|
Da Maran Lagunare (UD)
'Na volta se diseva che...
 |
| ...basteva sfolià i pètali de na margherita... |
Se sa che ogni paese o cità, i ga i so mudi de dì e le so credense.
Anca nel nostro pìcolo no i manca, diversi come se pol notà, i xe colegài a l'anbiente marinar che ne circonda. A parte qualchidun, i più i fa parte del tenpo passò. Come i tinpi, anca la zente e le mentalità le ganbia, e xe normal e giusto che sia cussì.
1. I pescaùri i ga constatò che quando che 'l granso el sinti maltenpo el beca forte; se dovissi capità questo nel manesalo, par faghe molà la sata bisognà dì: "Fogo palùo! Fogo palùo!!!"
2. L'ùndese e anca el sinque de Marso no xe ben 'ndà a pescà, parché in quìi zurni de sòlito vien maltenpo e esse in mar pol deventà pericoloso.
3. Cò se xe in t'una casa foresta e sensa incòrzese quando che se va via se lassa la carega che se se ga sentò fora posto, signìfica che se torna in quela casa.
(Altra version):
4. Quando che se va via de 'na casa foresta bisogna senpre mete la carega che se se ga sentò in te 'l so posto, sinò xe el deto che no se porta bondansia.
5. Se in un grupo de persone ghe ne xe tre che le ga el stesso nome, a Maran se usa dì: "Che le va a batisà un musso."
6. La prima fia de mare fasendo 'na crose verso el maltenpo, la pol fermà i siuni (tronbe marine).
7. A tocà el ciòndolo de fero che 'l xe entrando a sinistra, nel canton del canpanil de la piassa in centro, i veci d'una volta i diseva che porta fortuna.
8. Quando che vien regalò qualcossa e quel che la ricivi la ghe casca par tera, vol dì che no la xe stada regalada col cuor.
(Altra version):
9. Quando che casca qualcossa par tera vol dì che se xe nel pensier de qualchidun: la prima létera de la roba cascada xe l'inissial del nome de sta persona.
10. E ancora..., quando che a un ghe casca qualcossa par tera, xe l'usansa de dighe schersosamente: "Man de granso!"
11. A sognarse cò 'na persona che se cognussi e vedela morta, se ghe slonga la vita.
12. Par fa quetà i fantulini gera l'usansa de dighe: "Se te sta bon, te porto là de Giberto, (Bar, e ex pasticceria in centro) a vede i siùri che i magna le paste.
13. A un che 'l xe biancaisso in muso parché el sta poco ben, se ghe disi che 'l ga 'na siera (colorito) de pumi coti.
14. Quando che i carbonassi i s'ingruma, e l'aqua de mar la fa stranbi moviminti, vol dì che entro le vintiquatro ore piuvi.
Ste quatro credense le riguarda le zòvene de un tenpo passò...
15. 'Na volta i diseva che quando se vedeva un tòco de còtolo (sottoveste) che 'l vigniva zo dal vistito de 'na zòvene, voleva dì che la serchèva marìo.
16. Par savè se l'interesse verso un zòvene el gera ricanbiò, basteva sfolià i pètali de 'na margherita domandàndoghe: "Me ama, me brama, me vol ben?"
Opur:
17. Me ama, no me ama, me ama, no me ama...; la frase de l'ùltimo pètalo sfoliò, deva la risposta.
18. Gera anca el modo de savè quanti ani mancheva par sposasse domandàndoghelo al cucù in sto modo: "Cucù, cucù de la pena (penna) rissa, quanti ani ghe vol par farme novissa?"
(Sta qua qualchi sposa la usa ancora)
19. Par vè fortuna in te 'l matrimonio, el zorno de le nosse la sposa la ga de indossà sti sinque induminti: un niovo, un doprò, un de color blu, un regalò e un conprò.
20. Pa' ritrovà 'na roba persa a dì un "Pater noster" dopio, es.: "Pater noster, Pater noster, qui es in coelis, qui es in coelis... ecc.", par che se la trova.
21. Se in sièl xe un grumo de usèi che i svola insieme, se disi che "i va a nosse".
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Novenbre:
Editoriale
Cossa xela sta crisi?
Ormai el xe tuto on discoramento su la situazion generale che se ga fato crìtica. Se ghe dà la colpa al governo, a l'euro, a la guera, al petrolio...
de Mario Klein
Da Belun
Ai tenp de na olta
de Biancamaria De Vecchi
|
