|
Da Belun
Ai tenp de na olta
 |
| La stala no l'era granda: la bastéa par quatro vache e, qualche olta, an vedelet. |
D'istà e có scominzˆiéa l'autuno, le dornade le passéa senpre in pressa: ghe n'era da iutar par i laori de la canpagna, ma restéa anca al tenp par dugar. Mi 'ndée spess da i me vicini 'ndé che me catée co le me amighete, le sòlite: Stefania, Roseta... ma, qualche olta, te 'l gran cortivo, ghe 'n rivéa anca altre, alora l'era na gran festa! Se fea tanti dughi diversi fin a quando che gnea scur. Me divertìe na paca, có se dughéa a le "bele statuine", parché podée sbriliar la me fantasìa: ere senpre la pi originale te le me posizion, alora quel'altre le se stuféa in pressa. Có se era in zˆinque se dughéa ai quatro cantói: l'era divertente studiar al momento de disatenzˆion, de chi che era in medo, e èsser pronte e sguelte te i nostri scanbi. Quando se era in dói, invezˆe, se fea an dugo calmo sentade te i scalin de la porta de casa: ai sasset. Sti qua i dovéa èsser de la misura iusta: tondi, no tant grossi, ma andéa tant ben anca i os de pèrsego lassadi secar, parché i deventesse ledieri: al dì de ancói, "didatticamente" parlando, se dirìe che sto dugo al serve par la "coordinazione oculo-manuale",... ma noi se lo fea par... dugar!! Divertente l'era anca saltar la corda e se se alternéa co precision a menarla a turno.
Có rivéa con noi anca Marco e altri bocete, se dughéa a córerse drio: naturalmente al spazio al se slarghea anca te 'l pra vesin al cortivo e in medo a i frutèr. Alora qualchedun proponéa de dugar a "libera-ferma" (quando un al gnéa tocà, al stea imòbile e al spetéa che qualche altro lo liberasse), par no pèrderse massa lontan e no sentir le brontolade de i paroni.
Al pi sinpàtico dugo però l'era a scondicuc: trovar da scónderse te i posti pi inpensadi, l'era piasévol, ma dopo an toc quel che l'era sot al fea "tana", parché l'avea capì dove che se se era scondesti. Ghe n'era senpre un pi furbo, però, che, ùltimo de tuti, al saltéa fora zigando: "Tana mea, lìbera tuti!" E quel che avéa fat la conta prima, sbufando, al tornéa a ripèterla.
Quando che piovéa invezˆe se stea te la tieda a dugar "Pié-piedin-valentin", o al dugo de l'anel, o ai colori.
Tuti sti dughi che in part servìa a scaricar le me energìe, a farme atenta e pronta, i me piaséa, sì, certo!, ma de tut preferìe sodisfar la me curiosità. Quel che a mi me piaséa e che l'avea al saor del dugo e che al me abituéa a l'osservazion, l'era andar te la stala a vardar le vache che polséa.
L'anbiente, là da le me amighe, 'ndé che ghe n'era la stala l'era grant: l'era na costruzion stacada da la casa (e la esiste ancora!), piturada de rosa, a dói pian: da bas ghe n'era la stanza de le bestie, a fianco la tieda piena colma de inpreste, par de fora a est al forno a legne, de sora an enorme talvà: quel che se avéa noi l'era fursi la dècima part de questo! Te 'l lato ovest ghe n'era al galinèr e le cunicère; da drio ancora na gran tetoja, anca quela piena de inpreste e de foja seca. Anca te sto anbiente ghe andée de frequente e al papà de le me amighe al ne racomandéa da spess de no tocar gnent e de star atente a no farse mal. In gènere no tochée, ma usée ben i oci e le rece! Par andar te 'l talvà ghe n'era na scala co i scalin de len-c e lassù ghe rivéa sol che i grandi. Avée vist usar la forca e al trinciafien, par taiar quel che po' i avarìe mandà te la stala, do par al fenaról.
La stala no l'era granda: la bastéa par quatro vache e, qualche olta, an vedelet. L'avéa do piani: quel 'ndé che ghe n'era le bestie, l'era an cin pi alt, l'avea in prinzipio la rója par racòlier al ledan e in fondo la gripia, co i anèi de fer, 'ndé che le era tacade, ben piena de fien do olte al dì; sot de lore al stran de foje seche, rincurade de autuno e ben conservade. Te 'l pian davanti ghe n'era al fenaról e la porta da 'n lato, an pochi de scagnèi a tre zate e qualche carega vesin a do finestre messe in àngol. Qua, la sera, ai tenp de na olta, te 'l dolzˆe tepor de la stala, i fea al filò...
Savée che i nostri vicini i 'ndéa a gurnar le vache a le sié de matina e a le sié de sera e, propio a la sera, avée vist che i le moldéa, sentadi te 'l scagnel, co 'n secio in medo a le ganbe: l'era bel védar al lat sprizˆar da i tét co 'n ritmo regolar.
Le vache ogni tant le muléa e le rumighéa, girando pian pian la testa: avée notà i oci grossi, tondi e scuri, mansueti co zeje longhe. No le me fea paura ste bestie, anca se ogni tant le movéa la coda, come an scoat, par parar via le mosche e no l'era prudente starghe da vesin.
La so sgarba la era senpre bela sgionfa e ere tentada de provar anca mi a mólder: na olta la me amiga, intant che i soi i era fora, la me à lassà provar: an gesto mòrbido al meo, ma véder al lat sprizˆar te 'l secio, l'é stat veramente apagante. An "dugo", questo, che me avéa piasest tant!
Qualche olta me era capità de èsser presente de matina, intant che i netéa lore e l'anbiente: i le striliéa, i le portéa fora a beverar e i lasséa porte e finestre verte, parché l'odor de moltrin al se smorzesse; intant i tiréa via al stran, i lavéa la rója e i tornéa a méter, sparpagnada e suta, la foja neta. Có le tornéa drento, i ghe dea an pugnèl de sal ros e i le lighéa te 'l so posto...
Bisa, Gigia, Mora e Bruna, cussì i le avéa ciamade par al color del pel, le magnéa sùbito an bel poc de fien, po' le se sdraiéa e le continuéa a rumigar tranquilamente...
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Novenbre:
Editoriale
Cossa xela sta crisi?
Ormai el xe tuto on discoramento su la situazion generale che se ga fato crìtica. Se ghe dà la colpa al governo, a l'euro, a la guera, al petrolio...
de Mario Klein
Da Belun
Ai tenp de na olta
de Biancamaria De Vecchi
|
