|
Editoriale
Afrontemo l'istà senza paura
Stando a le prevision, ghè da métarse le man so i caveji: crisi incalzante, prezi a le stele, caldo tòrido, anziani a ris-cio. Ve basta?
 |
| Montemo pure so la barca de l'istà... e bone vacanze a tuti! |
Zontémoghe l'invasion de la merce cinese e quela de le sginzale-tigre: par Lujo e Agosto semo aposto! Ma... che la sia proprio cussì nera? Che sia da crédarghe e da fare testamento in pressia o vèndare tuto e nare de corsa a Santo Domingo, opure che sia da stare calmi, parché "le nùvole d'istà no dise la verità?"
"Có sona le canpane, in qualche paese xe festa", cioè, se cìrcola ste gran "brute nove", calcossa de vèro ga da èssarghe, ma "calcossa de vèro... e de nero" no corisponde a note fonda. I ne parla d crisi e dopo se sente che le prime doméneghe al mare...: per Jesolo, 30 chilòmetri de coa; la Romèa intasà par i 12 chilòmetri de màchine direte a Sotomarina; doménega matina, da Tresché a Asiago a passo de omo. Epure semo in crisi!
Al sabo de sera, in pizerìe e ristoranti, bison armarse de pazienza e spetare che se lìbara on posto. Epure me conta un amigo streto che par do pize, on quartin de rosso, na bira pìcola, n'aqua minerale e du cafè el ga pagà 35 euro.
Cara la me crisi!
Alora i anunci de i profeti che ciama disgrazie e ne sassina l'istà... xe ben passarli col tamiso e darghe el peso che i mèrita. Da che mondo xe mondo, l'economìa ga senpre 'vùo alti e bassi, bassi e alti. 'Desso xe el momento de i "bassi" e, se insieme a la crisi ghe metemo la sfiducia, passèmo facilmente da la batosta a la disperazion totale.
Capisso che le mie le xe parole che no risolve, da sole, i problemi che tanti sta vivendo, ma gnanca el sistema de trasmétare paura no ghe xe de aiuto a chi vive la difìcile situazion. El terorismo psicològico a volte el fa pi dano del male stesso. Se inveze vinzemo la tentazion de ridure tuto al disastro e se sforzemo de fare quelo che fa i poeti (che, pezo va le robe, pi i spera che le miliora), ben, alora no ga da spaventarne gnanca la crisi econòmica. Anca davanti a robe che va pegiorando, xe necessario sperare che le canbia in pressia. Come in pressia passarà anca sta istà. Rivarà anca el gran caldo... ma cossa xelo confronto l'eternità? Anzi, disemo, confronto la vita, che la va difesa anca co la speranza, parché senza la vita no semo gnente!
Sto pensare, in parte, el riva da la nostra atenzion a tuto chel mondo de usi, costumi, tradizion e sentenze de i nostri veci, un mondo dove jera de casa la speranza che el giorno dopo el fusse senpre mèjo del presente, un mondo durà par sècoli e che la nova "era multimediale", co on colpo de spugna la ga scancelà. "Polenta e fighi sentà so 'l casson", me ripetéa me pora mama quando, al confronto, la crisi de oncò la pol narse a scóndare, anca se a chei tenpi no ghe voléa on patrimonio par magnare chel pesse che oncò el dotore te órdina par tre volte la setimana: na piana de sardele e... "co prochi franchi al chio, te magni par tri dì, ti, el gato e to marìo"!
E alora, al mare o ai monti, in canpagna o in sità, afrontemo senza paura la nostra istà, pensando in positivo, come i nostri veci ch'i se faséa corajo disendo: "na gran magnada de polenta e fasòi, e na bea mora (o bionda) soto i nizòi."
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Afrontemo l'istà senza paura
Stando a le prevision, ghè da métarse le man so i caveji: crisi incalzante, prezi a le stele, caldo tòrido, anziani a ris-cio. Ve basta?
de Mario Klein
|
