|
Da i Colli Euganei
Tenpo de fighi e piri
 |
| Soto la pianta de i fighi el nono cantava... (disegno de Piero Franceschelli) |
Non lo sò quanti tusiti gabia 'vù la fortuna de vìvare l'infansia come mi, a tu per tu co la natura, co la tera, el canpo, i so fiori e tuti i fruti che ghe gera alora. Noantri tusiti se se confondéa co tuto questo, zugando insieme co i fiuri, i fruti, le farfàe, i paejuni (le libellule), i griji e tuto el resto.
E in te 'sto momento go pressa de métar zo tanti numi de fruti (de do quaità in particolare) de alora, fighi e piri, parché go capìo che tra poco i 'ndarà in desméntega e nessun savarà che on tenpo i faséa parte de la nostra vita. Partendo da i fighi, de quei ghe ne gera tanti, da noantri, che dopo averli sunà i se vendéa par ciapare on "francheto" par vìvare mèjo.
La prima quaità che me ricordo i xe i fighi "sucòi", i pi grossi de tuti, che se faséa (maturava) par primi e i primìssimi, essendo ancora pi grossi del normàe, i vegnèa ciamà "smoche". "Questo - diseva el papà - el xe anca el fiore de 'sto àlbaro, parché la xe l'ùnica pianta che no fa fiore". Dopo ghe gera i fighi "madonati", de media grossessa e de on colore maronsin: bisognava magnarli proprio fati senò te sbrusava la lengoa. Nantra quaità gera quei "da l'arpa", ciari de colore e delicati: guai se i ciapava do giosse de piova parché i se smarzìa sùbito. I gera larghi soto e on pochetin storti verso el becolo (manegheto) e, a dire el vero, i faséa proprio pensare a la forma de l'arpa.
Arente casa ghe gera na pianta de quei "da la resta" e i gera più o meno come quei che se conpra sichi inpachetà. Dopo ghe gera i "verduni", i "mori" (ciamà cussì par el colore scuro), ma i pi inportanti, par bontà e anca parché i gera quei che costava pi de tuti, i gera i "figaini". Picenini, poco pi de na saresa e dulsi pi del miele, 'sti fighi gera proprio na delissia, anzi, a dire el vero, i xe ancora cussì, dato che anca st'ano i me ga regalà on vaseto de marmelata bonìssima, fata co 'sta quaità de fighi. Penso che i se ciamasse cussì parché, essendo picenini e vegnù da la pianta che se ga senpre ciamà figaro, se spiega tuto da sé. Me ricordo che par tanto tenpo el nono me ga contà soto el figaro le pi bee cante - alora le se ciamava cussì - che 'l savéa lu. "Vieni lì - el diséa - soto el figaro che 'l fa na bea onbrìa e cussì cantemo al frescheto". Da alora el se ciamava "el figaro del nono".
Dopo ghe gera queo de 'a cioca, parché la ghe tegnéa a l'onbrìa i so polastrèi.
Come el me volèa ben el nono Giacomo! E mi come lo scoltava volentieri, a boca verta, incantà da le so storie! Sì, parché ogni canta gera na storia che contava qualcossa. Pi de na volta el nono ne contava de èssare 'ndà a piè al marcà a Este a vèndare i fighi col bigòlo e i sisti pieni, rivando casa stufo ma contento, co i so scheiti in man par tirare avanti mèjo.
Anca de i piri me piasarìa parlare e de 'e tante quaità. I primi a vegnere prunti da magnare i gera i "santoini", picenini e tundi. Dopo ghe gera quei "de S. Lorenso", forse parché i maturava in agosto. Drio man rivava i "biancuni", bei grossi ma de poco gusto. Quei "sanpieròi", invesse, pìcoi e lunghi e de on colore proprio zalo, i gera na bontà. Pecà che i fusse massa alti e bisognava spetare che i petasse zo da sui. Anca i "piri da la coa", gera boni ma i "moscatuni", tundi e dulsi, i gera mèjo. I "butiri", grossi e de na pasta proprio come el buro, i superava tuti. Se podéa rónparli co le man e no ve digo che magnade! Veleni no ghin gera alora, siché no ghe gera perìcoi. Na quaità che no se gavéa e che ne portava i tusiti vissini de casa i gera quei "dal fero", che i gavéa la scorza come iruzenìa ("arrugginita") e quei "dal sangue". A mi i me faseva on serto che, parché dentro la polpa la gera tuta a mace rosse e forse par questo i portava sto nome; i gera però bonìssimi e sucosi.
Quei "dal legno" i ghea tuta na storia. La mama li doparava par fare el vin coto insieme co i pumi e i cogni: cusinà drento el mosto de 'a ua, vegnéa fora na spece de marmeata bona come el rosolio. Ma no avendo noantri de sti "piri dal legno", se spetava che ne i regalasse na veceta che stava poco lontan de noantri, bona e generosa che la se ciamava Stella. Sta rassa de piri, prima duri come el legno, i deventava "smissi" cioè scuri e dulsi. A chi no li conossìa i ghe paréa marsi (guasti) e invesse, cari, i gera na bontà... In te 'sto momento me par de sentire qua torno l'odor de piri che se sentìa alora e in special modo l'odore del vin coto co dentro i piri "dal legno".
Quando che sta marmelata gera quasi cota la mandava sù na spece de fumo e la mama la continuava a smissiare, co i oci che ridéa, disendo: "Ormai la xe quasi pronta, parecè i vasi!" Sì, la ridéa contenta parché la savéa quanto che la ne piaséa a noantri pìcoi. Penso de no avérghene pi magnà, da alora, de cussì dolse e inprofumà, anca parché - e questo lo go capìo pi tardi - ghe gera drento tuto el so ben, tuto el so amore che la ghe metéa in ogni roba che la faséa e in ogni ocià che se posava so 'l nostro museto de tusiti continti anca de on figo, de on pero, del cantare de on grejo in te la sera.
Na sera che spetava la matina nova inprofumà de piri, de pumi e de vita che staséa scopiando come on bòcolo de rosa da le sento foje piantà dal nono arente al muro de 'a casa.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Afrontemo l'istà senza paura
Stando a le prevision, ghè da métarse le man so i caveji: crisi incalzante, prezi a le stele, caldo tòrido, anziani a ris-cio. Ve basta?
de Mario Klein
|
