| a cura de Romano Beltramini |
|
"La Sguaratà" - Ciàcole adriote
Al cìnema estivo
Co sinquanta franchi, de quei veci, a Adria, in ti ani Sinquanta, se passava le sere d'istà al "Cinema de i Frati". Veramente, el nome giusto gera "Cinema S. Francesco", ma, sicome el gera colocà in te l'oratorio de la parochia de la "Tomba" gestì da i capucini, el gera stà giustamente batezà "dei Frati" i quali sovrintendeva al rispeto morale de le pelìcole e al bon conportamento de i spetatori. Gera stà costruì un gran schermo de piera sul fondo del canpo da balon che, d'istà, el se svodava per le colonie e i canpi estivi de i fiòi, e, l'utilizo, dopo aver piassà le so bele file de careghe de legno in tel cortile, gera deventà quelo del cìnema estivo. A l'ingresso el gabioto in piera per la bilieterìa e... nissun perìcolo d'incendio perché tuto se svolgeva a l'aperto, dopo giornate de calori e sudori. Gran magnà de brustoline, de bagige, de biscotini (o stracaganasse) e, po', ciucià de gelati e ghiacioli e, per chi gaveva più disponibilità, de aranciate spuma e gazoze ca vegneva vendù al barin interno gestì da la bona volontà de nantri "giovani esploratori", reclutà da Padre Armando, capelan d'assalto. (Ancuò, a otant'ani, l'è pàroco e retore del santuario "S. Maria in Aula Regia" a Comacchio, senpre pien d'entusiasmo e de chel morbin ca ghe vorìa a tanti zóveni). El gera ai so primi tenpi de servissio in parochia, dopo i voti, e, co l'entusiasmo ca lo faseva trotare come un puliero de rassa, l'avarìa conquistà anca el più duro de i anticlericali de l'època in chel tenpo ancora caldo e pien de teste mate. Se doveva far cassa per pagarghe la colonia ai fiòi lustri e el canpo ai giovani esploratori... co le scarsele vode. òtima l'idea de gestire un barin al cìnema estivo, mèjo ancora quela de fare diretamente i ghiaciòi co i stanpi e col siropo. Quel ca cuntava, peraltro, gera méterghe... poco siropo e tanta aqua! Bastava el colore perché el siropo costava e la cassa avarìa soferto! Bona anca l'idea de fare i panini perché, in te l'intervalo del film, a più de qualchedun vegneva apetito, forse per l'emossion creà da "Via col vento", da "Com'era verde la nostra valle" o da "Ombre rosse", ancora più stimolante. El pan vegneva regalà da qualche fornaro de bona volontà. La mortadela e el formajo zalo olandese, gera dono de la POA (Pontificia Opera Assistenza) e... el ricavato gera rosolio per le casse. E el cìnema estivo deventava un afare ca se rivelava pressioso per iutare tanti fiòi e tante fameie, specie dopo la grande aluvion del Sinquantuno, e per conprare i primi capéi "a la boera" per i esploratori, mi conpreso. Ma tornemo al cinema estivo, co pelìcole ca cavava el goto, o la làgrema, a seconda de la programassion. Ghe gera sène tanto comoventi da sentire òmeni strozarse el naso per l'emossion e done ca pianzeva faséndose colare l'onbreto da i oci e insbardelàndose tuta la facia. Film ca vegneva, comunque, castigà in te le sène d'azardo, tipo basi e strucà, col tajo de la pelìcola o co l'oscuramento del trato pecaminoso, spesso solevando fis-ci e sigà, a gran voce de "quadro", ma che no slungava la barba ai frati rispetosi de le règole morali.
Ancuò gh'é più schei e se magna volentiera el vedelo in pansa a la vaca. Ancuò se vede de tuto e la morale lé 'ndà in canon in nome de la libertà e de la democrassia. Né manca i "cineforum" de còmodo che, in nome de l'arte, i espone ogni sorta de vacada in concorensa co la television che, de serto, no se salva. Tuto anca in nome de tante legi studià a comando e de polìtiche, de quei de qua e de quei de là, ca pensa più a la so scarsela che a la condussion del pòpolo. Da resto, spesso s'à sentì dire che el pòpolo l'é "bue", ma el bruto l'é che, oltre a èssere bue spesso l'é anca "musso" e el se lassa strapegare tanto facilmente da chi siga de più e svèntola mèjo la bandiera.
Cari tenpi del cìnema estivo! E ne se vegna a dire che i é i rinpianti de i veci. Più làgreme de comossion e manco làgreme de fameje desfà.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Afrontemo l'istà senza paura
Stando a le prevision, ghè da métarse le man so i caveji: crisi incalzante, prezi a le stele, caldo tòrido, anziani a ris-cio. Ve basta?
de Mario Klein
|
