Memoria venessiana

Mio papà "globetrotter"

Papà, ne i ani '50, nel so 'ndar sù e zo par monti e par vale.

Mio papà ga senpre 'vùo 'na gran passion de conóssar loghi novi.
Ghe interessava tuto: çitadine e paeseti, monumenti e òpare d'arte, ma anca i modi de vìvar difarenti da i nostri.
Quando lu gera toso, esisteva solo qualche treno, qualche coriera sgangarada ma, par el più, se 'ndava a pie, parché le "svanziche", come le ciamava lu, façeva senpre difeto.
Un fià a la volta, comunque, el xe riussìo a girar el Nord-Est d'Italia. A quei tenpi no ghe gera zaineti su le spale e tanto manco troley, cussì lu i so viagi "pedibus calcantibus" li façeva portàndose in man 'na valizeta e un tascapan a tracola. Drento ghe gera l'idispensàbile: do canbi de camize, uno de braghete curte "a la colonial" e tre pèri de scarpe. Più carte geogràfiche - quele del Touring al qual el gera iscrito fin da tozo -, la màchina fotogràfica (un casseloto nero che 'ncora esiste a casa) i documenti e un fià de schei.
Conto le so esperienze da "globetrotter" ricavando qualche apunto dal so diario intitolà "I mii 22 zorni de ferie - 13 giugno, 3 lugio 1937 (XV)".
L'esperienza de la prima note no xe stada de çerto esaltante: ostarìe drio la strada se ne trovava diverse, ma gnissuna fornìa de càmare. A un çerto momento el ga parfin pensà de domandar ospitalità al piovan de Maserà "come gaveva fato Jean Valjean ne I Miserabili."
Un vecio che passava da là in biçicleta ghe ga dito che poco più vanti, su la strada par Batalia, ghe gera 'n'altra ostarìa, cussì, uno pedalando e 'st'altro tegnìndoghe drio a pie, co in man la valizeta che ormai se façeva più pesante, i xe rivài a l'ostarìa par sentirse dir, co un senso de angossa de mio papà, che no ghe gera càmare par dormir.
"Go domandà de poderme destirar magari sora 'na tola, o anca par tera, par riposarme e dormir un fià. El paron, forse inpietosìo, el me ga risposto che, se me degnavo, ghe gera la stala, co pagia neta e fresca. Come rifiutar?

San Vito de Cerea: monumento ai Caduti, fotografà nel 1937 da mio papà, durante le so ferie a pie.

La çena che 'l me ga servìo (L. 4,50) gera abondante; po' el me ga conpagnà in stala. Go domandà quanto costava quel 'leto' e el me ga risposto: gratis. Ghe go dà lo stesso 3 lire par la coverta e go preferìo dormir ne 'l fienil sora la stala. Par 'ndar sù me so' ranpegà par 'na scala a pioli. Là in coste, ligà a 'na inferiada, ghe gera un musso che ga ruminà tuta la note. E po' la pagia spunciava... a le quatro e un quarto gero za in pie e me so' incaminà in direzion de Monselice e po', finalmente, Este, 'na çitadina 'ndove go trovà alogio a l'Albergo Cavallino. Che dormìa, su un leto vero, finalmente! Verso sera go fato un giro par la çità e viçin a un canal ghe gera un grupeto de puteli. Do me xe corsi incontro diçéndome: - Ghe xe un fio che nua... - E lassè che 'l nua: có 'l gavarà finìo el vegnarà su. I me gaveva ciapà par 'na guardia!"
Arivà a Fontanellato papà se ga fermà un zorno intiero parché el paese e el Santuario de la Madona del Rosario meritava ben 'na vìsita più acurada.
Dopo pranzo el se ga sentà a un cafè in piaza par scrìvar qualche cartolina e proseguir a tor apunti par el so diario.
"A un tavolin viçin se ga sentà un sotocapo de i carabinieri, ma 'l ga dovesto 'ndar via sùbito parché xe rivà un so subalterno a ciamarlo. Poco dopo el xe tornà, el me se ga aviçinà e el me ga domandà da 'ndove vegnivo. A la mia risposta 'da Venessia' el me ga pregà de seguirlo un momento in caserma. Rivài là el ga scominzià a domandarme 'ndove gero alogià, i documenti, parché viagiavo... e tante altre robe. Go risposto a tute le so domande e ghe go tegnìo a precisar che el Proveditorato a 'l Porto, 'ndove lavoravo, no gera 'na dita, come lu credeva, ma un ente parastatal!
El me ga domandà se gavevo schei co mi, e quanti e el ga volesto védarli. Ghe go precisà che no se pol viagiar senza schei in scarsela! Quando el ga capìo che no gero par gnente un tipo sospeto, el me ga lassà 'ndar via, scusàndose, che lu stava solamente façendo el proprio dover, parché ghe gera tanti foresti in giro e no se podeva saver se in mezo a lori ghe fusse zente poco racomandàbile.
Tornà in piaza me so' risentà al stesso tavolin e ghe go tegnìo a contarghe a la zente la mia pìcola aventura, parché me gaveva secà che i me gavesse visto portar via come se fusse un delinquente.

Papà ga conservà senpre 'sta passion par 'ndar a pie in giro par monti e pianure. El riussiva a far anca 50-60 chilòmetri al zorno e el 'ndava senpre solo, parché i pochi che gaveva tentà de starghe drio, dopo un pèr de zorni i tornava a casa sfiancài.
Ghe ga mancà tanto 'ste so "passegiate" quando, inveciando, el cuor ga scominzià a farghe bruti scherzi. A la fine el se ga visto costreto a lassar la nostra casa (ùltimo pian e senza assensor) che gera a Venessia (par no parlar de i ponti de la çità) par trasferirse in teraferma, al pian rialzà, co un giardineto 'ndove el se sentava a ciapar el sol.
De lu, de la so vogia de saver, de conóssar, me resta i so diari, 'na fonte preziosa che me fa scovrir senpre qualcossa de novo su quel omo ecezional che xe stà mio papà.

[torna sopra]