|
Fresco de stampa
Schiavon e Longa
 |
| Da sin., l'assess. D. Peron, el sìndaco A. Bianchi e l'autore Giordano Dellai. (foto InVi) |
No xe na minestra riscaldà e tanto manco na copiadura de un testo publicà na diesena de ani fà sul medésimo argomento. Xe pitosto n'òpera nova e colossale, svilupà in 580 pàgine, con copertina cartonà e telà, in finìssima veste editoriale, pa' i tipi de "La Serenissima" editore.
Se trata insoma de la seconda publicassion stòrica (per esaurimento totale de la prima ussìa circa diese ani prima) riguardante do comunità confinanti, sul teritorio de l'alta pianura visentina, conpresa tra l'Astico e el Brenta, curà con meticolosa risserca da Giordano Dellai che senpre mèjo se destreja a furegare fra le carte zale de i archivi col fiuto tìpico de na autèntica morajeta. La nova fadiga leteraria, per puntualizare la ventunésima in ordine de tenpo, afrontà da l'autore col clàssico rigore del ricercatore serio e passionà de pressiose argomentassion stòriche locali, par lo più inèdite, propone na gustosa esposission, sudivisa in nove capìtoli, rica de curiosità stòriche inpressiosìe da testimonianse fotogràfiche de pressioso valore documentale, relative a fati e personagi de un tenpo che, in calche modo, ga lassà le so peche su sta feta de tera.
"Opera piasévole e scorévole ne la letura", xe stà definià dal Sìndaco Antonio Bianchi, durante la presentassion avegnùa nel salon de le feste de Vila Chiericati, dimora stòrica de una de le più facoltose fameje citàe nel libro, che a l'època ga oferto un sostansioso contributo a l'economìa del teritorio. El Sìndaco ga concluso osservando: "Con sta publicassion, l'Aministrassion Comunale ritien de 'ver concretizà na inportante inissiativa soto el profilo stòrico-culturale che mete a disposission, non solo de la citadinansa, un pregévole strumento de studio e de risserca con valense de sussidio didàtico da propore anche a le nove generassion scolàstiche, come contributo ne l'aprofondimento de quele conossense relative al vissuto de i nostri antenati."
Diego Peron, Assessore comunale a la Cultura, ga precisà: "Racontare la storia locale de fati, personagi e anbiente, cussì richi de valori umani, risulta de fondamentale inportansa, per spiegare come che gèrimo na volta in raporto a come che semo 'desso, anche per capire mèjo come sarà el nostro futuro."
Dopo la letura de un paro de sinpàtici anèdoti che ga incantà i presenti in sala, Giordano Dellai se xe congedà dal so pùblico consitadin rassicuràndolo, con parole pregne de comossion, che la so atività leteraria come fruto de costante risserca archivistica, umilmente portà vanti con narassion sènplici e conprensìbili, mira a rèndere la storia locale più legìbile e più vissina a la zente comune.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Afrontemo l'istà senza paura
Stando a le prevision, ghè da métarse le man so i caveji: crisi incalzante, prezi a le stele, caldo tòrido, anziani a ris-cio. Ve basta?
de Mario Klein
|
