 'l ga profità de presentare el restauro de la "Villa Rina" passà a la storia par avere ospità ne la guera del '15-'18 el comando militare col generale Cadorna prima e Armando Diaz dopo. Sta vila la xe stà ricuperà come sede de la Cultura e de le tradission de la sità. Infati oltre a la Sala Consiliare, usà da l'Aministrassion Comunale, ciapa posto la Biblioteca Civica, dove se conserva le memorie stòriche, leterarie e le tradission de sto pòpolo che ga dà tante persone in giro par el mondo.
Dopo la parte seria de sto convegno se ga fato festa, se ga magnà in conpagnìa e se ga fato mùsica par sentirse insieme come Comunità che ga vissudo la fadiga del distaco prima e, la fadiga de èssare a la fine tornà su un paese che col tenpo el gera canbià.
A rivédarse nel pròssimo ano!

[torna sopra]